Məcburi köçkünlərin məskunlaşdırılması ölkəmizin qarşısında duran prioritet məsələdir

Bakı:

28 °C

51 %

7 m/s

Əlaqə

AZ RU EN

Ana səhifə / Siyasət / Məcburi köçkünlərin məskunlaşdırılması ölkəmizin qarşısında duran prioritet məsələdir

Məcburi köçkünlərin məskunlaşdırılması ölkəmizin qarşısında duran prioritet məsələdir

06.12.2014 [12:11]

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov tikinti işlərinin gedişi ilə bağlı real vəziyyəti öyrənmək məqsədi ilə dekabrın 5-də Mingəçevir şəhərində məcburi köçkünlər üçün salınan yeni məhəllədə olub.
AzərTAc xəbər verir ki, müvafiq dövlət qurumlarının və tikinti şirkətlərinin nümayəndələri ilə birgə əraziyə baxış keçirən Əli Həsənov köçkün şəhərciyində tikinti işlərinin hazırkı vəziyyəti, indiyədək görülən işlər, nəzərdə tutulan tədbirlərlə maraqlanıb, inşaatçılara işlərin yüksək səviyyədə və vaxtında yerinə yetirilməsi üçün konkret tapşırıqlarını verib.
Baş nazirin müavini Əli Həsənov ərazidə aparılan tikinti işlərinin gedişi ilə yaxından tanış olduqdan sonra inşaat işlərini aparan tikinti şirkətləri rəhbərlərinin arzu və təkliflərini dinləyib və onlara öz tövsiyələrini verib.
Əli Həsənov bildirib ki, Azərbaycan Respublikasının Prezidenti İlham Əliyevin diqqət və qayğısı ilə hər il minlərlə məcburi köçkün ailəsinin mənzil-məişət şəraiti yaxşılaşdırılır. Mingəçevir şəhəri ərazisində salınan bu yaşayış massivi dövlətimizin başçısının müvafiq sərəncamları ilə təsdiq edilən Dövlət Proqramının müvafiq bəndinə əsasən inşa edilir. Bu ilin mayında ərazidə tikinti işlərinə başlanılıb və hazırda binalarda tamamlanma işləri görülür. Binalarda hörgü işləri başa çatdırılıb, fasad hissəsində suvaq, rəngləmə işləri yekunlaşıb, elektrik, su-kanalizasiya xətləri çəkilib, hazırda daxildə təmir-bərpa işləri görülür.
Əli Həsənov işlərin sürətləndirilməsi üçün konkret tapşırıqlar verib, binaların daxilində təmir-bərpa işlərinin tikinti qaydalarına uyğun olaraq yüksək səviyyədə icra olunmasının vacibliyini bildirib. O, tikinti şirkətlərinin rəhbərlərinə işlərin vaxtında və keyfiyyətlə başa çatdırılması üçün əlavə işçilərin cəlb edilməsi üçün tapşırıq verib. Qeyd edib ki, hazırda Dövlət Proqramına uyğun olaraq Mingəçevir şəhərinin, Bərdə, Ağdam, Göygöl, Qaradağ, Beyləqan, Saatlı və Hacıqabul rayonlarının ərazilərində məcburi köçkün ailələri üçün qəsəbə və məhəllələr inşa edilir.
Məcburi köçkünlərin məskunlaşdırılmasının ölkəmizin qarşısında duran prioritet məsələ olduğunu qeyd edən Əli Həsənov bildirib ki, dövlətimizin başçısı qaçqın və məcburi köçkünlərin problemlərini daim diqqət mərkəzində saxlayır və bu məqsədlə qarşıya konkret vəzifələr qoyub. Bu vəzifələrin yüksək səviyyədə həlli istiqamətində Prezident İlham Əliyevin müəyyən etdiyi strategiya, həmçinin dövlətimizin başçısının qaçqınlara və məcburi köçkünlərə diqqət və qayğısından irəli gələn tapşırıqlar vaxtından əvvəl və keyfiyyətlə yerinə yetirilməlidir.
Müşavirədə tikinti şirkətlərinin nümayəndələri inşaat işlərinin gedişində heç bir problemin yaranmadığını diqqətə çatdırıblar və istənilən qədər texnikanın, işçi qüvvəsinin, eləcə də tikinti materiallarının olduğunu bildiriblər.
Qərara alınıb ki, tikinti işlərinin sürətlə aparılması ilə yanaşı, keyfiyyətə də ciddi fikir yetirilməlidir. Yaşayış kompleksi bütün infrastruktur obyektləri ilə birlikdə yüksək keyfiyyətlə təhvil verilməlidir.
Sonda Baş nazirin müavini Əli Həsənov ərazidə olan məcburi köçkünlərlə görüşüb, onların problemlərinin həlli üçün müvafiq tapşırıqlar verib.

Paylaş:

Baxılıb: 807 dəfə