Baş nazirin müavini Əli Həsənov Bərdədə qaçqın və məcburi köçkünlər üçün salınan yaşayış məhəlləsində tikinti işlərinin gedişi ilə bağlı müşavirə keçirib

Bakı:

23 °C

55 %

4 m/s

AZ RU EN

Ana səhifə / Siyasət / Baş nazirin müavini Əli Həsənov Bərdədə qaçqın və məcburi köçkünlər üçün salınan yaşayış məhəlləsində tikinti işlərinin gedişi ilə bağlı müşavirə keçirib

Baş nazirin müavini Əli Həsənov Bərdədə qaçqın və məcburi köçkünlər üçün salınan yaşayış məhəlləsində tikinti işlərinin gedişi ilə bağlı müşavirə keçirib

22.08.2013 [12:11]

Avqustun 21-də Baş nazirin müavini, Qaçqınların və Məcburi Köçkünlərin İşləri Üzrə Dövlət Komitəsinin sədri Əli Həsənov məcburi köçkünlər üçün salınan yeni yaşayış məhəlləsində tikinti işlərinin gedişi ilə bağlı vəziyyəti öyrənmək məqsədilə Bərdə rayonunda olub.
AzərTAc xəbər verir ki, Baş nazirin müavini yaşayış məhəlləsinin ərazisini gəzərək tikinti işləri ilə yaxından tanış olub, xüsusilə sosial obyektlərin inşası ilə maraqlanıb, görülən işlərə münasibətini bildirib.
Burada inşaatçılarla müşavirə keçirən Ə.Həsənov icraçılara işlərin yüksək keyfiyyətlə və vaxtında başa çatdırılması üçün tapşırıqlar verib.
Qeyd olunub ki, Azərbaycan Respublikasının Prezidenti İlham Əliyevin 2004-cü il 1 iyul tarixli Sərəncamı ilə təsdiq olunmuş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na uyğun olaraq salınan yeni yaşayış məhəlləsində hər biri 5 mərtəbəli olmaqla 15 ədəd yaşayış binası, 540 şagird yerlik məktəb, 280 yerlik uşaq bağçası, həkim məntəqəsi, klub icma mərkəzi, inzibati bina, ATS binası, qazanxana, 2 ədəd transformator yarımstansiyası, yanğın və içməli su anbarları inşa edilib. Binalardakı mənzillərin 70-i bir, 430-u iki, 325-i üç, 45-i dördotaqlıdır. Burada tikinti işləri ilə 20-yə yaxın şirkət məşğul olur.
Hazırda yaşayış massivinin tikintisində tamamlanma işləri sürətlə davam etdirilir. Yaşayış massivində işlərin avqustun sonunadək tam yekunlaşdırılması nəzərdə tutulur. Yeni məhəllədəki mənzillərə Bərdə rayonu ərazisindəki təhsil müəssisələrində müvəqqəti məskunlaşmış ailələr köçürüləcək.
Müşavirədə tikinti şirkətlərinin nümayəndələri görülən işlərlə bağlı məlumat verərək inşaat işlərinin gedişində heç bir problemin yaranmadığını diqqətə çatdırıblar. Yaşayış massivinin qaz, su, kanalizasiya, müasir istilik sistemləri, elektrik təchizatı, daxili yolların çəkilişi, yaşıllıq zonalarının salınması və sair məsələlər ətrafında müzakirələr də aparılıb.
Baş nazirin müavini, Qaçqınların və Məcburi Köçkünlərin İşləri Üzrə Dövlət Komitəsinin sədri Əli Həsənov müşavirəyə yekun vurub.

Paylaş:

Baxılıb: 2085 dəfə