Çingiz Bayramov: Konstitusiya islahatları vətəndaş cəmiyyətinin inkişafı baxımından böyük əhəmiyyətə malikdir

Bakı:

23 °C

67 %

5 m/s

AZ RU EN

Ana səhifə / Siyasət / Çingiz Bayramov: Konstitusiya islahatları vətəndaş cəmiyyətinin inkişafı baxımından böyük əhəmiyyətə malikdir

Çingiz Bayramov: Konstitusiya islahatları vətəndaş cəmiyyətinin inkişafı baxımından böyük əhəmiyyətə malikdir

24.09.2016 [09:54]

“Azərbaycanın sürətli inkişafı, əldə edilən çoxsaylı nailiyyətlər islahatların davamlı olmasını tələb edir. Son illərdə həyata keçirilən islahatlar, qazanılan uğurlar Azərbaycanı həm regional liderə, həm də dünya miqyasında nüfuzlu dövlətlərdən birinə çevirib. Bu səbəbdən Azərbaycan hüquqi istiqamətdə də islahatların həyata keçirilməsini, müəyyən təkmilləşdirmə işlərinin aparılmasını zəruri hesab edir. Məhz Konstitusiya islahatları da bu baxımdan mühüm əhəmiyyət daşıyır”. Bunu “Yeni Azərbaycan” qəzetinə açıqlamasında “Vətəndaş Cəmiyyəti” təşviqat qrupunun səlahiyyətli nümayəndəsi, “Türkiyə Universitetləri Məzunları” İctimai Birliyinin sədri Çingiz Bayramov deyib.
Onun sözlərinə görə, Konstitusiyaya nəzərdə tutulan dəyişikliklər tarixi zərurətdən irəli gəlir: “26 sentyabrda keçiriləcək referendumda Konstitusiya ilə bağlı 29 maddə vətəndaşların müzakirəsinə təqdim olunacaq. Onlardan 23-ü dəyişikliklər, 6-sı isə əlavələrdir. Əminliklə söyləmək olar ki, Konstitusiyaya təklif edilən əlavə və dəyişikliklər ölkəmizin inkişafının yeni mərhələsinin başlanğıcı olacaq”.
Əlavə və dəyişikliklərlə bağlı irəli sürülən təkliflərin Azərbaycanın inkişafının, dövlət müstəqilliyinin möhkəmləndirilməsinə, qüdrətlənməsinə xidmət etdiyini bildirən Çingiz Bayramov əlavə edib ki, Konstitusiya islahatları vətəndaş cəmiyyətinin inkişafı baxımından da böyük əhəmiyyətə malikdir: “Demokratik, hüquqi dövlət, vətəndaş cəmiyyəti quruculuğu, dünya birliyinə fəal inteqrasiya müstəqil Azərbaycanın əsas hədəflərindən biri kimi müəyyən olunub. Məhz buna görə də vətəndaş cəmiyyəti və hüquqi dövlət quruculuğu istiqamətində də davamlı islahatlar həyata keçirilir. Məhz Konstitusiya islahatları da bu istiqamətdə ardıcıl nailiyyətlərin əldə edilməsinə imkan verəcək”.
“Keçirilən görüşlər zamanı müşahidə edirik ki, vətəndaşların Konstitusiya islahatlarına münasibəti müsbətdir. İnsanlar ona görə bu məsələyə müsbət yanaşırlar ki, bu təkliflərin təşəbbüskarı ölkə Prezidenti İlham Əliyevdir. Azərbaycan vətəndaşları əmindirlər ki, Konstitusiya dəyişiklikləri Azərbaycanın inkişafına, sabitlik və rifaha xidmət edir. Mən bütün seçiciləri sentyabrın 26-da fəal olmağa və Konstitusiya dəyişikliklərinə səs verməyə çağırıram”, - deyə səlahiyyətli nümayəndə əlavə edib.
NURLAN

Paylaş:

Baxılıb: 859 dəfə