Dünənimiz, bu günümüz və gələcəyimiz...

Bakı:

22 °C

65 %

10 m/s

Əlaqə

AZ RU EN

Ana səhifə / MEDİA / Dünənimiz, bu günümüz və gələcəyimiz...

Dünənimiz, bu günümüz və gələcəyimiz...

12.12.2025 [08:11]

Azərbaycançılıq ideologiyası beynəlxalq münasibətlərdə də özünü göstərir

Xalqımızın tarixin çoxsaylı dönəmlərindən süzülüb gəlmiş mədəniyyətini, dilini, adət-ənənələrini və dövlətçilik ənənələrini qorumaqda azərbaycançılıq ideyası vacib rol oynayıb. Bu ideya əsrlər boyu müxtəlif dövrlərdə dəyişən, ancaq əsas prinsiplərini qoruyub saxlayan bir həyat tərzidir. Azərbaycanın dünəni, bu günü və gələcəyi Azərbaycançılıq ideyasının işığında yenidən formalaşır.

Dünyanın müxtəlif ölkələrində yaşayan azərbaycanlılar arasında bu ideologiyanın geniş yayılması 1993-cü ildən etibarən həyata keçirilməyə başladı. İlk vaxtlar ölkə daxilində mövcud olan problemlər, siyasi xaos, iqtisadi tənəzzül, müharibənin davam etməsi və s. ciddi nailiyyətlər qazanmağa imkan verməsə də, aparılmış ardıcıl və məqsədyönlü siyasətin nəticəsi olaraq 1990-cı illərin sonlarında bu sahədə əsaslı dönüş yaratmaq mümkün oldu. Məhz bu dövrdən etibarən dünyanın hansı ölkəsində yaşamasından asılı olmayaraq, bütün soydaşlarımız azərbaycançılıq ideologiyası ətrafında birləşməyə başladılar. Bu gün də onlar bu ideya ətrafında sıx birləşib azərbaycançılığı qoruyub saxlamaqdadırlar.

Davamlı mübarizə aparılıb

Milli Məclisin Hüquq siyasəti və dövlət quruculuğu komitəsinin üzvü Kamal Cəfərov “Yeni Azərbaycan”a açıqlamasında bildirib ki, Sovet dövrü ərzində azərbaycançılıq ideyasının bir çox aspektləri məhdudlaşdırılsa da, xalqın kollektiv yaddaşında və mədəniyyətində öz kökünü itirməyib: “Kimliyimizin qorunması, dilin inkişafı və mədəniyyətimizin yaşadılması üçün davamlı bir mübarizə aparılıb.

Bu gün də Azərbaycan müstəqil bir dövlət olaraq öz kimliyini və mədəniyyətini qoruyur, gücləndirir və dünyaya tanıdır. Azərbaycançılıq ideyasının bugünkü ifadəsi həm müstəqil dövlətin daxili siyasətində, həm də beynəlxalq münasibətlərində özünü göstərir. Müstəqilliyimizin əldə olunmasından sonra, xüsusilə 1990-cı illərin ortalarından başlayaraq, dəyərlərimizi qorumaq və inkişaf etdirmək istiqamətində ardıcıl addımlar atıb”.

İdeologiyamızın müasir dövrdəki təzahürləri

K.Cəfərov qeyd edib ki, Azərbaycanda həyata keçirilən sosial və iqtisadi islahatlar, milli təhsil sisteminin inkişafı, mədəniyyətin və sənətinin modernləşdirilməsi azərbaycançılıq ideyasının müasir dövrdəki təzahürləridir: “Ən vacib addımlardan biri, əlbəttə ki, Azərbaycan dilinin dövlət dili olaraq möhkəm qorunması və təbliğidir. Azərbaycançılıq dilin və mədəniyyətin qorunması ilə yanaşı, həm də xalqın öz tarixi və müstəqil dövlətçiliyinə olan bağlılığını gücləndirir”.

Deputatın sözlərinə görə, Azərbaycanın xarici siyasətində də azərbaycançılıq ideyasının əhəmiyyəti böyükdür: “Azərbaycan regionda və dünyada özünə hörmət qazanan bir dövlət olaraq maraqlarımızı qorumağa davam edir. Bu, yalnız siyasi və iqtisadi sahələrdə deyil, həm də mədəni diplomatiya, beynəlxalq əməkdaşlıq və regional təhlükəsizlik məsələlərində özünü göstərir”.

Gənclərimiz azərbaycançılıq ətrafında sıx birləşib

Millət vəkili qeyd edib ki, Azərbaycançılıq ideyasının gələcəyi ölkənin qarşısında duran böyük çağırışlarla üz-üzədir: “Bu çağırışların ən böyüklərindən biri, dövlətimizin qlobal dünyada öz yerini tapmasıdır. Xüsusilə, iqtisadi, mədəni və texnoloji inkişaf sahələrində daha da irəliləmək, dünya miqyasında Azərbaycanın gücünü artırmaq üçün bu ideyanın davamlı olaraq təbliğinə ehtiyac var.

Azərbaycançılığın gələcəyi eyni zamanda gənc nəslin yetişdirilməsinə də bağlıdır. Müasir dünyada informasiya texnologiyalarının, mədəniyyətlərarası əlaqələrin və qlobal məsələlərin sürətlə dəyişdiyi bir dövrdə, gənclərin kimliyimizi qorumaları vacibdir. Bu gün Vətənə bağlı, azərbaycançılıq ideologiyası əsasında tərbiyə olunan gənclərimiz ölkənin inkişafı üçün bütün gücünü səfərbər edib. Gənclər dövlətimizin gələcəyidir və bu gün dövlət strukturları onlara etibar edilir. Onlar dünyada bayrağımızı dalğalandırırlar, sərhədlərimizi ayıq-sayıq qoruyurlar. Ölkəmizdə bilikli, bacarıqlı, vətənpərvər gənc nəslin yetişməsi onu deməyə əsas verir ki, Azərbaycanın gələcəyi etibarlı əllərdədir və qazandığımız müstəqillik əbədi olacaq. Çünki gənclər güclü bir ideologiya - azərbaycançılıq ideologiyası ətrafında sıx birləşib irəliləyirlər.

Azərbaycançılıq ideyasının gələcəyinə böyük təsir edən digər amil ölkənin müxtəlif xalqları arasında qarşılıqlı hörmətin və birlik ruhunun qorunmasıdır. Bu, Azərbaycanın çoxmillətli bir dövlət kimi sosial və mədəni zənginliyini daha da möhkəmləndirəcək”.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycançılıq ideyasının təbliği” istiqaməti üzrə hazırlanmışdır.

Paylaş:

Baxılıb: 616 dəfə