Millilik və ziyalılıq rəmzi - İsa Həbibbəyli 60 il

Bakı:

22 °C

66 %

5 m/s

Əlaqə

AZ RU EN

Ana səhifə / Siyasət / Millilik və ziyalılıq rəmzi - İsa Həbibbəyli 60 il

Millilik və ziyalılıq rəmzi - İsa Həbibbəyli 60 il

20.10.2009 [02:37]

Naxçıvan Dövlət Universitetində (NDU) universitetin rektoru, akademik, Əməkdar elm xadimi, millət vəkili İsa Həbibbəylinin 60 illik yubileyi qeyd olunub. Yubiley mərasimi universitet televiziyasının İsa Həbibbəylinin 60 illik mənalı və şərəfli ömür yolunu əks etdirən “Ziyalı ömrü” filminin nümayişi ilə başlayıb. Tədbiri giriş sözü ilə açan AMEA-nın naxçıvan Bölməsinin sədri, akademik İsmayıl Hacıyev yubilyarın həyat və yaradıcılığı haqqında ətraflı məruzə edib. Məruzədə qeyd olunub ki, ziyalı mühitdə doğulub boya-başa çatan İsa Həbibbəyli 1967-ci ildə Azərbaycan Dövlət Pedaqoji İnstitutunun Naxçıvan filialına qəbul olub, hələ tələbəlik illərindən öz dərin bilik və təfəkkürü, fəal ictimailiyilə, elmi konfranslardakı, mərkəzi mətbuatdakı çıxışları ilə elmi-pedaqoji mühitin maraq və diqqətini cəlb edib, 1970-ci ildə akademik Məmməd Cəfər Cəfərovla tanışlıqdan sonra qəti şəkildə elm yolunu seçib. Bir müddət doğma kəndində pedaqoji fəaliyyət göstərən İsa Həbibbəyli 1975-ci ildə taleyini, varlığını həmişəlik olaraq doğma universitetlə bağlayıb. Məruzəçi 1996-cı ildən universitetə rektorluq edən İsa Həbibbəylinin NDU-nun hərtərəfli inkişafındakı, dünyada tanınmasındakı xidmətlərindən danışıb, Azərbaycandakı ali təhsil quruculuğu sahəsindəki əvəzsiz rolundan bəhs edib. Məruzədə İsa Həbibbəylinin görkəmli elm xadimi kimi uzun illər apardığı çoxsaylı elmi tədqiqatlar, ədəbiyyatşünaslıq elminə, milli mətbuat tarixinə gətirdiyi qiymətli elmi yeniliklər qeyd olunub. Natiq İsa Həbibbəylinin millət vəkili kimi fəaliyyətindən söz açıb, ictimai xadim kimi dövlətçilik və azərbaycançılıq ideyalarının təbliğinə, milli məfkurənin inkişafına böyük dəyər verdiyini vurğulayıb.
Sonra Naxçıvan MR Ali Məclisinin Sədrinin I müavini Azər Zeynalov Muxtar Respublika rəhbərliyinin təbriklərini çatdırıb, taleyini xalqına xidmətlə bağlayan, milli ziyalılığın ən yüksək daşıyıcısı, çoxlarının mənəvi idealına çevrilmiş akademik, millət vəkili İsa Həbibbəyli bundan sonrakı elmi-ictimai fəaliyyətilə gələcək nəsillərə örnək olacağını bildirib. Yubilyara Naxçıvan MR Ali Məclisinin fəxri fərmanı təqdim olunub.
Məhşur rus tarixçi-qafqazşünası, Rusiya Yazıçılar və Jurnalistlər birliklərinin üzvü, professor Rudolf İvanov akademik İsa Həbibbəylinin vətənpərvər və maarifpərvər ziyalı, fədakar alim, səmimi dost kimi əxlaqi-mənəvi dəyərlərindən danışıb. O, Beynəlxalq İnformasiyalaşdırma Akademiyasının “XIX-XX əsrlər Azərbaycan ədəbiyyatının (Mirzə Cəlilin) və Azərbaycanda müasir elmi-bədii fikrin tədqiqatının elmi istiqamətinin banisi” mükafatını - diplom və medalını yubilyara təqdim edib.
Naxçıvan Müəllimlər İnstitutunun rektoru, professor Sadıq Vəliyev, tələbələr adından universitet YAP Gənclər Birliyinin sədri Elçin Əliyev akademiki təbrik edərək milli elmimizin, maarifimizin tərəqqisində fədakar əməyi olan, elmşünaslıqda öz imzasını qoyan, dünya elm, təhsil sisteminin ən müasir yeniliklərinin tətbiqinə tükənməz maraq göstərən İsa Həbibbəyliyə gələcək fəaliyyətində uğurlar diləyiblər.
Sonda akademik İsa Həbibbəyli yubiley tədbirinin təşkilatçılarına minnətdarlığını bildirib, bunu Azərbaycan elminin, təhsilinin inkişafına göstərilən diqqət və qayğı kimi qiymətləndirib, bundan sonra da gənc nəslin yetişməsi, milli vətənpərvərlik ruhunda təhsil və tərbiyə almaları üçün var qüvvəsini əsirgəməyəcəyini bildirib.
Tədbir iştirakçıları NDU-nun Elmi kitabxanasının hazırladığı, İsa Həbibbəylinin 60 illik mənalı həyatını və zəngin yaradıcılığını əks etdirən sərgi ilə tanış olublar.
Mehriban Sultan
NDU-nun Mətbuat şöbəsinin müdiri

Paylaş:

Baxılıb: 1243 dəfə