Müstəqil Azərbaycanın xilası və yüksəlişinin təməli

Bakı:

24 °C

63 %

12 m/s

Əlaqə

AZ RU EN

Ana səhifə / Arxiv / Müstəqil Azərbaycanın xilası və yüksəlişinin təməli

Müstəqil Azərbaycanın xilası və yüksəlişinin təməli

11.06.2026 [22:06]

Azərbaycan xalqının müasir tarixində xüsusi əhəmiyyətə malik olan 15 İyun – Milli Qurtuluş Günü ölkəmizin dövlətçilik salnaməsində dönüş nöqtəsi kimi qiymətləndirilir. Bu tarix yalnız siyasi hakimiyyət dəyişikliyi ilə deyil, həm də Azərbaycan dövlətinin parçalanmaq təhlükəsindən xilas olması, sabitlik və inkişaf yoluna qədəm qoyması ilə səciyyələnir.

XX əsrin sonlarında yenidən müstəqilliyini bərpa edən Azərbaycan Respublikası ciddi daxili və xarici problemlərlə üzləşmişdi. Ölkədə siyasi qarşıdurmaların dərinləşməsi, iqtisadi tənəzzül, idarəetmədə yaranmış böhran və Ermənistanın hərbi təcavüzü dövlət müstəqilliyini təhlükə altına salmışdı. Belə bir mürəkkəb şəraitdə xalqın tələbi ilə görkəmli dövlət xadimi Heydər Əliyevin hakimiyyətə qayıdışı Azərbaycanın gələcək taleyini müəyyənləşdirən həlledici hadisəyə çevrildi.

1993-cü il iyunun 15-də Heydər Əliyevin Azərbaycan Respublikası Ali Sovetinin sədri seçilməsi ölkədə milli qurtuluş prosesinin başlanğıcı oldu. Ulu Öndərin zəngin siyasi təcrübəsi, qətiyyətli rəhbərliyi və milli maraqlara əsaslanan siyasəti sayəsində ölkədə vətəndaş qarşıdurmasının qarşısı alındı, ictimai-siyasi sabitlik təmin edildi və dövlət institutlarının möhkəmləndirilməsi istiqamətində mühüm addımlar atıldı.Məhz həmin dövrdən etibarən Azərbaycanın inkişaf strategiyasının əsas konturları müəyyənləşdirildi. Hüquqi dövlət quruculuğu, demokratik dəyərlərin inkişafı, iqtisadi islahatların həyata keçirilməsi və beynəlxalq əlaqələrin genişləndirilməsi istiqamətində ardıcıl tədbirlər görüldü. Sonrakı illərdə əldə olunan uğurların təməlində də məhz Milli Qurtuluşun yaratdığı sabitlik və güclü dövlətçilik ənənələri dayanır.

Bu gün Azərbaycan regionun ən güclü dövlətlərindən biri kimi tanınır. Ölkəmizin beynəlxalq nüfuzu durmadan artır, iqtisadi potensialı genişlənir, milli maraqları qətiyyətlə qorunur. Azərbaycanın əldə etdiyi tarixi nailiyyətlər, xüsusilə ərazi bütövlüyünün və dövlət suverenliyinin tam bərpa olunması Milli Qurtuluş ideyalarının təntənəsi kimi dəyərləndirilir.

15 İyun – Milli Qurtuluş Günü xalqımızın birlik və həmrəyliyinin, güclü dövlətçilik ənənələrinin və müstəqilliyə sarsılmaz bağlılığının rəmzidir. Bu əlamətdar tarix Azərbaycan dövlətinin keçdiyi şərəfli inkişaf yolunu, xalqın öz liderinə olan inamını və gələcəyə böyük ümidlərlə addımlayan müasir Azərbaycanın uğur hekayəsini özündə əks etdirir.

Milli Qurtuluş Günü hər bir azərbaycanlı üçün dövlətçilik məsuliyyətini, milli birliyi və Vətənə sədaqəti xatırladan müqəddəs bir tarix olaraq daim böyük ehtiramla yad edilir. Bu günün siyasi və tarixi əhəmiyyəti zaman keçdikcə daha aydın görünür və gələcək nəsillərə müstəqil dövlətçiliyin qorunmasının nə qədər mühüm olduğunu bir daha nümayiş etdirir.

Lalə İskəndərova

YAP Qusar rayon təşkilatının məsləhətçisi

Paylaş:

Baxılıb: 162 dəfə