Biz Türkiyəni qardaş dövlət hesab edirik və bunun qarşılığını gözləyirik

Bakı:

23 °C

63 %

1 m/s

Əlaqə

AZ RU EN

Ana səhifə / Siyasət / Biz Türkiyəni qardaş dövlət hesab edirik və bunun qarşılığını gözləyirik

Biz Türkiyəni qardaş dövlət hesab edirik və bunun qarşılığını gözləyirik

16.10.2009 [09:44]

Ziyafət Əsgərov: İşğal olunmuş torpaqlarımız azad edilməyincə, Türkiyə ilə Ermənistan arasında sərhədlər açılsa, bu, Azərbaycana arxadan zərbə olacaq
“Türkiyə-Ermənistan münasibətləri ilə bağlı Azərbaycanın mövqeyi əvvəlcədən məlumdur və indi də öz mövqeyimizdə qalırıq. Biz bu protokolların imzalanmasının əleyhinə olmuşuq”. Bu sözləri Milli Məclis sədrinin müavini, parlamentin Təhlükəsizlik və müdafiə komitəsinin sədri Ziyafət Əsgərov Türkiyə ilə Ermənistan arasında imzalanmış protokollara münasibət bildirərkən deyib.
Z.Əsgərov xatırladıb ki, Türkiyənin dövlət və hökumət rəsmiləri həm Azərbaycanda səfərdə olanda, həm də öz ölkələrində bəyan ediblər ki, işğalçılıq siyasətinə son qoymayana qədər Ermənistanla sərhədlər açılmayacaq. Amma bu bəyanatı verə-verə protokolları imzaladılar. Parlamentin birinci vitse-spikeri protokolların imzalanmasında məntiq görmədiyini də vurğulayıb: “çünki Ermənistan və Qərbin rəsmiləri həmişə belə fikirlər söyləyirdilər ki, protokolların imzalanmasını Dağlıq Qarabağ problemi ilə eyniləşdirmək olmaz. Biz isə hər iki məsələnin paralel şəkildə müzakirə edilməsinin tərəfdarı olmuşuq. Sürixdə protokolların imzalanması prosesində Minsk qrupunun həmsədr dövlətlərinin xarici işlər nazirləri iştirak etdilər. Bir tərəfdən deyirlər ki, bunlar ayrı-ayrı proseslərdir, digər tərəfdən həmsədr ölkələrin xarici işlər nazirləri iştirak edir. Bu fakt onu göstərir ki, bu proses birbaşa Dağlıq Qarabağ məsələsi ilə əlaqəlidir”.
Z.Əsgərov bildirib ki, indiki şəraitdə sərhədlərin açılması Azərbaycanın mənafeyinə və maraqlarına ziddir. Onun fikrincə, işğal olunmuş torpaqlarımız azad edilməyincə sərhədlər açılsa, bu, Azərbaycana “arxadan zərbə”, Türkiyənin ölkəmizin “kürəyinə vurduğu xəncər” olacaq. “çünki bu hərəkət Azərbaycanla Türkiyə arasında olan dostluq və qardaşlıq əlaqələrinin məntiqinə və ruhuna uyğun gəlmir. Dost və qardaş ölkələr arasında belə hallar yaşanmamalıdır. Biz Türkiyəni qardaş dövlət hesab edirik və bunun qarşılığını gözləyirik. İnanmaq istərdim ki, Türkiyə parlamentində həmin protokollar təsdiq olunmayacaq. Türkiyənin prezidenti, baş naziri, parlament sədri və xarici işlər naziri öz bəyanatlarına sadiq qalmalıdır. ümid edirəm ki, onların hərəkətləri Azərbaycan və türk xalqlarının qardaşlığına heç bir xələl gətirməyəcək”, - deyə Milli Məclis sədrinin birinci müavini vurğulayıb.

Paylaş:

Baxılıb: 1291 dəfə