Fransa beynəlxalq hüquq normalarını pozur

Bakı:

0 °C

80 %

10 m/s

Əlaqə

AZ RU EN

Ana səhifə / Analitik / Fransa beynəlxalq hüquq normalarını pozur

Fransa beynəlxalq hüquq normalarını pozur

02.08.2025 [12:33]

Bu ölkənin Milli Assambleyasında Azərbaycana qarşı yönəlmiş qətnamə erməni maraqlarına xidmət edir

Fransa ölkəmizə qarşı qərəzli mövqeyini davam etdirir. Bir neçə gün öncə Fransa Milli Assambleyasında Azərbaycana qarşı yönəlmiş qətnamə layihəsinin irəli sürülməsi bunun növbəti göstəricisidir. Qətnamə layihəsi bir daha bu ölkədənin ermənipərəst mahiyyətini açıq şəkildə ortaya qoyur. Sənəddə regionumuzda baş verən proseslərə növbəti müdaxilə cəhdi olan bu layihədə adəti üzrə reallıqlar təhrif olunur, Azərbaycanın ərazi bütövlüyünə açıq hörmətsizlik nümayiş etdirilir və ölkəmiz əleyhinə yalan ittihamlar ortaya atılır.

Fransa Cənubi Qafqazda sülh istəmir

Görünən odur ki, Azərbaycanla Ermənistan arasında, xüsusən liderlərin Əbu-Dabi görüşündən sonra sülh gündəliyinin irəliləməsi müəyyən qüvvələrin maraqlarına heç bir halda cavab vermir. Onlar vəziyyəti yenidən gərginləşdirmək və sülh gündəliyinə xələl gətirmək xəttini seçiblər. İndiki məqamda Fransa Milli Assambleyasında irəli sürülmüş bu lüzumsuz qətnamə cəhdi də bu davranışın növbəti bariz nümunəsidir.

Xatırladaq ki, Milli Məclis Korsika Xalqına Dəstək Qrupu məsələ ilə bağlı bəyanat vermişdi. Bəyanatda qeyd olunduğu kimi, Yeni Kaledoniya ilə Fransa arasındakı sonuncu razılaşmalar artıq Yeni Kaledoniyanın bir dövlət kimi formalaşma istiqamətində inamla irəlilədiyini göstərir. Belə bir vəziyyətdə vətəndaş cəmiyyəti təsisatı və qeyri-hökumət təşkilatı olan Bakı Təşəbbüs Qrupunun Yeni Kaledoniyaya göstərdiyi dəstək Fransanı olduqca qıcıqlandırır. Əminliklə demək olar ki, Fransa tərəfi Bakı Təşəbbüs Qrupunun fəaliyyətinə özünəməxsus üslubda - həmin qətnamə layihəsi ilə cavab verməyə çalışır.

Bütövlükdə, Fransa Milli Assambleyasında indiyədək ölkəmiz əleyhinə qəbul edilmiş qətnamələrin mahiyyəti bundan ibarətdir ki, rəsmi Paris Cənubi Qafqazda sülh gündəliyindən tamamilə kənarda qalmasını həzm edə bilmir. Bu səbəbdən də bütün vasitələrdən istifadə edərək regionda vəziyyəti yenidən gərginləşdirməyə cəhd edir. Bütün bunlara ən böyük dəstəyi də erməni lobbisi və ermənipərəst dairələr verir. Digər vacib bir məqamı xüsusilə vurğulamaq lazımdır ki, ölkəmizə qarşı atılan bu kimi addımlarda bir-biri ilə əlaqəli olan vahid bir şəbəkənin fəaliyyəti özünü aydın şəkildə büruzə verir. Müəyyən qüvvələrin maraqlarını reallaşdırmağa çalışan həmin şəbəkənin ayrı-ayrı ünsürləri İsveçrə parlamentində, Fransa parlamentində, ABŞ Konqresində müxtəlif təxribatlar ortaya ataraq regiondakı sülh gündəliyini pozmağa çalışırlar. Lakin onlar bilməlidirlər ki, bu kimi təxribatlar Azərbaycanın yürütdüyü müstəqil siyasətə təsir göstərə bilməz və Cənubi Qafqaz regionunda baş verən proseslərə xarici müdaxilələrə heç bir halda icazə verilməyəcək.

