“Rəsmi Bakı Ermənistanı danışıqlar masasına qayıtmağa məcbur etdi”

Bakı:

25 °C

56 %

9 m/s

Əlaqə

AZ RU EN

Ana səhifə / Siyasət / “Rəsmi Bakı Ermənistanı danışıqlar masasına qayıtmağa məcbur etdi”

“Rəsmi Bakı Ermənistanı danışıqlar masasına qayıtmağa məcbur etdi”

28.03.2019 [09:33]

“ATƏT-in Minsk qrupunun həmsədrlərinin təklifi əsasında Azərbaycan Respublikasının Prezidenti İlham Əliyev və Ermənistan Respublikasının baş naziri Nikol Paşinyanın Ermənistan-Azərbaycan Dağlıq Qarabağ münaqişəsinin həlli üzrə müzakirələr aparmaq məqsədilə 29 mart tarixində Avstriyanın paytaxtı Vyana şəhərində görüşünün keçirilməsi barədə razılıq əldə olunub. Əslində, Azərbaycan tərəfi bu görüşlə Ermənistanı danışıqlar masasına qayıtmağa məcbur etmiş oldu. Çünki Paşinyan müxtəlif siyasi manipulyasiyalarla məsuliyyətdən yayınmağa, Ermənistanı bu günə qədərki həyata keçirdiyi işğalçılıq siyasətindən kənarda tutmağa çalışırdı və bu günə qədər artıq formalaşmış danışıqlar formatını dəyişməyə cəhd göstərirdi. Ancaq Azərbaycan buna yol vermədi”. Bunu SİA-ya açıqlamasında “Yeni Azərbaycan” qəzetinin baş redaktoru, millət vəkili Hikmət Babaoğlu deyib.
“Biz bilirik ki, ötən bir il müddətində Paşinyanın bu cəhdlərinə qarşı rəsmi Bakı həm diplomatik müstəvidə, həm hərbi, siyasi müstəvidə ciddi qərarlar həyata keçirməklə və ciddi addımlar atmaqla onun bu cəhdlərini tamamilə neytrallaşdırdı və danışıqlar masasına qayıtmağa məcbur etdi. Bunun bir istiqaməti, heç şübhəsiz ki, beynəlxalq təşkilatlarla iş oldu. Azərbaycan tərəfinin təzyiqindən sonra ATƏT-in Minsk qrupunun həmsədrləri danışıqlar formatının dəyişməz olduğunu bir daha bəyan etdilər. Bunun ardınca isə Avropa İttifaqının rəsmiləri eyni bəyanatı təkrar etdilər. Buna paralel olaraq Azərbaycan təmas xəttində hərbi güc nümayiş etdirməklə bir daha Azərbaycan Ordusunun nəyə qadir olduğunu işğalçı ölkəyə göstərdi. Danışıqlar olmazsa, onun yeganə alternativinin müharibə ola biləcəyi reallığını Ermənistana xatırlatdı”, - deyə Hikmət Babaoğlu qeyd edib.
Deputatın sözlərinə görə, həyata keçirilən bu işlər, atılan addımlar, nümayiş etdirilən bu qətiyyət Paşinyanı məcbur etdi ki, Azərbaycan Prezidenti ilə görüşə razılıq versin: “Burada qətiyyən formatın dəyişdirilməsindən söhbət gedə bilməz. Hətta onun dəyişdiriləcəyinə Ermənistanda ən optimist siyasətçi belə inanmır. Çünki Ermənistanın daxili auditoriyasında da, mətbuatında da bunun baş tutmayacağına əmindirlər. Əgər biz Ermənistanın informasiya resurslarını izləsək, görəcəyik ki, Paşinyanın danışıqlardan imtina edə biləcəyi Ermənistan cəmiyyətində, əslində, müharibənin başlaması xəbərdalığı kimi də qəbul olunurdu. Görünür, ermənilərin keçirdiyi son Təhlükəsizlik Şurasının iclasında da bu məsələlər geniş götür-qoy edildi və bir daha Azərbaycanın real gücü, real beynəlxalq nüfuzu nəzərə alındıqdan sonra Paşinyan bu cür danışıqlara razılıq vermiş oldu. Bu, bir növ, Azərbaycanın işğalçı Ermənistanı yenidən danışıqlar masasına qayıtmağa məcbur etməsi kimi qiymətləndirilməlidir. Əks təqdirdə, Azərbaycanın həm iqtisadi gücü, həm siyasi gücü, həm də beynəlxalq nüfuzu ona imkan verir ki, Azərbaycan digər vasitələrlə öz torpaqlarını azad etsin. Mən düşünürəm ki, bu reallığı Paşinyan qiymətləndirməlidir və nəhayət, 2019-cu ildə gözlədiyimiz substantiv danışıqlar başlamalıdır”.

Paylaş:

Baxılıb: 574 dəfə