NASA nümayəndəsi: Kömək etmək üçün buradayıq

Bakı:

27 °C

48 %

3 m/s

Əlaqə

AZ RU EN

Ana səhifə / Xəbər lenti / NASA nümayəndəsi: Kömək etmək üçün buradayıq

NASA nümayəndəsi: Kömək etmək üçün buradayıq

03.10.2023 [12:11]

MÜŞFİQƏ

“74-cü Beynəlxalq Astronavtika Konqresi yüksək səviyyədə təşkil olunub. Dünən möhtəşəm açılış ilə yadda qaldı. İlk gündən etibarən insanların sərgiyə böyük maraq göstərdiklərini görürəm. Müxtəlif ölkələrdən olan insanlar əsasən İntership proqramı ilə maraqlanırlar. NASA olaraq kömək etmək üçün buradayıq. Əməkdaşlıq üçün kosmik tədqiqatlarını paylaşan müxtəlif şirkətlərlə əlaqə qurmağa çalışırıq. İstəyirik ki, bu sahə inkişaf etsin”.

Bu fikirləri Bakıda keçirilən 74-cü Beynəlxalq Astronavtika Konqresində “Yeni Azərbaycana”a açıqlamasında “Milli Aeronavtika və Kosmos Administrasiyası”nın (NASA) nümayəndəsi Ceyms Rassel deyib.

Onun sözlərinə görə, Azərbaycanın belə bir mötəbər tədbirə ev sahibliyi etməsi inkişafdan xəbər verir.

Oktyabrın 2-də Bakı Konqres Mərkəzində Azərbaycanın Kosmik Agentliyinin ("Azərkomos") və Beynəlxalq Astronavtika Federasiyasının tətəfdaşlığı ilə 74-cü Bakı Beynəlxalq Astronavtika Konqresi işinə başlayıb.

Oktyabrın 6-dək davam edəcək konqresin işində kosmik agentliklərin, dövlət sektorunun, investorlar və özəl kosmik şirkətlərin nümayəndələri, yerli və beynəlxalq media qurumlarının təmsilçiləri, ümumilikdə 101 ölkədən 5 mindən çox nümayəndə qatılıb.

Beynəlxalq Astronavtika Konqresində 150 şirkət sərgi pavilyonunda təmsil olunur. Sərgidə iştirak edən agentlik və şirkətlər arasında ABŞ-ın “Milli Aeronavtika və Kosmos Administrasiyası” (NASA), Yaponiyanın “JAXA” kosmik agentliyi, İtaliyanın “Agenzia Speziale Italiana” kosmik agentliyi, “AIRBUS” şirkəti, Kanadanın innovasiya mərkəzi “INO”, Fransanın Milli Kosmik Tədqiqatlar Mərkəzi “CNES”, Hindistanın kosmik agentliyi “ISRO”, Türkiyənin “Türkiye Uzay Ajansı” kosmik agentliyi və digər beynəlxalq şirkətlər yer alıb.

Bakı Konqresinə ümumilikdə 95 ölkədən 3600-dən çox elmi məqalə təqdim olunub.

Beynəlxalq Astronavtika Federasiyası İkinci Dünya müharibəsindən sonra “soyuq müharibə” dövründə kosmos sahəsində elm adamlarının arasında dialoqun yenidən qurulması məqsədilə 1951-ci ildə yaradılıb. Federasiya sülh məqsədləri ilə kosmik tədqiqat və fəaliyyətin təşviq edilməsi, cəmiyyətin bu sahədə maariflənməsi və biliklərinin zənginləşdirilməsi məqsədilə üzv qurumlar arasında qlobal şəbəkə yaradır. Hər il federasiya konfrans, texniki sessiyalar, quruma üzv ölkələrin nazirləri və parlament üzvlərinin beynəlxalq iclası kimi beynəlxalq tədbirlər təşkil edir. Hazırda Federasiyanın 110 ölkədən 460-dan çox üzvü var. Azərbaycan 2003-cü ildən Federasiyanın üzvüdür.

Paylaş:

Baxılıb: 478 dəfə