“Sumqayıt 1988: Cinayət və cəza” kitabında ermənilərin Azərbaycanın bu şəhərində törətdikləri kütləvi iğtişaşların səbəb və nəticələri əksini tapıb

Bakı:

17 °C

63 %

9 m/s

AZ RU EN

Ana səhifə / Sosial / “Sumqayıt 1988: Cinayət və cəza” kitabında ermənilərin Azərbaycanın bu şəhərində törətdikləri kütləvi iğtişaşların səbəb və nəticələri əksini tapıb

“Sumqayıt 1988: Cinayət və cəza” kitabında ermənilərin Azərbaycanın bu şəhərində törətdikləri kütləvi iğtişaşların səbəb və nəticələri əksini tapıb

01.03.2014 [11:40]

Fevralın 28-də Azərbaycan Milli Elmlər Akademiyasının (AMEA) Rəyasət Heyətinin binasında Azərbaycan Respublikası Prokurorluğunun təşkilatçılığı ilə hazırlanmış “Sumqayıt 1988: Cinayət və cəza” kitabının təqdimatı keçirilib.
AzərTAc xəbər verir ki, Azərbaycan Respublikası Prokurorluğu və Xarici İşlər Nazirliyi ilə birgə təşkil olunmuş tədbiri AMEA-nın prezidenti, akademik Akif Əlizadə açaraq Sumqayıt hadisələrinin gerçək mahiyyətinin üzə çıxarılmasının və dünya ictimaiyyətinə təqdim olunmasının ümummilli dövlət maraqlarının strateji əhəmiyyətindən danışıb.
Akademik xüsusi vurğulayıb ki, bu gün dünyanın diqqətinin Qarabağ həqiqətləri və Xocalı soyqırımına yönəldiyi bir vaxtda xalqımıza qarşı əks-təbliğat vasitəsi kimi istifadə olunan Sumqayıt hadisələrinin gerçək üzünün beynəlxalq ictimaiyyətə çatdırılması hüquq mühafizə orqanları işçiləri ilə yanaşı, alimlərin, tarixçilərin, hüquqşünasların da üzərinə böyük məsuliyyət qoyur. Bu baxımdan, tədqiqatçı jurnalist-alimlər Ramazan Məmmədov və Eyruz Məmmədov tərəfindən yazılan və üç dildə işıq üzü görən “Sumqayıt 1988: Cinayət və cəza” kitabı xüsusi əhəmiyyətə malikdir.
Təqdimat mərasimində Azərbaycan Respublikası baş prokurorunun birinci müavini Rüstəm Usubovun mövzu ilə bağlı məruzəsi dinlənilib. Qeyd edilib ki, kitabın hazırlanmasının əsas məqsədi Sumqayıt hadisələri haqqında həqiqətləri dünya ictimaiyyətinə çatdırmaqdır. Kitabda əsasən 1988-ci ilin fevralında baş vermiş Sumqayıt hadisələrinə gətirib çıxaran səbəblər, onu törədənlər, təşviq edən qruplar haqqında materiallar yerləşdirilməklə yanaşı, müəlliflər hadisələri sifariş verən və təşkil edən qüvvələrin izlərinin respublikanın hüdudlarından kənara çıxdığını göstərməyə çalışıblar.
Rüstəm Usubov deyib ki, uzun illər ərzində erməni tərəfi öz separatçı və işğalçı siyasətinə, Xocalı soyqırımına və Azərbaycan torpaqlarında törətdikləri terror və digər cinayətlərə bəraət qazandırmaq üçün Sumqayıt hadisələrinə istinad edib.
Xüsusi vurğulanıb ki, cinayətin təşkilatçılarını məsuliyyətə cəlb etmək üçün müvafiq beynəlxalq orqanlara müraciət edilməsi və bunun üçün hüquqi əsasların müəyyən olunması məqsədilə Azərbaycan Respublikasının Prezidenti İlham Əliyevin tapşırığı ilə Baş Prokurorluq Sumqayıt şəhərində törədilmiş kütləvi iğtişaşlarla bağlı cinayət işləri üzrə istintaqı təzələyib və istintaqın hərtərəfli aparılması üçün baş prokurorun birinci müavininin rəhbərliyi ilə Baş Prokurorluğun, Milli Təhlükəsizlik və Daxili İşlər nazirliklərinin təcrübəli əməkdaşlarından ibarət istintaq-əməliyyat qrupu yaradılıb.
Aparılmış istintaq nəticəsində Sumqayıt hadisələrinin həqiqi mahiyyəti üzə çıxıb, bu hadisələrin əsas sifarişçi və təhrikçiləri Mixail Qorbaçov, sovet rəhbərliyində təmsil olunmuş ermənipərəst dairələr və “Böyük Ermənistan” xülyası ilə yaşayan erməni millətçi və separatçı qüvvələrinin olması müəyyən edilib.
Daha sonra akademik İsa Həbibbəyli, kitabın həmmüəllifləri Ramazan Məmmədov, Eyruz Məmmədov, professor Gövhər Baxşəliyeva, AMEA-nın müxbir üzvü Rafael Hüseynov, Xarici İşlər Nazirliyinin şöbə müdiri Hikmət Hacıyev və başqaları çıxış edərək kitabın ərsəyə gəlməsinin əhəmiyyətli və eyni zamanda, gərgin bir fəaliyyətin məntiqi nəticəsi olduğunu qeyd etməklə, nəşrin Azərbaycan xalqının və dövlətinin milli maraqlarına xidmət edən əsər olmasını xüsusi vurğulayıblar.
Təqdimat mərasimində Xarici İşlər Nazirliyinin mətbuat xidmətinin rəhbəri Elman Abdullayev təmsil etdiyi qurumun, o cümlədən Azərbaycanın xarici diplomatik korpuslarının Sumqayıt hadisələrinin reallıqlarını dünya ictimaiyyətinə çatdırmaq istiqamətində həyata keçirdikləri işlərdən ətraflı danışıb.
Təqdimatı keçirilən kitabla bağlı geniş müzakirələr aparılıb, suallar ətraflı cavablandırılıb.
Vurğulanıb ki, bu kitab ölkəmizin müasir tarixini, o cümlədən Ermənistan-Azərbaycan, Dağlıq Qarabağ münaqişəsinin səbəblərini tam reallıqları ilə əks etdirir.

Paylaş:

Baxılıb: 2265 dəfə