Avropa Azərbaycan Mərkəzi bəyanat verib

Yeri gəlmişkən, Almaniyada fəaliyyət göstərən Avropa Azərbaycan Mərkəzi də Fransa Milli Assambleyasında irəli sürülmüş növbəti qərəzli və əsassız qətnamə layihəsi ilə bağlı bəyanat yayıb. Qətnamə ilə bağlı dərin narahatlığın ifadə edildiyi bəyanatda onun beynəlxalq hüququn fundamental prinsiplərinə zidd olmaqla yanaşı, Azərbaycan Respublikasının suveren hüquqlarına müdaxilə xarakteri daşıdığı və siyasi motivasiyalı təşəbbüs kimi qiymətləndirilməli olduğu vurğulanıb. Bildirilib ki, qətnamədə Azərbaycanın guya etnik təmizləmə və soyqırımı həyata keçirməsinə dair səsləndirilən ittihamlar Soyqırımının qarşısının alınması və cəzalandırılması haqqında Konvensiyaya və beynəlxalq cinayət hüququna tamamilə ziddir. Azərbaycan öz suveren ərazisində həyata keçirdiyi antiterror tədbirləri zamanı beynəlxalq humanitar hüquqa, xüsusilə 1949-cu il Cenevrə Konvensiyalarının IV Konvensiyasına tam əməl edib, mülki əhalinin müdafiəsini təmin edib və bölgəni könüllü şəkildə tərk edən erməniəsilli şəxslərin təhlükəsiz və ləyaqətli şəkildə qayıdışı üçün dəfələrlə çağırış edib.

Paris revanşizmi təşviq edir

Bundan başqa, həmin qətnamədə Ermənistanın guya “sülh tərəfdarı” kimi təqdim olunmasının BMT Təhlükəsizlik Şurasının 822, 853, 874 və 884 saylı qətnamələrinin müddəalarına zidd olduğu bəyanatda vurğulanıb. BMT Təhlükəsizlik Şurası qətnamələrinin 30 ilə yaxın müddətdə yerinə yetirilmədiyi halda Fransa Milli Assambleyasının qəbul etdiyi sənəddə Qərbi Azərbaycandan deportasiya olunmuş yüz minlərlə azərbaycanlının geri qayıtmaq hüququna dair heç bir qeydin yer almaması 1951-ci il Qaçqınların Statusu haqqında Konvensiyanın və Ümumdünya İnsan Hüquqları Bəyannaməsinin 13-cü və 17-ci maddələrinin açıq şəkildə pozulması olduğu bildirilib.

Bəyanatda Fransanın Cənubi Qafqaz regionunda neytral vasitəçi yox, tərəf kimi çıxış etməsinin, Ermənistanı hərbi sursatla təmin etməsi və revanşist qüvvələri təşviq etməsinin BMT Nizamnaməsinin 1-ci və 33-cü maddələrində təsbit olunmuş sülhün təşviqi və münaqişələrin dinc yolla həlli prinsipləri ilə ziddiyyət təşkil etməklə yanaşı, regional təhlükəsizliyə və sabitliyə təhdid yaratdığı, sülh səylərinə zərbə vurmaq məqsədi daşıdığı qeyd olunub. “Avropa Azərbaycan Mərkəzi beynəlxalq hüququn təməl prinsiplərinə və BMT Nizamnaməsinə hörmətin təmin olunmasını bölgədə ədalətli və davamlı sülhün bərpası üçün əsas şərt hesab edir. Biz Fransa parlamentini və siyasi dairələrini qərəzli mövqedən əl çəkməyə, beynəlxalq hüquqa sadiq qalmağa və Azərbaycanın suveren hüquqlarına hörmət etməyə çağırırıq”, - deyə bəyanatda vurğulanıb.

Nardar BAYRAMLI

Paylaş:

Baxılıb: 266 dəfə