Paşinyan devrilir?

Bakı:

23 °C

58 %

5 m/s

Əlaqə

AZ RU EN

Ana səhifə / Siyasət / Paşinyan devrilir?

Paşinyan devrilir?

13.09.2023 [11:12]

“Tələbələr” Qarabağı tərk edirlər...

N.BAYRAMLI

Ermənistanın Qarabağda olan qeyri-qanuni hərbi birləşmələrinin üzvləri “tələbə” adı ilə kütləvi şəkildə Xankəndini tərk edir. Bugünlərdə Laçın sərhəd-buraxılış postundan Beynəlxalq Qızıl Xaç Komitəsinin nümayəndələrinin əhatəsində olan bu “gənclər” “tələbə” olduqlarını və İrəvan Dövlət Universitetinə dərsə tələsdiklərini iddia ediblər. Lakin ən azı onların zahiri görünüşü və yaş həddi tələbə olmadıqlarını deməyə əsas verir.

Maraqlıdır ki, həmin hərbçilərin gizlincə və mülki formada “tələbə” adı ilə Qarabağdan çıxarılmasını kim təşkil edib? Bu barədə iki ehtimal irəli sürülür. Birincisi, bəzi KİV-lər məlumat verib ki, onlar Paşinyanın Dilicandan olan həmyerliləridir və bu səbəbdən baş nazir bölgədə mövcud gərginlik fonunda öz həmyerlilərinin həyatını xilas etmək üçün bu addımı atıb. Amma digər ehtimal daha inandırıcıdır. Bu da Paşinyanın hakimiyyətdən devrilməsi üçün planın tərkib hissəsi olmasından ibarətdir. Nəzərə alaq ki, Paşinyan hakimiyyəti ilə Rusiya arasında qarşıdurma açıq müstəviyə keçib və erməni mediasında Moskvanın Ermənistanda hakimiyyət dəyişikliyi etməyə çalışdığı bildirilir. Hətta Rusiyanın Ermənistandakı “Vaqner” qruplaşmasını aktivləşdirdiyi və hakimiyyətə qarşı addımlarda istifadə edəcəyi iddiaları yayılır. O da məlumdur ki, rəsmi Moskva Ermənistan-ABŞ birgə hərbi təlimlərinin keçirilməsinə də sərt reaksiya verib.

Bütün bunların fonunda Ermənistanda hakimiyyət dəyişikliyinin yenə də “Qarabağ kartı” üzərindən həyata keçirilməsi versiyası səsləndirilir. Belə ki, Qarabağda separatçıların rəhbərliyinin dəyişməsi, Paşinyanın adamı kimi tanınan Araik Arutyunyanın “istefaya” məcbur edilməsi və Bako Saakyanın yaxın adamı kimi tanınan Samvel Şahramanyanın separatçılara rəhbər “seçilməsi” həmin ehtimalı gücləndirir.

Digər tərəfdən, Rusiyanın Qarabağa xüsusi missiya ilə göndərdiyi milyarder Ruben Vardanyan da Ermənistanda hakimiyyət dəyişikliyinə dəstək verəcəyini açıq şəkildə elan edib. Onun sözlərinə görə, hazırda Ermənistanı idarə edənlər səriştəsizdirlər, nə etdiklərini başa düşmürlər, təcrübələri yoxdur və öyrənmək istəmirlər: “Bəli, mən bütün “sağlam qüvvələr”lə birləşməyə və Ermənistanda hakimiyyətin tezliklə dəyişdirilməsini dəstəkləməyə hazıram”. Bu, o deməkdir ki, Ruben Vardanyan Ermənistanda dövlət çevrilişinə çağırış edir. Vaxtilə Paşinyanın adamı olan Arayik R.Vardanyanı “dövlət naziri” vəzifəsindən azad etsə də, onu Qarabağdan çıxara bilmədi. Buna əsas səbəb isə separatçıların Rusiya ilə münaqişəyə girməyə cəsarət etməməsi olub. Çünki yaxşı anlayırlar ki, Rusiya sülhməramlı kontingenti olmasa, Qarabağda bir dəqiqə də qala bilməzlər.

Əlbəttə, Paşinyan hakimiyyəti özü üçün yaranmış təhlükəni yaxşı anlayır. Bu səbəbdən də, Qərblə əlaqələrini daha da gücləndirmək istəyir. Avropa İttifaqının monitorinq missiyasının patrul sayını artırması, KTMT-nin üzvü olduğu halda Ermənistanda ABŞ-la birgə təlim keçirilməsi, Fransanın bu ölkədə fəallaşması da buna dəlalət edir. Lakin Ermənistan müxalifəti də yerində dayanmır və hakimiyyətə qarşı mübarizəni daha da gücləndirməyə çalışır. Burada siyasi mübarizənin hərbi çevrilişlə nəticələnməsi əsas hədəflərdən biridir. Qarabağdakı “tələbələrin” Ermənistana çağırılması da bu planın tərkib hissəsi ola bilər.

Paylaş:

Baxılıb: 616 dəfə