Rufiz Qonaqov: Referendum Azərbaycanda demokratiyanın təntənəli qələbəsi idi

Bakı:

23 °C

63 %

11 m/s

Əlaqə

AZ RU EN

Ana səhifə / Siyasət / Rufiz Qonaqov: Referendum Azərbaycanda demokratiyanın təntənəli qələbəsi idi

Rufiz Qonaqov: Referendum Azərbaycanda demokratiyanın təntənəli qələbəsi idi

30.09.2016 [10:05]

“Keçirdiyimiz görüşlər, müşahidələrimiz göstərir ki, Azərbaycan xalqı referendumu birmənalı şəkildə dəstəklədi. Səsvermə günü yüksək seçici fəallığı oldu. Həm Mərkəzi Seçki Komissiyasının, həm “exit poll” keçirən təşkilatların, seçkiləri izləyən yerli və xarici müşahidəçilərin məlumatlarına əsaslanaraq səsvermənin şəffaf keçirildiyini söyləmək olar”. Bunu Azərbaycan Respublikasının Prezidenti Yanında QHT-lərə Dövlət Dəstəyi Şurasının üzvü, Beynəlxalq Münasibətlərin Araşdırılması Mərkəzinin rəhbəri Rufiz Qonaqov deyib. Referendum üzrə “Vətəndaş cəmiyyəti” təşviqat qrupunun səlahiyyətli nümayəndəsi kimi, yerlərdə seçicilərlə görüşlərdə iştirak etdiyini deyən R.Qonaqov vurğulayıb ki, bu görüşlərdə Konstitusiya islahatlarının əsas məğzi, dəyişiklik olunacaq detallar onların diqqətinə çatdırılıb: “Səsvermədə seçicilərin 70 faizinin iştirak etməsi, seçicilərin 90 faizdən çoxunun dəyişiklikləri dəstəkləməsi Prezidentin irəli sürdüyü təşəbbüsün Azərbaycan xalqının iradəsini əks etdirdiyini, xalqımızın demokratik inkişaf yolunda yeni və diqqətəlayiq addım atdığını göstərir. Xalq həmin gün sosial-iqtisadi inkişafın davamlılığına, siyasi və inzibati sistemin təkmilləşməsinə, müstəqilliyin, təhlükəsizliyin daha da möhkəmlənməsinə səs verdi”.
Referendumdan sonra ölkədə ciddi islahatların aparılacağını deyən Rufiz Qonaqov bildirib ki, artıq bu proses başlayıb: “Təsadüfi deyil ki, Prezident İlham Əliyev 2016-cı ili ölkədə “İslahatlar ili” elan edib. Postneft dövrünə hazırlaşan Azərbaycan operativ, çevik islahatlar həyata keçirməkdədir. Bu istiqamətdə bütün imkanlardan, həm inzibati, həm iqtisadi, həm də insan resurslarından istifadə olunur. Biz yaxın gələcəkdə ciddi islahatların və onun müsbət nəticələrinin şahidi olacağıq. Referendum siyasi sistemdə və idarəetmə praktikasında əhəmiyyətli dəyişikliklər yaradacaq. Ən əsası və xalqın əsas istəyi olan ictimai-siyasi sabitlik, əmin-amanlıq bundan sonra daha da güclənəcək. Dünyada baş verən hərbi, siyasi kataklizmlər fonunda Azərbaycandakı əmin-amanlığın olması və gələcəkdə də onun qorunub saxlanılması çox böyük əhəmiyyət kəsb edir. İnsanlar sabitliyin qorunub saxlanılacağına və islahatların aparılacağına əmin olduqları üçün seçkilərdə fəal iştirak etdilər. Referendum ölkəmizdə həyata keçirilməkdə olan islahatların anonsu olmaqla yanaşı, dəyişikliklər üçün hüquqi baza və siyasi alət idi.
Hesab edirəm ki, Azərbaycanda həyata keçiriləcək islahatların kökündə iqtisadi məsələlər duracaq. Yeni iqtisadi modelin yaranması, Azərbaycanın böyük iqtisadi potensialından səmərəli istifadə üçün artıq ilkin addımlar atılıb”.
Referenduma beynəlxalq reaksiyaların müsbət olduğunu deyən Rufiz Qonaqovun sözlərinə görə, Prezidentin təşəbbüsü ilə irəli sürülən, xalq tərəfindən dəstəklənən dəyişikliklər beynəlxalq təşkilatlar tərəfindən normal qarşılandı: “26 sentyabrda xalqımızın dövlət quruculuğu, demokratiya yolunda çox mühüm addım atdığını beynəlxalq qurumlar etiraf ediblər. ABŞ Dövlət Departamenti Azərbaycandakı referendumun təhlükəsizlik sahəsində hər hansı insident olmadan keçdiyini və Konstitusiya islahatlarının dövlətimizin daxili işi olduğunu bəyan edib. Yuxarıda qeyd etdiyim kimi, xarici müşahidəçilər də seçkilərin şəffaf və ədalətli keçdiyini bəyan edib. Azərbaycandakı siyasi partiyalar da, əsasən, referenduma dəstəklərini ifadə ediblər. Referendum öncəsi siyasi partiyalara aksiyalar keçirməyə hər cür şərait yaradıldı. Amma göründüyü kimi, mitinqləri olduqca sönük keçdi. Çünki xalq Konstitusiya dəyişikliklərinin vacibliyini anlayaraq islahat tərəfdarı olduğunu qətiləşdirmişdi. Mən 26 sentyabrda keçirilən referendumu Azərbaycanda demokratiyanın təntənəli qələbəsi hesab edirəm”.

Paylaş:

Baxılıb: 406 dəfə