Zabuxa dördüncü köç…

Bakı:

22 °C

74 %

11 m/s

Əlaqə

AZ RU EN

Ana səhifə / Xəbər lenti / Zabuxa dördüncü köç…

Zabuxa dördüncü köç…

21.11.2023 [14:03]

Daha 25 ailə qayıtdı

Y.BAYRAMOVA

Bir zamanlar məcburi köçkün həyatı yaşamış soydaşlarımız uzun illər çətin və məşəqqətli yollardan keçiblər. Ancaq əzəli torpaqlarımız artıq düşmənin caynağından alınıb, azadlığına qovuşub. İndi vətəndaşlarımız doğulub boya-başa çatdıqları, hər qarışı onlar üçün müqəddəs və əziz olan torpağa qayıdırlar. Gülə-gülə, ağlaya-ağlaya, amma qayıdırlar. Onların bu gün axıtdıqları göz yaşları sevinc göz yaşlarıdır. Yaşamaq, yaratmaq, lazım gələrsə bu torpaqdan ötrü ölmək üçün qayıdırlar...

Dövlətimiz öz gücü, iqtisadi potensialı sayəsində xarabalığa çevrilmiş kəndləri, şəhərləri yenidən tikir. Yeni üslubda, yeni görkəmdə yurd yerləri salınır. “Böyük Qayıdış” planına uyğun tikilib bərpa edilən kəndlər, şəhərlər öz doğma sakinlərini qoynuna alır. Həsrətə, hicrana son qoyulur. Qədim, köhnə məhəllələr yeni üslubda inşa edilir. Ötən ildən başlayaraq möhtəşəm köçürülmə prosesi həyata keçirilir.

Zabux sakinlərinin sayı 382 oldu…

Dünən Laçın rayonunun yenidən salınan Zabux kəndinə növbəti-4-cü köç karvanı yola salınıb. Bununla da daha 25 ailə-91 Zabux kəndinə köçüb. Qeyd edək ki, noyabrın 18-də Zabuxa 25 ailə-103 nəfər köçürülmüşdü. Elə həmin gün kəndə köçürülən ailələrə mənzillərinin açarları təqdim olunub.

Xatırladaq ki, Zabuxa ilk köç avqustun 25-də baş tutub. Bu mərhələdə 21 ailə-94 nəfər doğma yurduna qayıdıb. Abadlaşan Zabuxa ikinci köç isə noyabrın 16-da olub. Bu zaman 25 ailə-94 nəfər doğma torpaqlarına qovuşub.

Bununla da bu günədək Zabuxda ümumilikdə 96 ailənin, yəni 382 nəfərin daimi məskunlaşması təmin edilib.

Qeyd edək ki,Laçın rayonunun Zabux kəndi 2022-ci ilin avqustun 26-da erməni işğalından azad olunub və Azərbaycan Ordusunun nəzarətinə keçib.

Çox sevincliyik, doğma obamıza gedirik

Bakıdan Laçın rayonunun Zabux kəndinə yola salınan keçmiş məcburi köçkün Murad Vəlizadə çox sevincli olduğunu deyib: “Çünki doğma elimizə, obamıza gedirik”.

Qırx dörd günlük Vətən müharibəsində iştirak etdiyini vurğulayan M.Vəlizadə qeyd edib ki, Azərbaycanın ərazi bütövlüyü Prezident İlham Əliyevin və ordumuzun gücü sayəsində tam bərpa olunub: “30 ildir həsrətində olduğumuz gözəl torpaqlarımıza qayıdırıq. Bizə bu şəraiti yaradan Prezidentimizə təşəkkür edirəm. Bu sevinci bizə yaşadan Vətənimizin qəhrəman övladlarına minnətdaram”.

Həmişə ümid edirdim…

Zabux kəndinə yola salınan keçmiş məcburi köçkün Dilbər Behbudova xoş günlərin gələcəyinə həmişə ümid etdiyini bildirib: “Çox sevinirəm ki, Prezident İlham Əliyevin uğurlu siyasəti məni arzuma çatdırdı. Zabux kəndi mənim üçün çox əzizdir. Şükürlər olsun ki, Ali Baş Komandanın rəhbərliyi ilə qəhrəman Vətən övladlarının şücaəti sayəsində öz doğma yurdumuza qayıdırıq. Böyük Qayıdışı gözləyən digər keçmiş məcburi köçkünlərə də bu günü yaşamalarını arzu edirəm”.

Paylaş:

Baxılıb: 455 dəfə