İlham Əliyevin hərbi və iqtisadi siyasətinin uğurlu nəticəsi

Bakı:

26 °C

61 %

5 m/s

Əlaqə

AZ RU EN

Ana səhifə / Xəbər lenti / İlham Əliyevin hərbi və iqtisadi siyasətinin uğurlu nəticəsi

İlham Əliyevin hərbi və iqtisadi siyasətinin uğurlu nəticəsi

19.01.2023 [10:30]

Qarabağa aparan yeni yolun tikintisi yekun mərhələdə

Bu yol Zəngəzur dəhlizinə çıxış edə biləcək

Günel ABBASOVA

Regionların sosial-iqtisadi inkişafına yönəldilən dövlət proqramlarının icrası ölkəmizin yol infrastrukturunu da müasirləşdirdi. 2004-cü ildən başlayaraq Azərbaycanda hər il 1000 kilometr yeni yol çəkildi, yaxud köhnə yollar əsaslı surətdə yenidən quruldu. Yolların vəziyyəti yenə də daim dövlətin diqqət mərkəzindədir. Çünki yolların yüksək səviyyədə olması insanların rahatlığına və ölkənin sosial-iqtisadi inkişafına xidmət edir. Təsadüfi deyil ki, Qarabağda və Şərqi Zəngəzurda bərpa-quruculuq işlərinə də yeni yolların çəkilişindən başlandı.

Bunlardan biri də başlanğıcını “Zəfər Yolu”ndan götürən və yeni inşa edilən Şükürbəyli-Cəbrayıl-Hadrut avtomobil yoluna birləşən Füzuli-Hadrut avtomobil yoludur. 2021-ci il martın 15-də Prezident İlham Əliyev tərəfindən təməli qoyulan Füzuli-Hadrut avtomobil yolunun tikintisi də yekunlaşır. Məlumata görə, yolun genişləndirilərək profilə salınması və I texniki dərəcəyə uyğun yeni torpaq yatağının və yol əsasının inşası tam olaraq yekunlaşıb.

Qeyd edək ki, yolun 11-km hissəsində asfalt örtüyünün alt layı döşənib. Yolboyu atmosfer sularının ötürülməsini təmin etmək məqsədilə müxtəlif diametlərə malik 15 suötürücü boru, 7 ehtiyat keçidi, həmçinin dərə sularının ötürülməsi üçün 1 dördbucaqlı su keçidinin tikintisi də sona çatıb. Yolun 6,7 kilometrində “Qarğabazarı” adlanan ərazidən keçən hissəsində uzunluğu 18 metr, eni isə 21 metr olan bir aşırımlı körpü inşa edilib. Füzuli-Hadrut avtomobil yolu işğaldan azad edilmiş Füzuli və Xocavənd rayonlarının ərazisindən keçir. O, 4 hərəkət zolağından ibarətdir. Hərəkət zolaqlarına uyğun olaraq yol yatağının eni müvafiq olaraq 21,5 metr, yolun hərəkət hissəsinin eni isə 14 metr təşkil edir.

Milli Məclisin üzvü Cavid Osmanov “Yeni Azərbaycan”a açıqlamasında bildirib ki, işğaldan azad edilmiş torpaqlarımızda quruculuq işlərinə artıq start verilib: “Ərazinin strateji əhəmiyyətini artıran, irimiqyaslı layihələrin icrasını reallaşdırmaq və bərpa işlərini həyata keçirmək üçün xüsusi əhəmiyyət daşıyan yol-nəqliyyat infrastrukturunun bərpası və yenidənqurulması istiqamətində dövlətimiz tərəfindən mühüm addımlar atılmaqdadır. Prezident cənab İlham Əliyev Füzuli-Hadrut avtomobil yolu barədə danışaraq qeyd etmişdi ki, bu avtomobil yolunun inşası azad edilmiş ərazilərin bərpası üçün böyük əhəmiyyət daşıyır. Qeyd edim ki, bu, birinci layihə deyil. Artıq bir neçə yol layihəsi icra edilməkdədir. Aparılan bütün bu işlər dövlətimizin iqtisadi gücünün və dövlət başçımızın diqqət və qayğısının nəticəsidir. Füzuli-Hadrut avtomobil yolunun tikintisində son tamamlanma işlərinin həyata keçirilməsi iqtisadi inkişafın nə qədər yüksək səviyyədə olmasının bir göstəricisidir. Qarabağ və Şərqi Zəngəzur rayonları ərazisində icra olunan bu yol işğaldan azad olunan ərazilərin sosial-iqtisadi inkişafında mühüm rol oynayacaq. Bu yol gələcəkdə Zəngəzur dəhlizi kimi beynəlxalq əhəmiyyətli bir yola da çıxış edə biləcək. Eyni zamanda, Naxçıvanla Azərbaycanın əsas hissəsi ilə birləşməsi, insanların bu ərazilərə rahat şəkildə gedə bilməsi, iqtisadi inkişafın təmin edilməsi Füzuli-Hadrut yolunun əhəmiyyətini daha da artırır.

Ümumiyyətlə, işğaldan azad olunmuş ərazilərdə heç vaxt yol infrastrukturunun mövcud olmadığı yerlərdə də yollar çəkilir. Bu həm təhlükəsizlik məsələləri üçün vacibdir. Prezident İlham Əliyevin sərəncamı ilə təsdiq edilmiş “Azərbaycan Respublikasının işğaldan azad olunmuş ərazilərinə Böyük Qayıdışa dair I Dövlət Proqramı” çərçivəsində həyata keçirilən bütün layihələr bu ərazilərə qayıdacaq soydaşlarımızın rahatlığı və iqtisadiyyatın şaxələndirilməsi istiqamətində mühüm əhəmiyyətə malikdir”.

Paylaş:

Baxılıb: 559 dəfə