9-a çatır...

Bakı:

23 °C

53 %

6 m/s

Əlaqə

AZ RU EN

Ana səhifə / İqtisadiyyat / 9-a çatır...

9-a çatır...

16.12.2022 [10:32]

Cənubi Qafqazın hava məkanında lider ölkə

Azərbaycanda 8, Gürcüstanda 3, Ermənistanda 2 beynəlxalq hava limanı

M.ABDULLAYEV

Azərbaycanın bütün parametrlər baxımından Cənubi Qafqazın ən öndə gedən ölkəsi olduğu reallıqdır. Respublikamız regionun hava məkanında da lider mövqeyə malikdir. Hazırda respublikamızda 8 beynəlxalq səviyyəli hava limanı fəaliyyət göstərir. Daha bir beynəlxalq səviyyəli hava limanının inşası isə Laçın rayonunda aparılır. Həmin infrastruktur obyektinin inşasının 2024-cü ildə tamamlanacağı gözlənilir. Bununla da ölkəmizdə beynəlxalq səviyyəli hava limanlarının sayı 9-a çatacaq.

Hava limanlarının regionlar üzrə bölgüsü

Beynəlxalq səviyyəli hava limanlarının sayına görə respublikamız qonşu Gürcüstanı və Ermənistanı xeyli geridə qoyub. Belə ki, hazırda Gürcüstanda biri paytaxt Tbilisidə, ikisi isə region şəhərlərində - Kutaisi və Batumidə olmaqla üç beynəlxalq səviyyəli hava limanı fəaliyyət göstərir.

Oxşar göstərici üzrə Ermənistan ən pis vəziyyətdə olan ölkədir. Burada biri paytaxt İrəvanda, digəri isə Gümrüdə olmaqla cəmi iki beynəlxalq səviyyəli hava limanı fəaliyyət göstərir.

Beynəlxalq səviyyəli hava limanlarının coğrafi yerləşməsi də bir göstəricidir. Statistikadan göründüyü kimi, qonşu ölkələrdə beynəlxalq səviyyəli hava limanları məhdud coğrafiyada yerləşir. Azərbaycanın belə hava limanları isə ölkənin bütün bölgələrini əhatə edir. Hava limanlarının belə coğrafi yerləşməsi o anlama gəlir ki, respublikamızın yalnız paytaxtı deyil, bölgələri də dünyanın diqqət mərkəzindədir. Bu, respublikamızda reallaşdırılan uğurlu regional inkişaf siyasəti ilə bağlıdır. Respublikamızda inkişaf, infrastruktur quruculuğu, istehsalatların, turizm mərkəzlərinin yaradılması yalnız paytaxt Bakıda təmərküzləşməyib. Hazırda ölkənin regionları da iqtisadi güc mərkəzləri qismində çıxış edirlər. Bölgələrdə yeni turizm mərkəzləri yaradılır, eko turizm inkişaf etdirilir. Bu gün Azərbaycan infrastruktur təminatı baxımından dünyanın ən qabaqcıl ölkələri ilə eyni sırada dayanır. Bütün bunlar isə Bakı ilə yanaşı, regionlarımızın da əcnəbi iş adamları, investorlar və turistlər üçün cəlbediciliyini artırır.

Qısa müstəqillik tarixində ölkə ərazisində 8 beynəlxalq səviyyəli hava limanının yardılması Azərbaycanın gücünü əks etdirir. Belə çox sayda mühüm infrastruktur obyektlərini yaratmağa ancaq Azərbaycan kimi qüdrətli dövlətlər qadirdirlər.

