"Siyasi partiyalar haqqında" yeni qanun layihəsi Milli Məclisin payız sessiyasında müzakirəyə çıxarılacaq

Bakı:

14 °C

77 %

10 m/s

AZ RU EN

Ana səhifə / Siyasət / "Siyasi partiyalar haqqında" yeni qanun layihəsi Milli Məclisin payız sessiyasında müzakirəyə çıxarılacaq

"Siyasi partiyalar haqqında" yeni qanun layihəsi Milli Məclisin payız sessiyasında müzakirəyə çıxarılacaq

10.08.2009 [23:53]

Siyavuş Novruzov: Yeni qanunu hazırlamaqda məqsəd həm də siyasi partiyaların fəaliyyətində və maliyyələşdirilməsində şəffaflığın təmin olunmasıdır
“Siyasi partiyalar haqqında” Qanunun bir çox müddəaları Konstitusiyaya, Seçki Məcəlləsinə və digər qanunlara, eləcə də müasir standartlara uyğun gəlmədiyi üçün ictimai-siyasi prosesləri özündə ehtiva edən yeni layihə hazırlanır. Yeni qanunda siyasi partiyaların qeydiyyatı, maliyyələşdirilməsi, fəaliyyəti, seçkilərdə iştirakı, cəmiyyətdəki rolu, beynəlxalq əməkdaşlığı və digər məsələlər öz əksini tapacaq.
Yeni Azərbaycan Partiyası İcra katibinin müavini, Milli Məclisin deputatı Siyavuş Novruzovun sözlərinə görə, yeni qanunu hazırlamaqda məqsəd həm də siyasi partiyaların fəaliyyətində və maliyyələşdirilməsində şəffaflığın təmin olunmasıdır. ölkəmizin iqtisadi potensialı, artan büdcə xərcləri imkan verir ki, qeyri-hökumət təşkilatları və mətbuatın inkişafına ayrılan dövlət yardımı siyasi partiyalara da şamil edilsin. Bu maliyyələşmənin mexanizmi isə yeni qanunla tənzimlənəcək.
S.Novruzov deyib ki, yeni qanunu hazırlamaqda əsas məqsədlərdən biri də ayrı-ayrı dövlətlərin bu və ya digər şəkildə belə qurumlardan maliyyə vəsaitləri ilə öz maraqları üçün istifadə etmələrinin qarşısını almaqdır. Azərbaycan dövlətinin kifayət qədər iqtisadi potensialı var. Bu iqtisadi potensialdan istifadə edərək siyasi partiyalar dövlətdən maliyyə yardımı almalıdır.
Siyasi partiyaların qeydiyyatı məsələsi də günün tələblərinə cavab vermir. İnkişaf etmiş Avropa ölkələrinin təcrübəsinə görə, fəaliyyət göstərməyən, seçkidə iştirak etməyən, qarşısına qoyduğu vəzifəni yerinə yetirməyən siyasi partiyaların fəaliyyətinə xitam verilir. Bu baxımdan layihə hazırlanarkən siyasi qurumların fəaliyyətinin daim gündəmdə olması məsələsi də nəzərə alınıb.
Azərbaycan Milli Məclisinin NATO PA-dakı nümayəndə heyətinin üzvü Siyavuş Novruzov, həmçinin, deyib ki, NATO Parlament Assambleyasının (PA) növbəti sessiyası cari ilin noyabrında Şotlandiyanın Edinburq şəhərində keçiriləcək: “NATO ilə Azərbaycanın çox yaxın əlaqələri vardır və biz bir çox məsələlərdə olduqca səmərəli əməkdaşlıq edirik. NATO-nun bütün proqramlarında həm dövlət strukturları, həm də parlament yaxından iştirak edir”.
S.Novruzov bildirib ki, növbəti sessiyada müzakirəsi yarımçıq qalan məsələlərə baxılacaq və digər problemlərə toxunulacaq. Sessiyanın gündəliyi sentyabrda təsdiq olunacaq.

Paylaş:

Baxılıb: 1187 dəfə