Ermənistandakı siyasi gərginlik hökumət böhranına səbəb olub

Bakı:

28 °C

49 %

6 m/s

Əlaqə

AZ RU EN

Ana səhifə / Dünya / Ermənistandakı siyasi gərginlik hökumət böhranına səbəb olub

Ermənistandakı siyasi gərginlik hökumət böhranına səbəb olub

05.10.2018 [08:48]

Paşinyan hakimiyyətinin səriştəsizliyi işğalçı dövləti idarəolunmaz anarxiyaya sürükləyir
Ermənistan növbəti dəfə siyasi böhranla üz-üzə qalıb. İşğalçı dövlətin parlamentində başlanan gərginlik hökumətin ortaqları olan bəzi siyasi qüvvələrin təmsilçilərinin tutduqları nazir postlarından kənarlaşdırılması ilə nəticələnib. Ehtimallara görə, baş nazir Nikol Paşinyanın ən geci dekabr ayında növbədənkənar parlament seçkilərinə getmək planları qarşı tərəfin, yəni S.Sarkisyan tərəfdarlarının növbəti gözlənilməz addımına səbəb ola bilər. Belə ki, Respublikaçılar Partiyasının nümayəndələri N.Paşinyan istefa verəcəyi halda baş nazir postuna namizədlərinin olacağını indidən bəyan ediblər.
Qeyd edək ki, mövcud qanunvericiliyə görə, parlamentdə iki dəfə baş nazir seçilməsə, növbədənkənar parlament seçkilərinə gedilməlidir. Baş nazir N.Paşinyanın isə ən çox qorxduğu variant onun istefasından dərhal sonra qanunverici hakimiyyətdə söz sahibi olan Respublikaçıların “Daşnaksutyun” və “Çarukyan” blokundan olan deputatların dəstəyi ilə hökuməti ələ keçirmək cəhdinə baş vura biləcəyi ehtimalıdır. Ən azı ona görə ki, oktyabrın 3-də Respublikaçılar tərəfindən belə bir variantın gündəmə gələ biləcəyi barədə fikir səsləndirilib.
Qeyd olunanlardan belə nəticəyə gəlmək olar ki, əslində, Ermənistanda hazırda hökumət böhranı yaşanır. N.Paşinyanın koalisiyanın üzvləri olan nazirləri istefaya göndərməsi, prezident Armen Sarkisyanın isə dərhal 6 nazirin, o cümələdən A.Minasyan, A.Xaçaturyan (“Daşnaksutyun” partiyası), A.Qriqoryan, Q.Rostomyan, L.Vaqradyan və A.Hakopyanın (“Çarukyan” bloku) istefası barədə fərman imzalaması və onların yerinə hələlik heç bir təyinat aprılmaması işğalçı dövlətdə siyasi gərginliyin hökumət böhranına səbəb olduğunu deməyə əsas verir. Bununla yanaşı, Ermənistan hökumətinin 4 oktyabrda keçirilən iclasında keçmiş koalisiyada birləşən partiyaları təmsil edən 6 qubernatorun vəzifədən azad edilməsi barədə qərar qəbul edilib. Onlar “Çiçəklənən Ermənistan” partiyasından Lori vilayətinin qubernatoru Qrant Markaryan, Vayotsdzor vilayətinin qubernatoru Araqats Saqatelyan, Armavir vilayətinin qubernatoru Qagik Miricanyan, Sünik vilayətinin qubernatoru Karen Ambartsumyan və “Daşnaksutyun” partiyasından olan Araqatsotn vilayətinin qubernatoru Aşot Simonyan, Geqarkunik vilayətinin qubernatoru İşxan Saqatelyandır.
Beləliklə, son proseslərdən gəlinən qənaət odur ki, aprel hadisələrindən sonra yaranmış xaosdan istifadə edərək kütləvi etiraz aksiyalarının dəstəyi ilə hakimiyyətə gələn N.Paşinyanın səriştəsizliyi ucbatından vaxtında növbədənkənar parlament seçkiləri keçirilməməsi işğalçı ölkədə hakimiyyətdaxili çəkişmələrin yaranmasına, son nəticədə hökumət böhranının baş verməsinə gətirib çıxarıb. Mövcud qeyri-müəyyən vəziyyət isə onsuz da mafiozların hələ də “at oynatdığı”, kriminal durumun son dərəcə gərgin olduğu Ermənistanın idarəolunmaz anarxiyaya sürükləndiyini göstərir.
Qaşqay ZİYƏDDİNOĞLU

Paylaş:

Baxılıb: 1362 dəfə