İqtisadi münasibətlərdə yeni imkanlar

Bakı:

14 °C

72 %

3 m/s

Əlaqə

AZ RU EN

Ana səhifə / İqtisadiyyat / İqtisadi münasibətlərdə yeni imkanlar

İqtisadi münasibətlərdə yeni imkanlar

29.11.2025 [11:17]

Azərbaycan və İordaniya əməkdaşlığı artırmaq üçün anlaşma memorandumları imzalayıb

Bakıda keçirilən Azərbaycan və İordaniya Hökumətləri arasında Ticarət, İqtisadi və Texniki Əməkdaşlıq üzrə Hökumətlərarası Komissiyanın IV iclasında tərəflər arasında ticarət-iqtisadi, sənaye və energetika, informasiya texnologiyaları, kənd təsərrüfatı, gömrük işi, hava və dəniz nəqliyyatı, mədəniyyət və turizm, təhsil, səhiyyə və digər sahələrdə əməkdaşlığın istiqamətləri müzakirə olunub. Komissiyanın həmsədrləri - Azərbaycan Respublikasının maliyyə naziri Sahil Babayev və İordaniyanın sənaye, ticarət və təchizat naziri Yarub Qudah ikitərəfli əməkdaşlığın mövcud vəziyyətini müsbət dəyərləndirərək imkanları daha da artırılmasına toxunublar.

S.Babayev bildirib ki, Azərbaycan və İordaniya arasında 30 ildən artıq dövr ərzində formalaşmış münasibətlər Prezident İlham Əliyev ilə Kral II Abdullah arasında yüksəksəviyyəli siyasi dialoqun uğurlarına əsaslanır. Dövlət başçılarının qarşılıqlı səfərləri siyasi münasibətlərin etibarlı və qarşılıqlı hörmət prinsiplərinə əsaslanan möhkəm sütunlarını formalaşdırıb və iqtisadi əməkdaşlıqda yeni mərhələnin başlanğıcını qoyub. İki ölkə arasında indiyədək imzalanmış 40-dan çox sənəd əməkdaşlığın inkişafı üçün güclü hüquqi baza formalaşdırır və yeni təşəbbüslərin reallaşdırılması üçün əlverişli imkanlar yaradır.

Rəsmi Bakı və Əmman iqtisadi əlaqələri də siyasi münasibətlər səviyyəsinə yüksəltməyin, bununla bağlı ölkələrimizin mövcud potensialını reallaşdırmağın başlıca vəzifə olduğunu bəyan edib və bu istiqamətdə qətiyyətli iradə nümayiş etdirməkdədir. Bu prosesdə isə Hökumətlərarası Komissiyanın fəaliyyəti mühüm platforma rolunu oynayır. Komissiyanın davamlı iclaslarının keçirilməsi Azərbaycan və İordaniya arasında çoxşaxəli əməkdaşlığın daha da genişləndirilməsini təşviq edən əlaqələndirici təsisat olmaqla, iqtisadi təmasların irəliyə getməsində daim təşəbbüskarlıq göstərir.

İordaniya Şimal-Cənub və Orta Dəhlizə qoşulmaq niyyətindədir

Hökumətlərarası Komissiyanın IV iclası müasir çağırışlar və bölgədə yaranmış yeni iqtisadi-ticari-logistika tələbatların artması fonunda öz gündəliyində yeni istiqamətlər müəyyən edib və indi daha intensiv təşəbbüslər əsasında fəaliyyət planı hazırlanacaq. Yeni yol xəritəsinin əsas istiqamətlərindən biri regional transformasiyada qarşılıqlı logistika bağlantılarının koordinasiyasıdır.

Belə ki, Azərbaycanın öz ərazi bütövlüyünü təmin etməsindən sonra bölgədə yaranan geosiyasi və iqtisadi dəyişikliklər Cənubi Qafqazda yeni inkişaf landşaftının da formalaşdırmaqdadır. Xüsusilə də, Vaşinqtonda imzalanmış tarixi Bəyannamə Azərbaycan və Ermənistan arasında sülh prosesi etimadını gücləndirməklə böyük bir əməkdaşlıq və rifah çərçivəsini müəyyən etməkdədir. Bu, iqtisadi-nəqliyyat layihələrndə ABŞ başda olmaqla, dünyanın bir çox ölkəsinin marağının artması fonunda İordaniyanın da proseslərdən kənarda qalması məqsədəuyğun olmazdı. Yeni nəqliyyat arteriyası təkcə Cənubi Qafqaz deyil, eyni zamanda, Mərkəzi Asiya və Yaxın Şərq üçün də ticarət, logistika, enerji tranziti və regional inteqrasiya sahələrində geniş imkanlar açır və regionda investisiya, turizm, tranzit, logistika üçün sabit, proqnozlaşdırıla bilən və əlverişli mühit formalaşdırır. Ona görə də, rəsmi Bakı Əmmanı yaranmış əlverişli logistika zəncirlərinə qoşulmasına dəvət edir, Azərbaycanın əsas hissəsi ilə Naxçıvan arasında maneəsiz bağlantını təmin edəcək Zəngəzur dəhlizinin Türkiyə və Yaxın Şərqə qədər uzanacaq nəhəng nəqliyyat habına inteqrasiyada fəal olmasını arzulayır.

İordaniyanın sənaye, ticarət və təchizat naziri Yarub əl-Kudanın vurğuladığı kimi, iqtisadi əməkdaşlığın daha da inkişafı üçün səylərin birləşdirilməsi məqsədəuyğundur və daha stimullaşdırıcı iqtisadi-hüquqi qərarların verilməsində maraqlıdırlar.

