Nəsimi rayonunda dini icmaların nümayəndələri ilə görüş keçirilib

Bakı:

17 °C

82 %

4 m/s

Əlaqə

AZ RU EN

Ana səhifə / Siyasət / Nəsimi rayonunda dini icmaların nümayəndələri ilə görüş keçirilib

Nəsimi rayonunda dini icmaların nümayəndələri ilə görüş keçirilib

10.09.2014 [09:53]

Dünən Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Nəsimi rayonunda dini icmaların nümayəndələri ilə görüş keçirib. Əvvəlcə görüş iştirakçıları Ümummilli lider Heydər Əliyevin abidəsini ziyarət edib, önünə əklil qoyublar.
Tədbiri giriş sözü ilə açan Nəsimi rayon İcra Hakimiyyətinin başçısı Nəsib Məhəməliyev Azərbaycanda dini dəyərlərə dövlət qayğısından danışıb. Qeyd olunub ki, rayon ərazisində 3 məscid, 1 pravoslav kilsəsi, həmçinin, xristian dininə məxsus Kirxa və yəhudi sinaqoqu fəaliyyət göstərir. Nəsimi RİH-in nəzdində yaradılmış Dini Komissiya həmin dini icmaların nümayəndələri ilə mütəmadi olaraq əlaqə saxlayır və yaranan hər hansı problemi, onlar tərəfindən irəli sürülən təklifləri operativ şəkildə həll etməyə çalışır. Natiq daha sonra dini bayramlarda - istər Ramazan, istərsə də Qurban bayramında bütün vətəndaşlar kimi, xristian dininin təmsilçilərinə də yardımlar edildiyini bildirib. Prezident İlham Əliyevin respublikamızın bütün bölgələrində məscidlərin bərpasına böyük diqqət yetirdiyini deyən Nəsib Məhəməliyev, həmçinin, qeyd edib ki, məhz bu diqqət və qayğının nəticəsi olaraq son illərdə ölkəmizdə onlarla yeni məscid binası tikilərək istifadəyə verilib. O, ölkə vətəndaşlarının dövlət başçısının din sahəsinə göstərdiyi bu diqqət və qayğını dəstəklədiyini vurğulayıb.
Nəsib Məhəməliyev DQİDK-nın yeni təyin olunmuş sədri Mübariz Qurbanlının vəzifəsinin icrasına başlamasından sonra bölgələrə səfər edərək dini icmaların nümayəndələri ilə görüşlər keçirməsinin təqdirəlayiq olduğunu, bu görüşlərin əhalinin maarifləndirilməsi işində müstəsna rol oynadığını vurğulayıb.
DQİDK-nın Bakı şəhəri üzrə şöbə müdiri Anar Kazımov paytaxtın 12 rayonundan biri kimi, Nəsimi rayonunda da tolerantlıq dəyərlərinin yüksək şəkildə qorunduğunu bildirib. Onun sözlərinə görə, rayon ərazisində məscidlərin, sinaqoqların və kilsələrin yerləşməsi fərqli dini baxışlara malik insanların qarşılıqlı hörmət əsasında öz ibadətlərini yerinə yetirməsi dünyada rast gəlinən nadir nümunələrdən biri kimi dəyərləndirilməlidir.
O da bildirilib ki, əhalinin dini baxışlarının sağlam müstəvidə formalaşdırılması, gənclərin radikal fikirli insanların təsiri altına düşməməsi və din xadimlərinin bu istiqamətdə məlumatlandırılmasının təmin edilməsi üçün maarifləndirici tədbirlərin keçirilməsinə ehtiyac var.
Tədbirdə çıxış edən Dini Qurumlarla İş üzrə Dövlət Komitəsinin sədri Mübariz Qurbanlı deyib ki, Ulu öndər Heydər Əliyevin siyasi hakimiyyətə qayıdışından sonra respublikamızda dinə münasibət tamamilə dəyişib. Ölkədə milli mənəvi dəyərlərə, dinə hər zaman hörmətlə və qayğı ilə yanaşılıb. Bu siyasət hazırda Prezident İlham Əliyev tərəfindən uğurla davam etdirilir.
Mübariz Qurbanlı bildirib ki, bu gün ölkəmizdə dinlərarası münasibətlər yüksək səviyyədədir. Prezident İlham Əliyevin qayğısı ilə ölkədə yeni məscidlər tikilir, dini abidələr bərpa olunur. Bu isə dövlətin dinə olan münasibətinin bariz nümunəsidir. Komitə sədri xatırladıb ki, Sovet dövründə ölkəmizdə cəmi 17 məscid fəaliyyət göstərdiyi halda, bu gün Azərbaycanda 2050 məscid mövcuddur. Hazırda isə Bakıda dünyanın ən möhtəşəm və ən böyük məscidlərindən biri tikilir.
Qeyri-ənənəvi, radikal dini cərəyanların din adından istifadə etməklə öz ideologiyalarını yaymağa çalışmalarından danışan komitə sədri bunun qarşısının alınması məqsədilə dini icmaların fəaliyyətinin daha da gücləndirilməsinin vacibliyini vurğulayıb.
Milli Məclisin deputatları Ziyad Səmədzadə və Asim Mollazadə, QMİ-nin Nəsimi rayonu üzrə nümayəndəsi Bəhruz Əzizov, eləcə də, digər natiqlər isə çıxışlarında Azərbaycanın nəinki regionda, hətta Şərqdə özünün gücünü, iqtisadi və siyasi təhlükəsizliyini təmin edən dövlətə çevrildiyini bildiriblər. Onlar ölkəmizdəki mövcud tolerantlıq ənənələrindən, milli mənəvi dəyərlərimizə dövlət qayğısından, qeyri-ənənəvi cərəyanlara qarşı mübarizədən danışıblar.
Sonda dini icmaların nümayəndələri ilə fikir mübadiləsi aparılıb.
Səlim Loğmanoğlu

Paylaş:

Baxılıb: 696 dəfə