Baş nazirin müavini Əli Həsənov: Məcburi köçkünlərin problemlərinin birdəfəlik və optimal həlli yolu onların doğma yurd-yuvalarına qayıtmalarıdır

Bakı:

16 °C

77 %

1 m/s

AZ RU EN

Ana səhifə / Siyasət / Baş nazirin müavini Əli Həsənov: Məcburi köçkünlərin problemlərinin birdəfəlik və optimal həlli yolu onların doğma yurd-yuvalarına qayıtmalarıdır

Baş nazirin müavini Əli Həsənov: Məcburi köçkünlərin problemlərinin birdəfəlik və optimal həlli yolu onların doğma yurd-yuvalarına qayıtmalarıdır

05.04.2014 [10:55]

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov ABŞ-ın Azərbaycandakı səfiri Riçard Morninqstar və səfirliyin əməkdaşlarından ibarət nümayəndə heyəti ilə görüşüb.
Görüşdə Əli Həsənov ölkələrimiz arasındakı əməkdaşlığın yaxşı əsaslar üzərində qurulduğunu, əlaqələrin yeni inkişaf mərhələsinə qədəm qoyduğunu bildirib. Baş nazirin müavini ABŞ-ın Azərbaycandakı səfirliyinin Ermənistan-Azərbaycan, Dağlıq Qarabağ münaqişəsi nəticəsində doğma yurdlarından didərgin düşmüş qaçqın və məcburi köçkün soydaşlarımıza göstərdiyi humanitar yardımlara, həyata keçirdikləri humanitar və inkişaf layihələrinə görə təşəkkürünü bildirib, bu sahədəki əməkdaşlığın mühüm əhəmiyyət daşıdığını diqqətə çatdırıb. Səfirlə əvvəlki görüşlərini xatırladan Əli Həsənov qeyd edib ki, bu insanların çoxsaylı problemlərinin birdəfəlik və optimal həlli yolu onların doğma yurd-yuvalarına qayıtmalarıdır ki, Azərbaycan Prezidenti də bu istiqamətdə ciddi səy göstərir.
Səfir R.Morninqstar görüşə gəlməyinin əsas məqsədinin qaçqın və məcburi köçkünlərin problemlərinin həlli istiqamətində Azərbaycan hökumətinin həyata keçirdiyi tədbirlərə az da olsa töhfə verməkdən, bunun üçün müxtəlif infrastruktur və digər layihələri reallaşdırmaqdan ibarət olduğunu deyib.
Müxtəlif ərazilərdə məskunlaşan məcburi köçkünlərlə görüşdən aldığı təəssüratlardan danışan səfir onlarla söhbətlər zamanı ən böyük istəklərinin doğma ocaqlarına qayıtmaqdan ibarət olmasından məmnunluğunu bildirib, ABŞ-ın bu istiqamətdə Azərbaycan hökumətinə daim dəstək verəcəyini bildirib. Bu sahədəki fəaliyyətlərini bundan sonra da davam etdirəcəklərini söyləyən diplomat Azərbaycanda gedən iqtisadi inkişafı, qaçqınların və məcburi köçkünlərin sosial şəraitinin yaxşılaşdırılması istiqamətində görülən işləri yüksək qiymətləndirib. Rəsmi Vaşinqtonun azərbaycanlı qaçqın və məcburi köçkünlərin həyat şəraitinin yaxşılaşdırılmasına hər zaman xüsusi diqqət verdiyini deyən qonaq bu istiqamətdə həyata keçiriləcək layihələrdə iştiraka hazır olduqlarını diqqətə çatdırıb.
Görüşdə Ermənistan-Azərbaycan, Dağlıq Qarabağ münaqişəsinin həlli istiqamətində bugünkü durum, bu münaqişə nəticəsində soydaşlarımızın problemlərinin həlli ilə bağlı qarşıda duran vəzifələr, eləcə də qarşılıqlı maraq doğuran digər məsələlər müzakirə olunub.

Paylaş:

Baxılıb: 747 dəfə