Multikulturalizm Mərkəzində Holokost qurbanları anılıb

Bakı:

15 °C

72 %

5 m/s

Əlaqə

AZ RU EN

Ana səhifə / Xəbər lenti / Multikulturalizm Mərkəzində Holokost qurbanları anılıb

Multikulturalizm Mərkəzində Holokost qurbanları anılıb

27.01.2025 [15:37]

Yanvarın 27-də Bakı Beynəlxalq Multikulturalizm Mərkəzində “Holokost soyqırımı müasirlərin gözü ilə” mövzusunda dəyirmi masa keçirilib. Tədbirdə İsrailin Azərbaycandakı səfiri Corc Dik, Azərbaycanda fəaliyyət göstərən milli və dini icmaların rəhbərləri və universitet müəllimləri iştirak ediblər.

Əvvəlcə ölkəmizin suverenliyi, müstəqilliyi və ərazi bütövlüyü uğrunda mübarizədə şəhid olmuş Azərbaycanın qəhrəman övladlarının, Xocalı soyqırımı və Holokost qurbanlarının xatirəsi bir dəqiqəlik sükutla yad edilib.

Tədbirin moderatoru, BBMM-nin icraçı direktoru Rəvan Həsənov dəyirmi masanı giriş sözü ilə açaraq Holokostun insanlığa, bəşəriyyətə qarşı törədilən dəhşətli cinayətlərdən biri olduğunu qeyd edib. Tarixin müxtəlif dövrlərində Azərbaycan xalqına qarşı da soyqırımı törədildiyini xatırladan icraçı direktor vurğulayıb ki, biz nə Holokostu, nə də Xocalını unutmayacağıq. İslamofobiyanın, antisemitizmin bəzi Avropa ölkələrində geniş yayılmasının təəssüf doğurduğunu dilə gətirən Rəvan Həsənov din və azadlıq amillərinin siyasiləşdirilməsinin yolverilməz olduğunu qeyd edib. O, Azərbaycanda güclü yəhudi irsinin mövcud olduğunu, ölkəmizdə yəhudilərin sərbəst və müstəqil şəkildə yaşadıqlarını deyib. Bildirib ki, ölkəmizdə yaşayan yəhudilər Azərbaycanın azadlığı uğrunda mübarizədə canlarından keçiblər. R.Həsənov diqqətə çatdırıb ki, tarixin qaranlıq məqamlarında yaşanmış hadisələr axıra qədər davam etməməlidir. İnsanlıq və gələcək naminə birgəyaşayış, dinc yanaşma mütləqdir.

İsrailin ölkəmizdəki səfiri Corc Dik bildirib ki, bu gün tədbir iştirakçıları Holokost soyqırımı nəticəsində həlak olan yəhudiləri və nasist zülmünün bütün qurbanlarını xatırlamaq üçün toplaşıblar. Belə hadisələri unutmamaqla biz onların təkrarlanmamasına nail ola bilərik. O, həmçinin İkinci Dünya müharibəsində həyatını itirən 300 mindən çox azərbaycanlının xatirəsini də ehtiramla yad etdiklərini bildirib. Səfir diqqətə çatdırıb ki, Azərbaycan regionda bütün dinlərə mənsub insanların harmoniya və azadlıq şəraitində necə birlikdə yaşaya biləcəyini göstərən mayakdır. O, İsrail xalqı adından Azərbaycana təşəkkür edib.

Tədbirdə çıxış edən Azərbaycandakı Dağ Yəhudiləri İcmasının rəhbəri Milix Yevdayev, Avropa Yəhudilərinin Bakı Dini İcmasının rəhbəri Aleksandr Şarovski, Avropa Yəhudilərinin Bakı Dini İcmasının baş ravvini Şneor Seqal, Dini Qurumlarla İş üzrə Dövlət Komitəsinin şöbə müdiri Cahandar Əlifzadə, Azərbaycan İlahiyyat İnstitutunun Dinşünaslıq kafedrasının müdiri Anar Qafarov, Azərbaycanda Katolik Kilsəsinin nümayəndəsi Cozef Marik soyqırımların, qətliamların insanlığa zidd hərəkətlər olduğunu, bunun nə din, nə də hüquq çərçivəsinə sığışdığını diqqətə çatdırıblar.

Xatırladaq ki, BMT Baş Assambleyası tərəfindən 2005-ci il noyabrın 1-də qəbul olunmuş müvafiq qətnaməyə əsasən, hər il yanvarın 27-si Holokost Qurbanlarının Beynəlxalq Anım Günü kimi qeyd edilir. Holokost zamanı 6 milyondan çox yəhudi öldürülüb, onlardan 1,5 milyonu uşaqlardır.

Paylaş:

Baxılıb: 507 dəfə