Bakıda “Cəlal Əliyev. Davamlı inkişaf üçün fotosintez tədqiqatları-2013” mövzusunda beynəlxalq konfrans davam edir

Bakı:

13 °C

76 %

7 m/s

AZ RU EN

Ana səhifə / Siyasət / Bakıda “Cəlal Əliyev. Davamlı inkişaf üçün fotosintez tədqiqatları-2013” mövzusunda beynəlxalq konfrans davam edir

Bakıda “Cəlal Əliyev. Davamlı inkişaf üçün fotosintez tədqiqatları-2013” mövzusunda beynəlxalq konfrans davam edir

08.06.2013 [05:08]

İyunun 7-də Bakıda Azərbaycan Milli Elmlər Akademiyasının (AMEA), AMEA-nın Botanika İnstitutunun və Fotosintez Tədqiqatları üzrə Beynəlxalq Cəmiyyətin (İSPR) birgə təşkilatçılığı ilə dünya şöhrətli alim, ictimai-siyasi xadim, akademik Cəlal Əliyevin 85 illik yubileyinə həsr olunmuş “Cəlal Əliyev. Davamlı inkişaf üçün fotosintez tədqiqatları-2013” mövzusunda beynəlxalq konfrans işini davam etdirib.
AzərTAc xəbər verir ki, konfransda iştirak edən Yaponiya, Rusiya, ABŞ, Almaniya, Estoniya və digər ölkələrin alim və mütəxəssisləri əvvəlcə Azərbaycan Respublikası Kənd Təsərrüfatı Nazirliyinin Elmi-Tədqiqat Əkinçilik İnstitutunda olublar.
Qonaqlara 1950-ci ildən fəaliyyət göstərən bu elm müəssisəsinin fəaliyyət istiqamətləri və strukturu barədə ətraflı məlumat verilib. Bildirilib ki, Əkinçilik İnstitutunun 100-dən artıq elmi əməkdaşı keçmiş Sovet İttifaqının, bu gün isə MDB məkanının aparıcı institutlarında, Fransa, Almaniya və Macarıstanın müvafiq institutlarında, beynəlxalq elm mərkəzlərində ixtisasartırma kursları keçib. İnstitutda məqsədli aspirantura da daxil olmaqla 400-dən artıq yüksək ixtisaslı elmi kadr hazırlanıb. Onlardan 259 nəfəri dissertasiya işlərini müvəffəqiyyətlə müdafiə edərək elmlər namizədi, 8 nəfər isə doktorluq alimlik dərəcəsi alıb.
Dünya şöhrətli alim, akademik Cəlal Əliyevin rəhbərlik etdiyi bitkilərin fiziologiyası və biotexnologiya şöbəsində isə bitki fiziologiyası, bitkilərin biokimyası, biofizika, molekulyar biologiya və genetika, bioüzvi kimya, radiobiologiya, mikrobiologiya, riyazi biologiya və s. ixtisaslar üzrə 77 elmlər namizədi və 7 elmlər doktoru hazırlanıb.
Qeyd edilib ki, Əkinçilik İnstitutu əsasən bitkilərin seleksiyası, toxumçuluq və becərmə texnologiyası ilə bağlı tətbiqi və fundamental xarakterli elmi-tədqiqat işlərini yerinə yetirilir.
Xarici ölkələrin mütəxəssisləri Əkinçilik İnstitutunun təcrübə sahələrinə də baxıblar. Eyni zamanda, institutun əməkdaşları ilə fikir mübadiləsi aparıb və onlarla xatirə şəkli çəkdiriblər.
Sonra konfrans işini bölmə iclaslarında davam etdirib. Görkəmli alimlər Norio Murata (Yaponiya), Vladimir Şuvalov (Rusiya), Govindiee (ABŞ) məruzə ilə çıxış ediblər. Eyni zamanda, Moskva Dövlət Universitetindən Andrey Rubinin, Tokio Universitetindən Tatsuya Tomonun, Almaniyadan Ernst-Valter Knappın, Estoniyadan Agu Laiskin və başqa alimlərin fotosintez prosesinin bütün istiqamətləri, onun praktiki təsiri, kənd təsərrüfatında tətbiqi, həmçinin hidrogenin alınması və süni fotosintez kimi problemlər barədə məruzələri dinlənilib.
Məruzələr ətrafında müzakirələr aparılıb, suallar cavablandırılıb.
İyunun 8-də konfrans işini bölmə iclaslarında davam etdirəcək.

Paylaş:

Baxılıb: 1123 dəfə