Azərbaycanda ordu quruculuğunun yüksək inkişafı Ermənistanı qorxuya salıb

Bakı:

13 °C

71 %

9 m/s

Əlaqə

AZ RU EN

Ana səhifə / Siyasət / Azərbaycanda ordu quruculuğunun yüksək inkişafı Ermənistanı qorxuya salıb

Azərbaycanda ordu quruculuğunun yüksək inkişafı Ermənistanı qorxuya salıb

18.02.2010 [21:43]

Ermənilər ölkəmizin hərbi cəhətdən üstünlüyünü etiraf edirlər
Ermənistan-Azərbaycan, Dağlıq Qarabağ münaqişəsinin uzun illərdir həll edilməməsi, işğalçı rəsmi İrəvanın zorakılığa əsaslanan siyasətindən əl çəkməməsi Cənubi Qafqaz regionunda sabitliyi hər zaman təhlükə altında saxlayır. Azərbaycanın 20 faiz torpaqlarını işğal altında saxlayan Ermənistan bütün beynəlxalq prinsipləri, insan haqları, o cümlədən, ərazi bütövlüyünün toxunulmazlığını özündə əks etdirən konvensiyaları pozaraq bölgədə müharibə şəraitinin davam etməsinə çalışır.
İllərdir istər beynəlxalq təşkilatları, istərsə də ayrı-ayrı dövlətləri öz yalançı təbliğatı ilə aldatmaq istəyən Ermənistan rəhbərliyi bu cəhdlərin faydasızlığını dərk edir. Ermənistan artıq anlayır ki, yürütdüyü qeyri-konstruktiv, zorakılığa əsaslanan siyasət fiaskoya uğramaqdadır. Bu gün bütün dünya Dağlıq Qarabağı tarixi Azərbaycan torpaqları kimi qəbul edir və hər bir ölkə Azərbaycanla əlaqələrinin inkişafına xüsusi diqqət ayırır. Bu isə, son nəticədə aparılan danışıqlar prosesində balansın Azərbaycanın xeyrinə dəyişməsinə təkan verir. Maraqlıdır ki, bunu Ermənistan siyasətçiləri də təsdiq etmək məcburiyyətində qalırlar. Bir müddət öncə Erməni Milli Konqresinin əlaqələndiricisi Levon Zurabyan İrəvanda keçirdiyi mətbuat konfransında hərbi-siyasi balansın Azərbaycanın xeyrinə dəyişdiyini bildirib. Onun sözlərinə görə, hərbi-siyasi balans Azərbaycanın xeyrinə dəyişdiyindən, məsələnin hərbi yolla həllinin mümkünlüyü ilə bağlı gərginlik artır. Ermənistan müxalifətinin nümayəndəsi hesab edir ki, Serj Sarkisyan rejiminin güzəştə getməsinin səbəbi də bununla bağlıdır: “Ermənistan hakimiyyətinin bu gün güzəştlərə getməsinin əsl səbəbi hərbi-siyasi balansın dəyişməsidir”.
L.Zurabyan etiraf edib ki, bugünkü Azərbaycan özünün hərbi, iqtisadi və digər resursları ilə Ermənistandan dəfələrlə güclüdür.
Bəli, bu bir həqiqətdir Azərbaycan Cənubi Qafqazın lider dövlətidir və öz iqtisadi inkişaf tempinə görə dünyada öncül ölkələrdən biri kimi qəbul edilir. Əsası ümummilli lider Heydər Əliyev tərəfindən qoyulan iqtisadi siyasətimizin Prezident İlham Əliyev tərəfindən uğurla inkişaf etdirilməsi nəticə etibarı ilə ölkəmizin həm də Dağlıq Qarabağ münaqişəsinin tənzimlənməsi istiqamətində aparılan proseslərdə üstünlük əldə etməsinə gətirib çıxarıb. Bu üstünlük isə özünü hərbi sahədə daha aşkar büruzə verir.
Azərbaycan hər zaman münaqişənin sülh yolu ilə tənzimlənməsinə tərəfdar olduğunu nümayiş etdirib. Problemin tənzimlənməsi istiqamətində aparılan istər ikitərəfli, istərsə də çoxtərəfli danışıqlar prosesində Azərbaycan münaqişənin yalnız ərazi bütövlüyü çərçivəsində həllinin mümkünlüyünü bildirib. Qeyri-konstruktiv mövqeyi ilə hər zaman danışıqlar prosesinə maneçilik törədən erməni tərəfi isə müxtəlif bəhanələrlə bu durumun uzanmasını istəyir. Amma Azərbaycan Prezidentinin də hər zaman vurğuladığı kimi hazırkı situasiya daha bir neçə il uzana bilməz və ölkəmiz öz torpaqlarını istənilən yolla işğaldan azad etməyə hazırdır. Bu gün Azərbaycan öz ordu, silah-sursat potensialına görə, Ermənistandan dəfələrlə öndədir. Bir faktı qeyd etmək kifayətdir ki, Ermənistanın ianələr əsasında formalaşan dövlət büdcəsi Azərbaycanın dövlət büdcəsindən hərbi xərclərə ayrılan vəsaitlə eyni həcmdədir. Bu isə, ölkəmizin iqtisadi qüdrətinin hərbi sahəyə yönəldilməsində əldə olunan uğurlardan xəbər verir və Ermənistan tərəfinin də etiraf etdiyi kimi, prosesdə balans Azərbaycanın xeyrinə dəyişir.
Ordu quruculuğu, ordunun müasirləşdirilməsi, inkişaf etdirilməsi hər zaman Azərbaycan dövləti üçün prioritet sayılıb. Məhz bu amil bu gün Azərbaycan ordusunun qarşıda duran istənilən vəzifəni uğurla icra etməsinə imkan verir. Bu gün Azərbaycanın hərbi sənayesi yüksək templə inkişaf edir, ölkəmiz silah istehsalını reallaşdırır. Bu isə, gələcəkdə Dağlıq Qarabağ münaqişəsinin mümkün hərbi yolla həllində Azərbaycanın üstünlüyünün təminatında həlledici rolunu oynayacaq. Ermənistan isə uzun illərdir davam etdirdiyi işğalçılıq siyasəti nəticəsində istər bölgədə reallaşan qlobal layihələrdən, istərsə də regiondakı inkişaf tempindən kənarda qalıb. Məhz bu amil bu gün Ermənistanı dərindən fikirləşməyə məcbur edir. Bu baxımdan, erməni siyasətçisinin etirafları başadüşüləndir. Artıq Azərbaycanın aşkar üstünlüyünü görən Ermənistan hakimiyyəti məsələni konstruktiv yolla həll etməyə məcburdur. Əks halda, özlərinin də qeyd etdiyi kimi, Azərbaycan hərbi üstünlüyündən real şəkildə istifadə etmək məcburiyyətində qalacaq.
Pərviz SADAYOÄžLU

Paylaş:

Baxılıb: 1113 dəfə