Destruktiv fəaliyyət kimin əleyhinədir?

Bakı:

12 °C

87 %

6 m/s

Əlaqə

AZ RU EN

Ana səhifə / Siyasət / Destruktiv fəaliyyət kimin əleyhinədir?

Destruktiv fəaliyyət kimin əleyhinədir?

06.06.2023 [10:20]

XİN-dən Qriqoryana xəbərdarlıq

Nardar BAYRAMLI

Ermənistanın Təhlükəsizlik Şurasının katibi Armen Qriqoryan iyunun 4-də yerli İctimai Televiziyaya verdiyi müsahibədə sülh prosesi ilə bağlı qeyri-konstruktiv mövqe nümayiş etdirib. Bölgədə yaranan yeni geosiyasi vəziyyətlə barışmaq istəməyən Qriqoryanın erməni cəmiyyətinə verdiyi mesajlar sülh müqaviləsinin sual altında olmasını göstərir. Azərbaycanın öz suveren ərazisində sərhəd-keçid məntəqəsinin quraşdırmasından tutmuş, kommunikasiyaların açılmasına, delimitasiya və demarkasiyanın aparılmasına toxunan A.Qriqoryan sülh sazişinin imzalanması perspektivinə də toxunub: “Danışıqlar intensiv gedir. Əgər biz bu kursu davam etdirə bilsək və beynəlxalq ictimaiyyətdən dəstək olarsa, ilin sonunda sülh sazişinin bağlanması mümkündür”.

Qriqoryanın əsassız iddiaları

Ermənistan Təhlükəsizlik Şurasının katibinin Laçın yolu ilə bağlı söylədikləri Azərbaycanın ərazi bütövlüyünə ziddir. Azərbaycan suveren ölkədir və sərhədlərinə də özü nəzarət edir. Üçüncü ölkənin Azərbaycanın daxili işlərinə qarışması beynəlxalq hüquqla yolverilməzdir. Qriqoryan Azərbaycan-Ermənistan sərhədinin Laçın rayonu ərazisindən keçən hissəsində sərhəd-keçid məntəqəsinin quraşdırılmasını qəbul etmək istəmir və bəzi iddialar irəli sürür. O, Ermənistanın Qarabağda və Laçın yolunda beynəlxalq ictimaiyyətin iştirakının tərəfdarı olduğunu iddia edib.

A.Qriqoryanın bu iddialarına Azərbaycanın Xarici İşlər Nazirliyinin cavabı özünü çox gözlətməyib. Bununla bağlı nazirliyin bəyanatında deyilir ki, Ermənistan Təhlükəsizlik Şurasının katibi Armen Qriqoryanın İctimai Televiziyaya müsahibəsi zamanı növbəti dəfə bir sıra istiqamətlərdə məsələlərin mahiyyətini təhrif etməsi, Ermənistanın üzərinə götürdüyü öhdəliklərdən yayınmaqla həm beynəlxalq ictimaiyyət arasında, həm də Ermənistan cəmiyyətində çaşqınlıq yaratmaq cəhdləri qəbuledilməzdir. Əvvəlcə, Qriqoryanın delimitasiya prosesinin hansı əsasda aparılması ilə bağlı iddiası ilə əlaqədar qeyd edilib ki, həm Praqa, həm də Soçi görüşü üzrə bəyanatlara əsasən delimitasiyanın ərazi bütövlüyünün və suverenliyin qarşılıqlı tanınması əsasında həyata keçirilməsi nəzərdə tutulub. Ümumiyyətlə, bu bəyanatlarda BMT Nizamnaməsinə və “Alma-Ata bəyannamə”sinə istinad qeyd edilən prinsiplər kontekstində verilib. Bu və digər bir görüşdə delimitasiyanın hansısa xəritə əsasında həyata keçirilməsi barədə hər hansı bir razılıq olmadığı Ermənistan tərəfinə yaxşı məlumdur.

1975-ci il xəritəsinin əvəzinə...

