15 İyun – Milli Qurtuluş Günü: Tarixi Qələbəyə Aparan Yolun başlanğıcı

Bakı:

26 °C

58 %

11 m/s

Əlaqə

AZ RU EN

Ana səhifə / Arxiv / 15 İyun – Milli Qurtuluş Günü: Tarixi Qələbəyə Aparan Yolun başlanğıcı

15 İyun – Milli Qurtuluş Günü: Tarixi Qələbəyə Aparan Yolun başlanğıcı

11.06.2026 [15:33]

Azərbaycan xalqının müasir tarixində xüsusi əhəmiyyətə malik olan 15 İyun – Milli Qurtuluş Günü ölkəmizin dövlət müstəqilliyinin qorunub saxlanılması və gələcək inkişafının əsasının qoyulduğu əlamətdar tarixdir. Bu gün Azərbaycan xalqının taleyində dönüş nöqtəsi olmaqla yanaşı, ölkənin parçalanmaq və vətəndaş qarşıdurması təhlükəsindən xilas olaraq sabitlik və tərəqqi yoluna qədəm qoymasının simvoludur.

1991-ci ildə dövlət müstəqilliyini bərpa edən Azərbaycan qısa müddət sonra ciddi siyasi, iqtisadi və hərbi problemlərlə üzləşdi. Ölkədə hakimiyyət böhranı, idarəetmədə xaos, Ermənistanın hərbi təcavüzü nəticəsində torpaqların işğalı və vətəndaş qarşıdurması təhlükəsi dövlətçiliyin gələcəyini sual altına qoymuşdu. 1993-cü ilin iyun ayında yaranmış ağır vəziyyət Azərbaycanı vətəndaş müharibəsi həddinə çatdırmışdı.

Belə mürəkkəb və taleyüklü bir dövrdə xalqın təkidli tələbi ilə ümummilli lider Heydər Əliyev yenidən siyasi hakimiyyətə qayıtdı. 15 iyun 1993-cü ildə Heydər Əliyevin Azərbaycan Respublikası Ali Sovetinin sədri seçilməsi ölkənin xilası yolunda atılan ən mühüm addım oldu. Məhz bu tarixdən etibarən dövlətçiliyin möhkəmləndirilməsi, ictimai-siyasi sabitliyin təmin olunması və milli birliyin bərpası istiqamətində ardıcıl tədbirlər həyata keçirildi.

Milli Qurtuluş Azərbaycanı inkişaf və tərəqqi yoluna çıxardı. Heydər Əliyevin uzaqgörən siyasəti nəticəsində ölkədə sabitlik təmin edildi, iqtisadi islahatlara başlanıldı, beynəlxalq əlaqələr genişləndirildi və Azərbaycanın dünya birliyində mövqeyi gücləndirildi. 1994-cü ildə imzalanmış “Əsrin müqaviləsi” ölkənin iqtisadi inkişafına güclü təkan verdi və gələcək uğurların əsasını yaratdı.

Bu gün Azərbaycan Respublikası Prezidentinin rəhbərliyi ilə əldə olunan böyük nailiyyətlər, xüsusilə də 2020-ci ildə baş vermiş İkinci Qarabağ Müharibəsi zamanı qazanılmış möhtəşəm Zəfər və ölkənin ərazi bütövlüyünün bərpası məhz Milli Qurtuluşdan sonra müəyyənləşdirilmiş strateji inkişaf kursunun nəticəsi kimi qiymətləndirilir. Azərbaycanın əldə etdiyi tarixi qələbələr, siyasi sabitlik, iqtisadi güc və beynəlxalq nüfuzun yüksəlməsi 15 İyun Qurtuluş ideyalarının uğurla həyata keçirildiyini göstərir.

Milli Qurtuluş Günü təkcə keçmişə ehtiram deyil, həm də gələcəyə inam günüdür. Bu tarix Azərbaycan xalqının birliyinin, dövlətçilik ənənələrinə sadiqliyinin və müstəqil dövlət quruculuğu yolunda nümayiş etdirdiyi əzmin parlaq nümunəsidir. 15 İyun xalqımızın yaddaşında Azərbaycanın tarixi qələbələrə aparan yolunun başlanğıcı kimi əbədi yaşayacaqdır.

Nicat Əsədli

YAP Ordubad rayon təşkilatının əməkdaşı

Paylaş:

Baxılıb: 247 dəfə