Yeni mərhələ…

Bakı:

19 °C

77 %

2 m/s

Əlaqə

AZ RU EN

Ana səhifə / YAP xəbərləri / Yeni mərhələ…

Yeni mərhələ…

17.03.2023 [11:36]

Azərbaycanın Avropa İttifaqı, eyni zamanda, quruma üzv ölkələrlə əlaqələrinin yüksələn xətlə inkişaf etdiyi göz qabağındadır. Bu baxımdan Azərbaycan Prezidenti İlham Əliyevin martın 13-14 tarixlərində Almaniyaya işgüzar səfəri, səfər çərçivəsində keçirdiyi görüşlər, müzakirə olunan məsələlər diqqətdən kənarda qalmır. Ümumilikdə Azərbaycanın xarici siyasəti çoxşaxəlidir. Dəyişməz prinsipləri beynəlxalq münasibətlər sistemində yeri və rolunun artmasında əhəmiyyətli rol oynayır.

Dövlət başçısı İlham Əliyevin Berlində Almaniya Federativ Respublikasının Prezidenti Frank-Valter Ştaynmayer və Almaniya Federativ Respublikasının Kansleri Olaf Şolts ilə təkbətək, eyni zamanda, geniş tərkibdə görüşləri, müzakirə olunan məsələlər Azərbaycan-Almaniya münasibətlərinin gələcək inkişafı barədə aydın təsəvvür yaradır. Bu görüşlərdən sonra cənab İlham Əliyev ilə Almaniya Federativ Respublikasının Kansleri Olaf Şoltsin keçirdikləri birgə mətbuat konfransı səfərin mahiyyətinin və əməkdaşlıq əlaqələrinin genişləndirilməsi üçün müəyyənləşdirilən hədəflərin açıqlanmasında yardımçı oldu. Olaf Şolts bu fikri xüsusi qeyd etdi ki, Azərbaycan həm Almaniya, həm Avropa İttifaqı üçün əhəmiyyəti artan tərəfdaşdır. Ölkəmizin həm Almaniyanın, həm də Avropa İttifaqının enerji təchizatı üçün böyük potensialı mövcuddur. Azərbaycan öz töhfəsini verə bilər və eyni zamanda, bərpaolunan enerji də əməkdaşlığımızın bir mövzusudur.

Göründüyü kimi, Almaniya Azərbaycanı Cənubi Qafqazda vacib tərəfdaş kimi qəbul edir, ölkəmizin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəkləyir. Almaniya Federativ Respublikasının Kansleri Olaf Şolts bu fikri də xüsusi vurğuladı ki, beynəlxalq səviyyədə Almaniya öz fikrini bildirdi və Dağlıq Qarabağı respublika kimi tanımadı. Yəni, bununla da öz mövqeyini bildirmiş oldu.

Ölkəmizin ədalətə və beynəlxalq hüquqa söykənən siyasəti Azərbaycan-Almaniya əlaqələrinin müxtəlif istiqamətlər üzrə inkişafında öz sözünü deyir. Dövlət başçısı İlham Əliyev bildirdi ki, səfər zamanı apardığımız danışıqlar Almaniya ilə Azərbaycan arasında əlaqələrin yüksək səviyyədə olduğunu, siyasi dialoqun müntəzəm olaraq aparıldığını göstərdi. Belə bir əminlik ifadə edildi ki, səfər ikitərəfli münasibətlərimizə çox böyük töhfə verəcək.

Azərbaycanla Almaniya arasında iqtisadi əlaqələr yüksək səviyyədədir. Dövlət başçısı İlham Əliyevin Almaniyanın aparıcı şirkətlərinin rəhbərləri ilə görüşündə mövcud imkanlar geniş müzakirə edilərək əlaqələrin gələcək inkişafında rolu diqqətə çatdırıldı.

Ümumilikdə Prezident İlham Əliyevin Almaniyaya işgüzar səfəri iki ölkə arasında münasibətlərin daha da gücləndirilməsi və əməkdaşlığın genişləndirilməsi baxımından mühüm əhəmiyyət kəsb edir. Azərbaycanla Almaniya arasında münasibətlər yeni inkişaf mərhələsinə qədəm qoydu.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 649 dəfə