Azərbaycan Mərkəzi Bankının səlahiyyətləri genişləndirilir

Bakı:

13 °C

76 %

9 m/s

Əlaqə

AZ RU EN

Ana səhifə / Siyasət / Azərbaycan Mərkəzi Bankının səlahiyyətləri genişləndirilir

Azərbaycan Mərkəzi Bankının səlahiyyətləri genişləndirilir

11.06.2009 [11:16]

Dünyadakı maliyyə böhranı ilə əlaqədar Azərbaycan Mərkəzi Bankının səlahiyyətləri genişləndirilir. Məsələ ilə bağlı “Mərkəzi Bank haqqında” Qanuna əlavə və dəyişikliklər ediləcək. Bu barədə parlamentin İqtisadi siyasət komitəsinin dünən keçirilən iclasında Mərkəzi Bankın İdarə Heyətinin sədri Elman Rüstəmov məlumat verdi. O qeyd etdi ki, hazırda bütün dünyada qlobal iqtisadi böhran yaşanmaqdadır. Bu böhranın Azərbaycana da təsiri var. Azərbaycan dünyanın böhrana ən davamlı ölkələrindən biri olsa da, prosesin mənfi təsirlərindən tam qaça bilməyib. Buna görə də, hökumət bir sıra məsələlərlə bağlı qabaqlayıcı tədbirlər görür. Böhran şəraitində Mərkəzi Bankın da daha çevik olmasına ehtiyac var. Bununla əlaqədar qanuna bir sıra dəyişikliklər təklif olunur. Məsələn, Mərkəzi Banka səlahiyyətləri çərçivəsində özəl banklara kreditlər vermək hüququ tanınır. Hazırda qüvvədə olan qanunda da Mərkəzi Bank bu hüquqa malikdir. Amma banklara verilən kreditlər ən uzağı 6 ay müddətinə verilə bilər və bu müddət bir dəfə 6 ay müddətinə uzadıla bilər. İndi isə Mərkəzi Bank banklara kreditlərin verilmə müddətini özü müəyyənləşdirəcək.
E.Rüstəmov dedi ki, kreditlərin 6 ay müddətində verilməsi indiki şəraitdə olduqca azdır. Praktikada da bunun yetərli olmadığı üzə çıxır. Mərkəzi Bankın İdarə Heyətinin sədri bildirdi ki, qanuna edilən digər dəyişikliyə əsasən Mərkəzi Bank real sektora maliyyə yardımı göstərmək hüququ qazanır. Onun sözlərinə görə, böhran dövründə ölkədə bir sıra sahələrə ciddi maliyyə dəstəyinin verilməsinə ehtiyac yaranıb. Mərkəzi Bank rəsmisi dedi ki, Azərbaycanın 2010-cu il üçün iqtisadi proqnozları post-böhran dövrü şərtlərinə uyğun hazırlanacaq. Görülən bütün tədbirlər iqtisadiyyatın böhrandan çıxarılmasına hesablanacaq. ölkənin gələn il üçün müəyyənləşdirilən pul-kredit siyasəti də məhz bu xarakterli olacaq. Artıq indidən bu dövrdə hansı addımların atılacağı dəqiqləşdirilir. Hökumət post-krizis dövründə pul-kredit siyasətinin əhəmiyyətli dərəcədə yumşaldılması siyasətini davam etdirəcək. Eyni zamanda, sahibkarlığa geniş şəkildə dəstək veriləcək. İxrac xarakterli qeyri-neft sektoruna diqqət artırılacaq. “Bunun üçün lazımi mexanizm yaratmalıyıq” - deyə Mərkəzi Bankın rəhbəri vurğuladı.
Müzakirələrdən sonra qanun layihəsi Milli Məclisin plenar iclasına tövsiyə edildi.
Nardar BAYRAMLI

Paylaş:

Baxılıb: 1361 dəfə