Bir gündə üç ünvan!

Bakı:

14 °C

72 %

4 m/s

Əlaqə

AZ RU EN

Ana səhifə / MEDİA / Bir gündə üç ünvan!

Bir gündə üç ünvan!

29.11.2025 [10:17]

Böyük Qayıdış davam edir...

Xalqımızın ən acı və ağrılı tarixlərindən biri olan 30 illik qaçqınlıq dövrü artıq geridə qalıb. Demək olar ki, hər gün azad edilmiş ərazilərimizə müxtəlif ünvanlardan köç yola salınır. Qayıdışın hər addımı, hər yeni başlanğıcı həm qəlbləri fərəhləndirir, həm də ümidlərimizi canlandırır. Yüzlərlə ailə, torpaqlarına, evlərinə, illərlə həsrət qaldığı yurdlarına geri dönür.

Böyük Qayıdışın emosional yükü çox böyükdür. Dədə-baba torpaqlarından didərgin düşmüş bir xalqın öz yurduna geri dönməsi, yalnız coğrafi dəyişiklik deyil. Bu, eyni zamanda xalqımızın öz kimliyini bərpa etməsinin, tarixini yenidən yazmasının başlanğıcıdır.

İşğaldan azad edilmiş ərazilərdə dağıdılmış tarixi, dini, mədəni abidələrimiz, təbiətimiz bərpa olunur. Bu istiqamətdə Heydər Əliyev Fondu da xüsusi fəallıq göstərir, vaxtilə ermənilər tərəfindən dağıdılmış milli və mənəvi irsimizin bərpasına layiqli töhfələr verir. Fondun həyata keçirdiyi quruculuq layihələri qədim yurd yerlərimizin tarixi şöhrətini və özünəməxsus ənənələrini geri qaytarır.

Xatırladaq ki, 2022-ci il noyabrın 16-da Prezident İlham Əliyev tərəfindən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” da təsdiq olunub. Ötən dövrün mənzərəsi göstərir ki, proqramda qarşıya qoyulan vəzifələr uğurla reallaşdırılır. Proqramdan irəli gələrək Qarabağ və Şərqi Zəngəzurun iqtisadi potensialının hərəkətə gətirilməsi, azad edilmiş ərazilərdə istehsal sahələrinin yaradılması, doğma yurdlarına geri dönən keçmiş məcburi köçkünlərin məşğulluq imkanları, insan kapitalının inkişaf etdirilməsi, sosial dəstək mexanizmlərinin geniş tətbiqi kimi məsələlər də diqqət mərkəzində saxlanılır.

İnfrastruktur yenidən qurulur...

Böyük Qayıdışın uğurla həyata keçirilməsi üçün ilk növbədə, möhkəm iradə və strateji yanaşma lazımdır. Dövlətimiz isə bu işin öhdəsindən lazım olduğu kimi gəlir. Bu proses yalnız evlərin tikilməsi və infrastrukturların bərpası ilə məhdudlaşmır. Kənd təsərrüfatı, turizm və sənaye sahələrinin inkişafı üçün xüsusi proqramlar hazırlanır ki, yerli əhali yalnız evlərinə qayıdaraq, eyni zamanda iqtisadi həyatlarını da yenidən qura bilsinlər.

İnfrastruktur sahəsində böyük layihələr həyata keçirilir. Yolların bərpası, su və enerji təminatının gücləndirilməsi, təhsil və səhiyyə müəssisələrinin yenidən qurulması üçün mühüm layihələrə başlanılıb. Dövlətimizin bu istiqamətdə atdığı bütün addımlar, həmçinin beynəlxalq aləmdə də Azərbaycan Respublikasının mövqeyini gücləndirir. Həm yerli, həm də xarici investorların işğaldan azad edilmiş ərazilərə diqqət yetirməsi, iqtisadiyyatın bərpası və sosial sabitliyin təmin olunmasında mühüm rol oynaya bilər.

Üç ünvan, 62 ailə, yeni həyat...

Dünən işğaldan azad olunmuş üç fərqli ünvana köç yola salınıb. Ölkənin müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələr Ağdam rayonunun Xıdırlı kəndinə, Zəngilan rayonunun Məmmədbəyli kəndinə və Xocavənd rayonunun Qırmızı Bazar qəsəbəsinə yola salınıb. Bu mərhələdə Xıdırlı kəndinə 13 ailə, 48 nəfər, Qırmızı Bazar qəsəbəsinə 16 ailə 55 nəfər, Məmmədbəyli kəndinə isə 33 ailə - 177 nəfər köçürülüb. Köçürülən ailələrə mənzillərin açarları təqdim edilib.

Qarabağ və Şərqi Zəngəzurda Azərbaycan dövlətinin həyata keçirdiyi genişmiqyaslı bərpa işləri nəhəng və əzəmətli quruculuğun parlaq nümunəsidir. Prezident İlham Əliyevin qətiyyəti, əzmi və xüsusi qayğısı ilə işğaldan azad edilmiş ərazilərimizdə həyat yenidən canlanır. Ölkə başçısının azad edilmiş ərazilərə hər səfəri yeni obyektlərin təməllərinin atılması və inşaat işlərinin yekunlaşdırılması ilə əlamətdar olur. Bütün bunlar, o cümlədən Böyük Qayıdış bu il də sürətlə davam etdirilib. Bərpa edilməkdə olan müxtəlif yaşayış məskənlərinə keçmiş məcburi köçkünlərin dönüşü təmin olunub. Bütövlükdə 2025-ci il Böyük Qayıdış proqramının həyata keçirilməsi istiqamətində uğurlu mərhələ hesab olunur. Hər birimiz bu mərhələnin növbəti illərdə də uğurla, əzmlə və böyük ruh yüksəkliyi ilə davam edəcəyinə əminik...

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İşğaldan azad olunmuş ərazilərə “Böyük Qayıdış”” istiqaməti üzrə hazırlanmışdır.

Yeganə

Paylaş:

Baxılıb: 34 dəfə