Bəyanatda vurğulanıb ki, beynəlxalq təcrübəyə əsasən, Ermənistandan fərqli olaraq Azərbaycanın indiyə qədər bəzi qonşuları ilə həyata keçirdiyi delimitasiya prosesi xüsusi olaraq seçilmiş xəritə əsasında deyil, bütün hüquqi əhəmiyyəti olan sənədlərin təhlili və nəzərdən keçirilməsi əsasında həyata keçirilib: “Bu təcrübənin Ermənistanla da tətbiq edilməsi mümkündür. Bu xüsusda, Ermənistan tərəfinin 1975-ci il xəritəsinə xüsusi istinad edilməsini təkid etməsi əvəzinə, delimitasiya işinə başlaması daha faydalı olardı. 2020-ci il Vətən müharibəsindən sonra ölkəmizin Ermənistanla sərhədlərin delimitasiya olunması təklifinə uzun müddət heç bir cavab verməyən tərəfin də məhz Ermənistan olduğu unudulmamalıdır. 30 ilə yaxın bir dövrdə Azərbaycan ərazilərini işğal altında saxlayan, Azərbaycanın 8 kəndini hələ də işğal edən, əldə edilmiş yazılı və şifahi razılıqlara baxmayaraq qüvvələrini Azərbaycan ərazisindən tam çıxarmayan, 8 kəndin Azərbaycana qaytarılmasını müxtəlif bəhanələrlə ləngidən, eləcə də hərbi təxribatlarını davam etdirən Ermənistanın Azərbaycanı Ermənistana qarşı təcavüzdə təqsirləndirməsi tamamilə əsassızdır. Üçtərəfli bəyanatın müddəalarına zidd olaraq erməni silahlı qüvvələrinin ötən ilin sentyabr ayında Azərbaycan ərazisindən çıxarılacağını bəyan edən Armen Qriqoryanın, bu bəyanatla Azərbaycana qarşı təcavüz aktlarını necə davam etdirdiklərini təsdiq etməsini də hər kəs yaxşı xatırlayır. Bu çərçivədə, Ermənistanın sülh prosesinə sadiq olduğunu populistcəsinə bəyan etməsi heç bir məntiqə sığmır”.

Laçın yolunun bağlanmasını iddia etmək gülüncdür

Bildirilir ki, A. Qriqoryanın müsahibə zamanı guya Azərbaycanın saxlanılan ermənilərdən 10 nəfəri azad etməyə söz verdiyini bildirməsi, əslində Ermənistan tərəfinin beynəlxalq humanitar hüquqa və humanizm prinsiplərinə məhəl qoymaması, ölkəmizin erməni əsirlərinin, xüsusilə də yolu azaraq sərhədi keçmiş 10-dan artıq erməni hərbçinin qeyd-şərtsiz dərhal geri qaytarılması üzrə etimad quruculuğu tədbirlərinə Ermənistanın qarşılıq verməməsi kimi əməllərini ört-basdır etmək niyyətini göstərir. Ermənistan tərəfinin üçtərəfli Bəyanatın 9-cu bəndinə zidd olaraq, hələ də Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsini bərpa etməməsi, müxtəlif bəhanələrlə prosesi uzatması, Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşasını təmin etmək əvəzinə siyasi polemikaya yol açması Ermənistanın prosesə maneçiliyinin bariz nümunəsidir.

Eləcə də, Laçın sərhəd-buraxılış məntəqəsindən gün ərzində onlarla erməni sakinlərin müvafiq prosedurlara əməl etməklə hər iki istiqamətdə sərbəst şəkildə keçməsini həzm edə bilməyən Ermənistan rəsmisinin Laçın yolunun bağlanmasını iddia etməsi gülüncdür. Bununla yanaşı, erməni sakinlərin reinteqrasiyası məsələsinə müdaxiləyə dərhal son qoyulması, Ermənistanın sözdə deyil əməldə Azərbaycanın ərazi bütövlüyü və suverenliyinə hörmət etməsinin göstəricisi olardı.

Bölgədə sülh prosesinin inkişafı əvəzinə, Ermənistanın rəsmi şəxsinin ölkəsinin yeni silahlanma dövrünə qədəm qoyduğunu bəyan etməsi, bu ölkənin hələ də tarixdən dərs çıxarmadığını nümayiş etdirir. Əldə edilmiş razılıqları yanlış şərh edərək, öz öhdəliklərindən boyun qaçırmaq istəyən Ermənistan tərəfinə xatırladılıb ki, bu destruktiv fəaliyyət bölgədə sülhün bərpasına xidmət etməməklə yanaşı, ilk növbədə Ermənistanın əleyhinədir.

Paylaş:

Baxılıb: 547 dəfə