Füzuli – Qələbədən Dirçəlişə Uzanan Tarixi Yol

Bakı:

22 °C

88 %

7 m/s

Əlaqə

AZ RU EN

Ana səhifə / Arxiv / Füzuli – Qələbədən Dirçəlişə Uzanan Tarixi Yol

Füzuli – Qələbədən Dirçəlişə Uzanan Tarixi Yol

15.10.2026 [17:02]

Azərbaycanın müasir tarixində elə hadisələr var ki, onların əhəmiyyəti təkcə hərbi qələbə ilə məhdudlaşmır, həm də xalqın milli ruhunu, dövlətçilik iradəsini və gələcəyə olan inamını özündə əks etdirir. 17 Oktyabr – Füzuli Şəhəri Günü məhz belə əlamətdar tarixlərdəndir. Bu gün Azərbaycan xalqının onilliklər boyu qəlbində yaşatdığı doğma torpaqlara qayıdış arzusunun gerçəkləşməsini, tarixi ədalətin bərpasını və azad edilmiş ərazilərdə yeni həyatın başlanmasını simvolizə edir.

Füzuli Azərbaycanın qədim yaşayış məskənlərindən biri olmaqla, zəngin tarixi, mədəni irsi və strateji mövqeyi ilə seçilir. Lakin Ermənistanın hərbi təcavüzü nəticəsində şəhər uzun illər işğal altında qalmış, sakinləri doğma yurdlarından didərgin düşmüşlər. Füzulililərin yaddaşında doğma evlərin, küçələrin, məktəblərin və illərlə qurduqları həyatın həsrəti yaşasa da, bu həsrət heç vaxt ümidsizliyə çevrilmədi. Azərbaycan dövləti və xalqı işğal faktı ilə barışmadı, ərazi bütövlüyünün bərpasını özünün əsas milli məqsədlərindən biri kimi qoruyub saxladı.

2020-ci ilin Vətən müharibəsi bu tarixi mübarizənin həlledici mərhələsi oldu. Azərbaycan Ordusunun sentyabrın 27-dən etibarən başladığı əks-hücum əməliyyatları nəticəsində işğal altında olan torpaqlarımızın azadlığı təmin edilməyə başlandı. Oktyabrın 17-də Füzuli şəhərinin azad olunması müharibənin gedişində mühüm dönüş nöqtələrindən biri kimi tarixə düşdü. Bu qələbə Azərbaycan əsgərinin döyüş meydanında göstərdiyi qəhrəmanlığın, Ali Baş Komandan İlham Əliyevin qətiyyətli rəhbərliyinin və xalqımızın sarsılmaz birliyinin nəticəsi idi.

Füzulinin azad edilməsi həm də Azərbaycanın beynəlxalq səviyyədə tanınmış sərhədləri daxilində suverenliyini bərpa etmək əzminin bariz ifadəsi oldu. Bu hadisə göstərdi ki, uzun illər davam edən işğal Azərbaycan xalqının iradəsini sındıra bilməz. Əksinə, illərlə doğma torpaqlarından ayrı düşmüş insanların qayıdış ümidi daha da gücləndi. Füzuli uğrunda aparılan döyüşlərdə qəhrəmanlıq göstərən hərbçilərimizin fədakarlığı isə tariximizin ən şərəfli səhifələrindən birinə çevrildi. Bu gün azad Füzulidə dalğalanan üçrəngli bayrağımız şəhidlərimizin qanı, qazilərimizin qəhrəmanlığı və xalqımızın mübarizə əzmi ilə qazanılmış Zəfərin rəmzidir.

Lakin Füzulinin tarixində yeni mərhələ yalnız şəhərin azad olunması ilə bitmir. Qarşıda duran əsas vəzifələrdən biri dağıdılmış ərazilərin yenidən qurulması, müasir infrastrukturun yaradılması və keçmiş məcburi köçkünlərin doğma yurdlarına təhlükəsiz qayıdışının təmin edilməsidir. Azərbaycan dövləti bu istiqamətdə ardıcıl tədbirlər həyata keçirir. Füzulidə yolların, yaşayış məntəqələrinin, sosial obyektlərin və digər infrastruktur layihələrinin inşası şəhərin gələcək inkişafı üçün möhkəm təməl yaradır.

Füzuli Beynəlxalq Hava Limanının istifadəyə verilməsi şəhərin strateji əhəmiyyətini daha da artırmışdır. Bu mühüm layihə Qarabağın nəqliyyat imkanlarının genişlənməsinə, iqtisadi əlaqələrin inkişafına və bölgənin beynəlxalq səviyyədə tanıdılmasına xidmət edir. Eyni zamanda, Füzulidə həyata keçirilən quruculuq işləri Azərbaycanın işğaldan azad edilmiş əraziləri yalnız bərpa etmək deyil, onları müasir, dayanıqlı və iqtisadi baxımdan inkişaf etmiş bölgələrə çevirmək niyyətini nümayiş etdirir.

Füzulinin dirçəlişi Böyük Qayıdış strategiyasının mühüm tərkib hissəsidir. Doğma torpaqlarına qayıdan insanların öz evlərində yaşaması, uşaqların yenidən həmin torpaqlarda təhsil alması, ailələrin burada gələcək qurması qələbənin ən böyük mənəvi nəticələrindəndir. Çünki əsl qələbə yalnız torpağın azad edilməsi ilə deyil, həmin torpaqlarda həyatın bərpası, insanların təhlükəsiz və firavan yaşayışının təmin olunması ilə tamamlanır.

17 Oktyabr – Füzuli Şəhəri Günü bizə bir daha xatırladır ki, milli birlik, güclü dövlətçilik və Vətənə sədaqət ən çətin sınaqlardan belə qalib çıxmağa imkan verir. Bu əlamətdar gün şəhidlərimizin xatirəsinə ehtiram, qazilərimizin fədakarlığına minnətdarlıq və gələcək nəsillər qarşısında tarixi məsuliyyət deməkdir. Bu gün Füzuli keçmişin ağrılarından güc alaraq gələcəyə doğru irəliləyir. Onun yenidən qurulan küçələri, inkişaf edən infrastrukturu və doğma yurda qayıdan sakinləri Azərbaycanın Zəfər tarixinin davam etdiyini göstərir. Azad Füzuli milli qürurumuzun, sarsılmaz iradəmizin və quruculuq əzmimizin canlı təcəssümüdür.

Nicat Əsədli

YAP Ordubad rayon təşkilatının əməkdaşı

Paylaş:

Baxılıb: 62 dəfə

Xəbər lenti

Hamısına bax