Keyfiyyət göstəriciləri ilə öndə

Azərbaycanın beynəlxalq səviyyəli hava limanları keyfiyyət parametrlərinə görə də qonşu ölkələrdəki oxşarlarını üstələyirlər. Bunu paytaxt şəhərlərində - Bakıda, Tbilisidə və İrəvanda fəaliyyət göstərən beynəlxalq hava limanlarının timsalında izləmək mümkündür. Türkiyənin “Tənə Akfen” (TAV) şirkəti tərəfindən tikilmiş Tbilisi beynəxalq hava limanı ildə 2,8 milyon sərnişin daşınması üçün nəzərdə tutulub. İrəvandakı beynəlxalq səviyyəli Zvartnots aeroportunun illik sərnişin qəbul etmək imkanları cəmi iki milyon nəfərə hesablanıb.

İndi isə Azərbaycan paytaxtındakı Heydər Əliyev Beynəlxalq Aeroportunun göstəricilərinə diqqət yetirək. Heydər Əliyev Beynəlxalq Aeroportu (IATA: GYD) sərnişin və yük daşımalarının, uçuş-enmə əməliyyatlarının həcminə, aerovağzal kompleksinin sahəsinə və yük kompleksinin tutumuna görə regionun ən böyük hava limanıdır. Bu mühüm infrastruktur obyektini nüfuzlu “Skytrax” beynəlxalq agentliyi tərəfindən ən yüksək “5-ulduz” reytinqinə, həmçinin

COVID-19 pandemiyası dövründə epidemioloji təhlükəsizlik üzrə maksimal reytinqə layiq görüb. 2022-ci ilin iyun ayında Heydər Əliyev Beynəlxalq Aeroportu “Skytrax”in versiyasına görə ardıcıl olaraq beşinci dəfə MDB ölkələri sırasında ən yaxşı hava limanı statusunu təsdiqləyərək “World Airport Awards” mükafatına layiq görülüb. Bu mükafat mülki aviasiya sahəsi üçün keyfiyyət meyarıdır. Qeyd edək ki, 2022-ci il üçün “Skytrax” mükafatları dünyanın 100-dən çox ölkəsində 2021-ci ildən 2022-ci ilədək 8 ay ərzində keçirilən “World Airport Survey” sorğusuna əsaslanır. Sorğu zamanı hava limanlarında sərnişinlərə göstərilən xidmətin və hava limanı xidmətlərinin keyfiyyəti qiymətləndirilib. Bu xidmətlər sırasında əsas səmərəlilik göstəriciləri üzrə sərnişinlərin qeydiyyatı, gəlmə və transfer zonaları, təhlükəsizliyə nəzarət, alış-veriş, pasport nəzarəti və uçuş prosedurları əsas meyar kimi seçilir.

Heydər Əliyev Beynəlxalq Aeroportunun sərnişin qəbul etmək imkanları da qonşu ölkələrdəki müvafiq infrastuktur obyektlərindəkindən xeyli yüksəkdir. Təkcə 2022-ci ilin yanvar-noyabr aylarında Bakının Heydər

Əliyev Beynəlxalq Aeroportunda 4,04 milyon sərnişinə xidmət göstərilib. Noyabr ayında Bakıdan ən populyar beynəlxalq istiqamətlər onluğuna Moskva, İstanbul, Dubay, Tbilisi, Əbu-Dabi, Şarca, Daşkənd, Mineralnıye Vodı, Ciddə və Ankara daxil olmuşdur.

Hava limanlarının inşasında dünya rekordu

Əlamətdar haldır ki, Azərbaycan regionlarda yaradılan beynəlxalq səviyyəli hava limanlarının inşasında da dünyadakı ən yüksək standartları tətbiq edir. Ölkəmizdə sonuncu belə infrastruktur obyekti Vətən müharibəsində işğaldan azad olunan Zəngilanda cari ildə Azərbaycan və Türkiyə prezidentlərinin iştirakı ilə istifadəyə verilib. Bu hava limanı da bütün növ təyyarələri qəbul etmək və yola salmaq imkanlarına malikdir. Onu da vurğulayaq ki, Azərbaycan Füzuli və Zəngilan beynəlxalq hava limanlarının inşasını maksimum qısa müddətdə tamamlamaqla bu sahədə dünya rekorduna imza atıb.

Paylaş:

Baxılıb: 557 dəfə