Xocalıda ucalan tarixi ədalət

Bakı:

17 °C

59 %

10 m/s

Əlaqə

AZ RU EN

Ana səhifə / Arxiv / Xocalıda ucalan tarixi ədalət

Xocalıda ucalan tarixi ədalət

02.03.2026 [21:48]

Azərbaycan tarixinin ən ağrılı səhifələrindən biri olan Xocalı soyqırımı heç vaxt unudulmayan, xalqın yaddaşına əbədi həkk olunmuş faciədir. Bu hadisə təkcə bir şəhərin sakinlərinə qarşı törədilmiş vəhşilik deyil, bütövlükdə insanlığa qarşı yönəlmiş ağır cinayətdir. İllər boyu Azərbaycan dövləti bu həqiqətlərin beynəlxalq ictimaiyyətə çatdırılması üçün ardıcıl və prinsipial siyasət yürütmüş, nəhayət, tarixi ədalətin bərpası istiqamətində mühüm nəticələr əldə olunmuşdur.

Prezident İlham Əliyevin Xocalı Soyqırımı Memorial Kompleksinin açılış mərasimindəki çıxışı bu uzunmüddətli mübarizənin məntiqi yekunu kimi səsləndi. Dövlət başçısı çıxışında vurğuladı ki, Xocalı həqiqətlərinin dünyaya çatdırılması Azərbaycan dövlətinin prioritet istiqamətlərindən biri olub və bu istiqamətdə görülən işlər real nəticələr verib.

Son illərdə həyata keçirilən diplomatik təşəbbüslər, beynəlxalq platformalarda aparılan ardıcıl informasiya siyasəti və hüquqi-siyasi fəaliyyət nəticəsində Xocalı faciəsi barədə həqiqətlər daha geniş coğrafiyada tanınmağa başlayıb. Bu, Azərbaycanın haqlı mövqeyinin beynəlxalq müstəvidə getdikcə gücləndiyini göstərir.

Xüsusilə Xocalıya ədalət kampaniyası çərçivəsində görülən işlər faciənin tanıdılması prosesində mühüm rol oynayıb. Dünyanın müxtəlif ölkələrində keçirilən konfranslar, sərgilər, anım tədbirləri və hüquqi təşəbbüslər nəticəsində bir sıra dövlətlərin parlamentləri və beynəlxalq təşkilatlar Xocalı hadisələrinə hüquqi-siyasi qiymət veriblər.

Bu kampaniya yalnız siyasi təşəbbüs deyil, həm də mənəvi məsuliyyət missiyası kimi çıxış edir. O, dünya ictimaiyyətinə mühüm mesaj verir: ədalət geciksə də, unudulmur və tarixi həqiqətlər gec-tez öz təsdiqini tapır.

Memorial Kompleksin məhz Xocalı torpağında açılması xüsusi rəmzi məna daşıyır. Uzun illər işğal altında qalmış ərazidə belə möhtəşəm abidənin ucaldılması Azərbaycanın siyasi iradəsinin, dövlət gücünün və mənəvi qələbəsinin bariz ifadəsidir. Prezident İlham Əliyev çıxışında qeyd etdi ki, Xocalı qurbanlarının qanı yerdə qalmadı, Azərbaycanın ərazi bütövlüyü bərpa olundu və bu torpaqlarda yenidən həyat qurulur. Bu fikir həm tarixi ədalətin bərpasının təsdiqi, həm də gələcəyə ünvanlanan güclü mesaj kimi səsləndi.

Bu gün Xocalıda həyata keçirilən genişmiqyaslı bərpa və quruculuq işləri göstərir ki, Azərbaycan postmünaqişə dövründə yalnız hərbi-siyasi qələbə ilə kifayətlənmir, həm də azad edilmiş torpaqlarda dayanıqlı inkişaf modelini tətbiq edir. Memorial Kompleks bu prosesin həm yaddaş, həm də ideoloji dayaqlarından biri kimi çıxış edir. Burada ucaldılan hər bir abidə elementi xalqın ağrısını, mübarizəsini və nəhayət qələbəsini simvolizə edir. Kompleks gələcək nəsillər üçün həm yaddaş məkanı, həm də vətənpərvərlik məktəbi funksiyasını daşıyacaq.

Xocalı Memorialının açılması dünya ictimaiyyətinə verilən açıq mesajdır: Azərbaycan öz tarixini unutmur, şəhidlərinin xatirəsini uca tutur və ədalətin təmin olunması yolunda prinsipial mövqeyindən geri çəkilmir. Prezident İlham Əliyevin çıxışı bu mövqenin siyasi manifesti kimi qiymətləndirilə bilər. Dövlət başçısının vurğuladığı kimi, Xocalı soyqırımını törədənlər və onların havadarları tarix və beynəlxalq hüquq qarşısında cavab verməlidirlər. Bu, yalnız Azərbaycanın deyil, bütövlükdə beynəlxalq ədalət sisteminin tələbidir.

27 fevral 2026-cı ildə Xocalıda Memorial Kompleksin açılması Azərbaycan tarixində mühüm mərhələ kimi yadda qalır. Bu hadisə qalib dövlətin öz tarixi yaddaşını bərpa etməsinin, şəhidlərinin xatirəsini ucaldmasının və gələcəyə inamla addımlamasının parlaq nümunəsidir.

Prezident İlham Əliyevin çıxışı bir daha göstərdi ki, Azərbaycan tarixi ədalətin təmin olunması yolunda ardıcıl və prinsipial siyasət yürütməkdə qətiyyətlidir. Xocalı soyqırımı qurbanlarının əziz xatirəsi daim yaşayacaq, onların ruhu qarşısında ən böyük borc isə müstəqil, güclü və qalib Azərbaycanın daha da möhkəmləndirilməsidir.

Tarix unudulmur. Ədalət geciksə də, təntənə ilə bərqərar olur.

Əli Paşayev

YAP Tərtər rayon təşkilatının məsləhətçisi

Paylaş:

Baxılıb: 193 dəfə