Azərbaycanın yeni ixrac siyasəti İordaniya bazarlarını əhatə edir

İordaniya Azərbaycanın təşəbbüskar addımlarını alqışlayaraq mövcud reallıqlara uyğun logistika rəqabətindən geri qalmamaq üçün Yaxın Şərq-Asiya regionunda formalaşan nəqliyyat-logistika qovşaqları ilə öz infrastrukturlarını Şimal-Cənub və Orta Dəhlizlə əlaqələndirilməsini vacib sayır. Hökumətlərarası Komissiyanın həmsədri Yarub əl-Kudanın vurğuladığı kimi bu istiqamətdə Şimal-Cənub nəqliyyat marşrutunda aparıcı yer alan respublikamızın bölgədəki liderliyi və MDB ölkələri bazarlarına çıxış üçün strateji platforma olması Əmman üçün mühüm fürsətdir. Ona görə də bu tarixi imkanlardan maksimum faydalanmaq üçün öz liman və logistika infrastrukturlarını həmin tranzitlərə inteqrasiyası sürətləndiriləcək.

Bu isə Azərbaycanla ticari daşınmaların, habelə Yaxın Şərq regionu ilə iqtisadi mübadilələrin artmasında İordaniyanın imkanlarını artıra bilər. İordaniyalı nazirin qeyd etdiyi kimi bu təşəbbüsün reallaşması həmin regionda Azərbaycanın özəl sektoru üçün Yaxın Şərq regionuna açılan “mühüm qapı” olmaqla, Suriya və digər qonşu ölkələrin də vahid bir ticari bağlantılarda inteqrativ əməkdaşlıq klubunu formalaşdıracaq.

Azərbaycan və İordaniya iqtisadi-investisiya mübadilələrini də artırmaqda qərarlıdır. S.Babayevin fikrincə, tərəflər arasında daha böyük potensial mövcuddur və praktiki olaraq səfərbər etmək mümkündür. İkitərəfli ticarəti artırmaq üçün yaxşı fürsətlər var, xüsusilə də Azərbaycanın öz qeyri-neft ixracını şaxələndirmək sahəsində son illərdə intensiv addımlar atması və ənənəvi bazarlardan yeni bazarlara çıxışını təşviq edən siyasət yürütməsi bu imkanı daha da tezləşdirməyi zəruri edir. Hazırda Azərbaycan kənd təsərrüfatı, qida və digər məhsulları Körfəz və Yaxın Şərq ölkələri regionuna ixrac edən motivasiyaedici qərarlar qəbul etməkdədir ki, bu da biznesin İordaniya bazarına çıxışı üçün də stimul yarada bilər.

Qarşı tərəfin də Azərbaycan bazarında daha geniş təmsil olunması üçün münbit şərait mövcuddur. Respublikamız dərman və digər sənaye məhsullarının komponentlərinin əldə edilməsində və innovativ emal sənayesi quruculuğunda bu ölkənin potensialından faydalanmaq niyyətindədir. Habelə qarşılıqlı investisiya dialoqunun dərinləşdirilməsi birgə sənaye müəssisələrinin yaradılması üçün də konkret müsbət nəticə verə bilər.

Qeyri-neft sektorunda yeni imkanlar

İordaniyanın sənaye, ticarət və təchizat naziri Yarub Qudah da bunu istisna etmir. Onun fikrincə, kənd təsərrüfatı, əczaçılıq və turizm, xidmət sahələrində kifayət qədər potensial mövcuddur. Hazırda ölkəmizdə 30 İordaniya şirkəti qeydiyyatdan keçib və onlardan 19-u qeyri-neft sektorunda aktiv fəaliyyət göstərir. Bu, ona dəlalət edir ki, əsaslı baza var və bunun üzərində yeni investisiya bölmələrini qurmaq lazımdır.

Qeyd edək ki, Hökumətlərarası Komissiyanın iclası başa çatdıqdan sonra bir sıra sənədlər imzalanıb. Belə ki, Azərbaycan Respublikası Hökuməti və İordaniya Haşimilər Krallığı Hökuməti arasında Ticarət, İqtisadi və Texniki Əməkdaşlıq üzrə Hökumətlərarası Komissiyanın IV iclasının nəticələrinə dair Protokol, 2025-2027-ci illər üzrə elm və təhsil, mədəniyyət və incəsənət, gənclər və idman, arxeologiya, səhiyyə və media sahələrində İcraedici Əməkdaşlıq Proqramı, gömrük sahəsində əməkdaşlıq və qarşılıqlı yardım haqqında Saziş, turizm sahəsində əməkdaşlığa dair Anlaşma Memorandumu, Kiçik və Orta Biznesin İnkişafı Agentliyi (KOBİA) ilə İordaniyanın Kiçik və Orta Müəssisələrin İnkişafı Korporasiyası (JEDCO) arasında Anlaşma Memorandumu imzalanıb.

Beləliklə, Azərbaycan və İordaniya hökumətləri arasında Ticarət, İqtisadi və Texniki Əməkdaşlıq üzrə Hökumətlərarası Komissiyanın IV iclasında əldə edilən razılaşmalar və imzalanmış protokol münasibətlərin strateji xarakter daşıdığını və birgə iqtisadi niyyəti əks etdirməklə, ticari-iqtisadi-investisiya və logistik əlaqələrin inkişafında yeni mərhələ açacaq.

E.CƏFƏRLİ

Paylaş:

Baxılıb: 41 dəfə