Serbiyanın Azərbaycandakı səfiri xocavəndli məcburi köçkünlərlə görüşüb

Bakı:

26 °C

47 %

3 m/s

Əlaqə

AZ RU EN

Ana səhifə / Siyasət / Serbiyanın Azərbaycandakı səfiri xocavəndli məcburi köçkünlərlə görüşüb

Serbiyanın Azərbaycandakı səfiri xocavəndli məcburi köçkünlərlə görüşüb

22.09.2013 [11:01]

Serbiyanın Azərbaycandakı səfiri Zoran Vayoviç xocavəndli məcburi köçkünlərin müvəqqəti məskunlaşdıqları Beyləqan rayonu ərazisində salınmış Xocavənd qəsəbəsində olub.
AzərTAc xəbər verir ki, səfir əvvəlcə qəsəbədə Ümummilli lider Heydər Əliyevin abidəsi önünə gül dəstələri qoyub, sonra Xocavənd rayon İcra Hakimiyyətində rayon rəhbərliyi ilə görüş keçirilib.
Xocavənd rayon İcra Hakimiyyətinin başçısı Eyvaz Hüseynov Ermənistan-Azərbaycan, Dağlıq Qarabağ münaqişəsi və onun fəsadları barədə qonağa geniş məlumat verib, qaçqınların və məcburi köçkünlərin mənzil-məişət şəraitinin yaxşılaşdırılması istiqamətində görülmüş işlərdən söz açıb. Bildirib ki, Xocavənd rayonu 1992-ci ildə Ermənistan silahlı qüvvələri tərəfindən işğal olunub. Qarabağ müharibəsində Xocavənd rayonundan 145 nəfər şəhid olub, 300 nəfərdən çox sakin sağlamlığını itirib. Ermənistan silahlı qüvvələri nəinki Xocavənd rayonunu və Qarabağın dağlıq hissəsini, eləcə də ətraf rayonları işğal edib, azərbaycanlılara məxsus yaşayış məntəqələri, maddi-tarixi abidələr məhv edilib, dinc əhaliyə qarşı soyqırımı siyasəti həyata keçirilib. Təkcə Xocavənd rayonunun Qaradağlı kəndinin işğalı nəticəsində 118 sakin əsir götürülüb, 77 nəfər qətlə yetirilib, 800 nəfərə yaxın sakin məcburi köçkün düşüb.
Hazırda rayon əhalisi məcburi köçkün kimi ölkənin 36 rayonunda məskunlaşıb. Son illər Beyləqan rayonu ərazisində xocavəndli məcburi köçkünlər üçün qəsəbələr salınıb, onların mənzil şəraitinin yaxşılaşdırılması istiqamətində xeyli işlər görülüb. Lakin xocavəndlilərin ən böyük arzusu öz torpaqlarına qayıtmaqdır. O, təəssüflə bildirib ki, Ermənistan beynəlxalq hüququn prinsiplərinə, BMT Təhlükəsizlik Şurasının münaqişə ilə bağlı qətnamələrinə əməl etmir.
Səmimi qəbula və ətraflı məlumata görə təşəkkür edən səfir Zoran Vayoviç Ermənistan-Azərbaycan, Dağlıq Qarabağ münaqişəsi ilə bağlı xeyli məlumatlı olduğunu deyib, bir diplomat kimi Azərbaycanın haqlı mövqeyini dəstəklədiyini bildirib. Səfir deyib ki, bugünkü səfərinin məqsədi Xocavənd rayonunun işğalının 21-ci ildönümü ərəfəsində xocavəndli məcburi köçkünlərlə görüşərək, onların həyat şəraiti ilə tanış olmaq, Dağlıq Qarabağ münaqişəsi ilə bağlı daha geniş məlumat əldə etməkdir. “Serbiya və Azərbaycan oxşar talelər yaşayıb, hər iki dövlət separatçılıqla üzləşib. Serbiya Azərbaycanın ərazi bütövlüyü tanıyır. Yaxın vaxtlarda Xocalı soyqırımı ilə bağlı qətnamə layihəsi Serbiya parlamentində müzakirəyə çıxarılacaqdır”, - deyə səfir bildirib.
Görüşdə səfirin Ermənistan-Azərbaycan, Dağlıq Qarabağ münaqişəsi, məcburi köçkünlərin həyat şəraiti ilə bağlı sualları cavablandırılıb.
Qonaq milliyyətcə erməni olan Jenya Zeynalova (Yesayan) ilə də görüşüb söhbət edib. 75 yaşlı erməni qadın 1959-cu ildə azərbaycanlı Cavanşir Zeynalovla ailə qurduğunu, 4 övladı, 12 nəvəsi, 7 nəticəsi olduğunu, burada hamının ona hörmətlə yanaşdığını, övladlarına ev verildiyini bildirib.
Səfir sonra bir neçə şəhid ailəsinin mənzilinə baş çəkərək onların yaşayışı ilə maraqlanıb, Salakətin kənd orta məktəbində və rayon mərkəzi xəstəxanasında olub.

Paylaş:

Baxılıb: 1198 dəfə