"Soyqırım" filminin xarici ölkələrdə də təqdimatı keçiriləcək

Bakı:

15 °C

67 %

5 m/s

Əlaqə

AZ RU EN

Ana səhifə / Müsahibə / "Soyqırım" filminin xarici ölkələrdə də təqdimatı keçiriləcək

"Soyqırım" filminin xarici ölkələrdə də təqdimatı keçiriləcək

17.04.2010 [14:35]

Qənirə Paşayeva: Qeyri-hökumət təşkilatlarımız Azərbaycan həqiqətlərinin təbliğində, erməni yalanlarının qarşısının alınmasında fəaliyyətlərini genişləndirməlidirlər
Məlum olduğu kimi, bu yaxınlarda Bakıda “Soyqırım” (“Genocide”) filminin təqdimatı keçirilib. Film ermənilərin 1918-ci ildə Qubada törətdikləri qanlı qətliamlara həsr olunub. Filmin məsləhətçisi, millət vəkili Qənirə Paşayeva hesab edir ki, buna bir ilk də demək olar:
- Bu filmin ingilis dilində variantı da hazırlanıb. Ona görə də, mən bu yerdə, ilk növbədə, Avrasiya Beynəlxalq Araşdırmalar İnstitutu İctimai Birliyinə belə bir layihəni həyata keçirdiyinə görə təşəkkür edirəm. Düşünürəm ki, bu layihə çox önəmlidir. Bununla yanaşı, onu da qeyd etmək istəyirəm ki, bizim qeyri-hökumət təşkilatlarının Azərbaycan həqiqətlərinin dünyaya çatdırılmasında böyük rolu var və olmalıdır. Həmçinin, qeyri-hökumət təşkilatlarımızın bu istiqamətdə öz fəaliyyətlərini daha da genişləndirməsinə ehtiyac var. Bunun özü də çox önəmli və əhəmiyyətlidir. Digər tərəfdən, bildiyiniz kimi, hər il aprelin 24-də ermənilər öz uydurma “soyqırımı” iddialarını ortaya qoyur, bununla dünyanı, beynəlxalq ictimaiyyəti çaşdırmaq üçün işlər aparırlar. çox təəssüf ki, dünyanın bəzi yerlərində insanlar bəzən ermənilərin bu yalanlarına inanırlar. Odur ki, mənim fikrimcə, bu cür filmlər Azərbaycan həqiqətlərinin təbliğ olunması ilə yanaşı, o yalanların qarşısının alınması istiqamətində çox önəmli bir məsələdir. İnsanlar görməlidirlər ki, əslində, soyqırımını törədənlər kimlərdir. Bir daha qeyd edirəm, ermənilərin iç üzünün mahiyyətini görmək üçün bu istiqamətdə addımların atılması çox vacib və önəmlidir. Hesab edirəm ki, bu cür filmlərimizin müxtəlif dillərdə sayı artmalıdır və buna böyük ehtiyac var. Bu, önəmli missiyadır, vətəndaşlıq mövqeyidir. Onu da qeyd edim ki, bizim bir sıra yeni təşkilatlarımız, xüsusilə, gənclər təşkilatlarımız yaranmaqdadır. Həmçinin, xaricdə təhsil alan soydaşlarımız müxtəlif şəbəkələr yaratmaqda, müxtəlif təşkilatlar qurmaqdadırlar, onlar internet dünyasını, virtual dünyanı çox yaxşı bilirlər. Mən çox istərdim ki, onlar da bu filmləri götürərək, həm Azərbaycan, həm də ingilis variantını yaysınlar.
- “Soyqırım” (“Genocide”) filminin başqa ölkələrdə yayılması nəzərdə tutulurmu?
- Bəli, yaxın günlərdə “Soyqırım” filminin hər iki variantda Türkiyədə, Gürcüstanda, Rusiyada, ABŞ-da və Avropanın bəzi ölkələrində təqdimatının keçirilməsi gözlənilir. Bunlarla yanaşı, filmin minlərlə nüsxə çoxaldılaraq Azərbaycan Xarici İşlər Nazirliyi, Diasporla İş üzrə Dövlət Komitəsi, bir çox dövlət və qeyri-hökumət təşkilatları, diaspor təşkilatları vasitəsilə beynəlxalq ictimaiyyətə yayılması da nəzərdə tutulur. Bununla belə, bir daha hesab edirəm ki, bunun virtual dünyada da yayılması vacibdir, bu işə bizim gənclər təşkilatlarımız, digər qeyri-hökumət təşkilatlarımız dəstək verə bilərlər. Bizim media qurumlarımız, qəzetlərimiz, agentliklərimiz, saytlarımız bu məsələdə böyük rol oynaya, ona geniş dəstək verə bilərlər. Yəni, biz bu filmləri dünyada nə qədər insana göstərə bilsək, düşünün ki, o zaman nə qədər insanı öz həqiqətlərimizə inandırmış olarıq.
- Qənirə xanım, filmdə digər filmlərdən fərqli olaraq ziyalılar, siyasət adamları, millət vəkilləri deyil, sıravi insanların danışığına üstünlük verilir. Bu, nə ilə bağlıdır?
- Bilirsiniz, hələ filmin çəkilişə başlamazdan öncə yaradıcı qrupla belə bir razılığa gəlmişdik ki, filmdə millət vəkilləri, siyasətçilər, tarixçilər deyil, sadə, sıravi, həmin faciənin canlı şahidləri olan insanlar danışsınlar. Bu, bəlkə də, ilk baxışdan kimlərəsə bəsit görünə bilər. Amma bu, heç də belə deyil. Xaricilərə başımıza gələn faciələrlə bağlı siyasətçilərimizin danışığı deyil, daha çox sadə insanların, həmin faciəni yaşamış şəxslərin danışığı lazımdır. Onlar, məhz bu insanların danışığını qəbul edirlər. Ona görə də, bu filmdə, məhz həmin faciəni öz gözləri ilə görmüş, öz həyatlarında yaşamış insanlar danışır.
Nardar BAYRAMLI

Paylaş:

Baxılıb: 1308 dəfə