İnformasiya Texnologiyaları İnstitutunun Elektron Kitabxanasının və Elmi Tədqiqatlar Mərkəzinin açılışı olub

Bakı:

22 °C

54 %

2 m/s

AZ RU EN

Ana səhifə / Siyasət / İnformasiya Texnologiyaları İnstitutunun Elektron Kitabxanasının və Elmi Tədqiqatlar Mərkəzinin açılışı olub

İnformasiya Texnologiyaları İnstitutunun Elektron Kitabxanasının və Elmi Tədqiqatlar Mərkəzinin açılışı olub

05.12.2014 [10:05]

Dekabrın 4-də AMEA İnformasiya Texnologiyaları İnstitutunun Elektron Kitabxana Mərkəzinin və Elmi Tədqiqatlar Mərkəzinin rəsmi açılış mərasimi keçirilib.
AzərTAc xəbər verir ki, mərasim iştirakçıları əvvəlcə institutun müasir standartlar səviyyəsində qurulmuş Tədris-İnnovasiya və Distant Tədris mərkəzlərində olublar. İnstitutun direktoru, akademik Rasim Əliquliyev hər iki mərkəzin fəaliyyəti haqqında məlumat verib. İKT biliklərinin əldə edilməsi, informatikanın tədrisi məsələlərinin təşkili istiqamətində görülən işlərin, dövrün tələblərinə cavab verən gənc kadrların hazırlanmasının əhəmiyyətini vurğulayan direktor innovativ tədrisin təşkili, milli kadr hazırlığı siyasətinin uğurla həyata keçirilməsi istiqamətində məqsədyönlü iş aparıldığını bildirib. Qeyd olunub ki, Tədris-İnnovasiya Mərkəzində respublikanın müxtəlif elmi-tədqiqat və təhsil müəssisələrini təmsil edən tədqiqatçıların müasir informasiya texnologiyaları üzrə biliklərə yiyələnməsi üçün hər cür şərait yaradılıb.
Sonra AMEA-nın prezidenti Akif Əlizadə Elektron Kitabxana Mərkəzinin açılışını bildirən rəmzi lenti kəsib. İştirakçılar elektron kitabxana ilə, burada yaradılan şəraitlə tanış olublar. Məlumat verilib ki, kitabxana ən müasir texniki avadanlıqlarla təchiz edilib. Burada resursların identifikasiyası, oxucuların özünəxidməti həyata keçirə bilməsi üçün 3M texnologiyası quraşdırılıb. Sifarişlərin idarə olunması, müxtəlif tərkibli hesabatların hazırlanması məqsədilə “Exlibris” şirkətinin Alephino Kitabxana İdarəetmə Sistemi tətbiq edilir. Resursların təsnifatı və predmetləşdirilməsi ABŞ Konqres Kitabxanasının təsnifat sistemi ilə həyata keçirilir.
Daha sonra institutun Elmi Tədqiqatlar Mərkəzinin açılışı olub. Akademik Rasim Əliquliyev Mərkəzdə fəaliyyət göstərən şöbələrin elmi fəaliyyət istiqamətləri haqqında məlumat verərək bildirilib ki, mərkəzdə informasiya cəmiyyətinin elmi-nəzəri problemləri, internetşünaslığın multidistiplinar aspektləri, informasiya təhlükəsizliyi, informasiya iqtisadiyyatının, e-elmin formalaşması problemləri və digər sahələrdə elmi araşdırmalar aparılır.
Qonaqlar institutun yüksək texnologiyalarla və müasir avadanlıqlarla təchiz olunmasını, əməkdaşlar üçün yaradılan şəraiti yüksək qiymətləndiriblər.
Mərasimdə rabitə və yüksək texnologiyalar naziri akademik Əli Abbasov, təhsil naziri Mikayıl Cabbarov, AMEA-nın vitse-prezidentləri akademik İbrahim Quliyev və akademik İsa Həbibbəyli, Azərbaycan Prezidenti yanında Elmin İnkişaf Fondunun icraçı direktoru Elçin Babayev, habelə KİV nümayəndələri iştirak ediblər.

Paylaş:

Baxılıb: 1839 dəfə