Ermənistan müharibə cinayətlərini davam etdirir

Bakı:

22 °C

76 %

11 m/s

Əlaqə

AZ RU EN

Ana səhifə / Siyasət / Ermənistan müharibə cinayətlərini davam etdirir

Ermənistan müharibə cinayətlərini davam etdirir

28.10.2020 [08:47]

İşğalçı ölkənin hərbi-siyasi rəhbərliyinin uşaqları hərbi əməliyyatlara cəlb etməsi faşist və terrorçu siyasətin bariz nümunəsidir
Döyüş meydanında Azərbaycan Ordusunun qarşısında aciz və çıxılmaz vəziyyətə düşmüş Ermənistan silahlı birləşmələrində insan resurslarının çatışmazlığı, əsgər azlığının hökm sürməsi sirr deyil. Bunun nəticəsidir ki, Ermənistanın hərbi-siyasi rəhbərliyi ölkənin ortayaşlı və qoca sakinləri ilə yanaşı, artıq yeniyetmələri və uşaqları da Dağlıq Qarabağda gedən hərbi əməliyyatlara cəlb edir. Beləliklə, Ermənistanın uşaq hüquqlarının qorunması ilə bağlı beynəlxalq qanunları, o cümlədən BMT-nin, UNICEF-in, Paris konvensiyasının prinsip və normalarını pozması bir daha ortaya çıxır.
Məsələ ilə bağl fikirlərini bölüşən Milli Məclisin deputatı Sədaqət Vəliyeva bildirib ki, Ermənistan artıq uzun illərdir ki, beynəlxalq hüququn tələblərini pozmaqda, Cenevrə konvensiyasına zidd addımlar atmaqda davam edir. Millət vəkili ötən müddət ərzində Azərbaycanın şəhər və rayonlarına edilən silsilə raket hücumları nəticəsində 10-u uşaq olmaqla 65 mülki şəxsin həlak olduğunu, 300-dən çox dinc sakinin yaralandığını vurğulayıb. Onun sözlərinə görə, Ermənistanın faşist rejiminin Azərbaycana qarşı həyata keçirilən hərbi əməliyyatlara 15 yaşına çatmayan uşaqları da cəlb etməsi Paşinyan rejiminin təcavüzkarlıq, işğalçılıq mahiyyətini bir daha açıq şəkildə göstərir: “Yetkinlik yaşına çatmayanların topçulara kömək etməsi, qız uşaqlarının məcburi qaydada avtomat tutmağa cəlb edilməsi beynəlxalq hüququn pozulmasıdır, cinayətdir. Ermənistanın faşist rejimi 15 yaşına çatmayan uşaqları hərbi əməliyyatlara cəlb etməklə təkcə Cenevrə konvensiyasının müvafiq bəndlərini deyil, eyni zamanda, BMT-nin Baş Assambleyasının 1989-cu il noyabrın 20-də keçirilmiş 44-cü sessiyasında qəbul edilən Uşaq Hüquqları haqqında Konvensiyanın 38-ci maddəsini də kobud şəkildə pozur. Konvensiya iştirakçı dövlətləri silahlı münaqişələr zamanı uşaqlara aidiyyəti olan beynəlxalq humanitar hüquq normalarına ciddi riayət etməyə çağırır. Lakin Ermənistanın uşaqları hərbi əməliyyatlara açıq şəkildə cəlb etməsi bir daha onu göstərir ki, işğalçı dövlət beynəlxalq hüququn heç bir prinsipinə hörmət etmir və özünün beynəlxalq öhdəliklərinə etinasız yanaşır. Əgər dünya Ermənistanın timsalında daha utandırıcı faktlar görmək istəmirsə, Paşinyan rejiminin beynəlxalq hüquqa zidd hərəkətlərinə lazımı qiymət verməli, onu cəzalandırmalı, sanksiyalara məruz qoymalıdır”.
Milli Məclisin deputatı Vüqar İskəndərov da rəşadətli ordumuz qarşısında tab gətirə bilməyən işğalçı Ermənistanın dinc, mülki insanlara, o cümlədən uşaqlara qarşı terror həyata keçirməsinin bu ölkənin faşist mahiyyətindən xəbər verdiyini bildirib. Millət vəkili qeyd edib ki, təcavüzkar dövlət, eyni zamanda, uşaqlara qarşı cinayətlər törədir. Belə ki, Ermənistanın hərbi-siyasi rəhbərliyi ölkənin ortayaşlı və qoca sakinləri ilə yanaşı, yeniyetmələri də Dağlıq Qarabağda gedən hərbi əməliyyatlara cəlb edib: “İşğalçı ölkə rəhbərliyinin beynəlxalq konvensiyaları və normaları kobud şəkildə pozmasını sübut edən videogörüntülər sosial şəbəkələrdə yayılıb və bu Ermənistan hakimiyyəti adına çox utancvericidir. Görüntülərdə erməni hərbçilərinin 12-13 yaşlı yeniyetmələrdən istifadə etdiyi əks olunur. Dünya birliyi, heç olmasa, indi hərəkətə keçməli, Beynəlxalq Cinayət Məhkəməsinin (Roma) və Cenevrə konvensiyalarının tələblərini pozan Ermənistan hökuməti tərəfindən verilən, insanlığa zidd olan müharibə cinayətlərini özündə əks etdirən qərarlara hüquqi qiymət verməli, onların məsuliyyətini müəyyənləşdirməlidir”.
Deputat onu da əlavə edib ki, işğalçı Ermənistanın cəbhədə acınacaqlı məğlubiyyətə uğraması nəticəsində bu ölkənin daxilində ruh düşkünlüyü və mənəvi deqradasiya ən yüksək həddə çatıb. Bu gün erməni valideynləri öz övladlarını Qarabağda döyüşə göndərməmək üçün bütün yollara əl atırlar.
Pərviz SADAYOĞLU

Paylaş:

Baxılıb: 504 dəfə