Eldar İbrahimov: Xəzər dənizinin hüquqi statusuna dair Konvensiya Xəzəryanı ölkələr arasında əməkdaşlıq əlaqələrinin daha da inkişafına müstəsna töhfələr verəcək

Bakı:

25 °C

61 %

5 m/s

AZ RU EN

Ana səhifə / Siyasət / Eldar İbrahimov: Xəzər dənizinin hüquqi statusuna dair Konvensiya Xəzəryanı ölkələr arasında əməkdaşlıq əlaqələrinin daha da inkişafına müstəsna töhfələr verəcək

Eldar İbrahimov: Xəzər dənizinin hüquqi statusuna dair Konvensiya Xəzəryanı ölkələr arasında əməkdaşlıq əlaqələrinin daha da inkişafına müstəsna töhfələr verəcək

15.08.2018 [09:04]

“Avqustun 12-də Qazaxıstanın Aktau şəhərində Xəzəryanı ölkələrin dövlət başçılarının V Zirvə toplantısında Xəzər dənizinin hüquqi statusuna dair Konvensiya imzalandı. Bu, 5 Xəzəryanı dövlət arasında tarixi anlaşmadır və Xəzər regionunda əməkdaşlığın inkişafına, eləcə də sabitlik və təhlükəsizliyin möhkəmləndirilməsinə xidmət edir”. Bu fikirləri “Yeni Azərbaycan” qəzetinə açıqlamasında Milli Məclisin Aqrar siyasət komitəsinin sədri, Yeni Azərbaycan Partiyasının İdarə Heyətinin üzvü Eldar İbrahimov deyib.
Onun sözlərinə görə, Xəzərin hüquqi statusu ilə bağlı razılaşmanın əldə olunmasında Azərbaycanın rolunu xüsusi olaraq qeyd etmək lazımdır: “Azərbaycan sözügedən məsələ ilə bağlı danışıqların aparıldığı müddətdə Xəzərin beynəlxalq hüquq normaları və prinsipləri çərçivəsində ədalətli bölgüsünü təklif edib. Aktau Zirvə toplantısında sənədlərin imzalanması mərasimindən sonra prezidentlərin mətbuata bəyanatlarla çıxışı zamanı Azərbaycan Respublikasının Prezidenti İlham Əliyev diqqətə çatdırdı ki, Azərbaycan bu sənədin hazırlanmasının bütün mərhələlərində konstruktiv işləyib və digər Xəzəryanı ölkələr kimi bu sənədin imzalanmasına öz töhfəsini verib”.
Yaranmış əməkdaşlıq mühitinin, eyni zamanda, beynəlxalq yükdaşımalarında Xəzəryanı ölkələrin payının artmasına mühüm töhfələr verəcəyini deyən E.İbrahimov əlavə edib ki, yeni əməkdaşlıq mühiti Şimal-Cənub və Şərq-Qərb dəhlizlərinin inkişafına da əlavə stimul olacaq.
“Xəzəryanı ölkələrin dövlət başçılarının V Zirvə toplantısında çıxış edən Azərbaycan Respublikasının Prezidenti İlham Əliyev diqqətə çatdırdı ki, Azərbaycanın Xəzəryanı ölkələrlə dostluq və mehriban qonşuluq münasibətləri uğurla inkişaf edir. Dövlətimizin başçısı bildirdi ki, ölkələrimiz arasında ikitərəfli və çoxtərəfli əməkdaşlıq əlaqələri Xəzər dənizində sabitliyin və təhlükəsizliyin mühüm amilidir”, - deyən Eldar İbrahimov əlavə edib ki, bütövlükdə, Xəzər dənizinin hüquqi statusuna dair Konvensiya Xəzəryanı ölkələr arasında əməkdaşlıq əlaqələrinin daha da inkişafına müstəsna töhfələr verəcək.

Paylaş:

Baxılıb: 559 dəfə