Azərbaycan milli təhlükəsizlik orqanlarının yaranmasının 91-ci ildönümü qeyd edilib

Bakı:

22 °C

73 %

0 m/s

Əlaqə

AZ RU EN

Ana səhifə / Siyasət / Azərbaycan milli təhlükəsizlik orqanlarının yaranmasının 91-ci ildönümü qeyd edilib

Azərbaycan milli təhlükəsizlik orqanlarının yaranmasının 91-ci ildönümü qeyd edilib

30.03.2010 [08:16]

Azərbaycan milli təhlükəsizlik orqanlarının yaranmasından 91 il ötür. Bu münasibətlə milli təhlükəsizlik naziri, general-leytenant Eldar Mahmudov başda olmaqla nazirliyin şəxsi heyəti Fəxri Xiyabanda xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad edib, görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üstünə tər güllər düzülüb. Sonra Şəhidlər Xiyabanında Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsi anılıb, məzarları üzərinə qərənfillər düzülüb. Milli Təhlükəsizlik Nazirliyinin (MTN) İctimai Əlaqələr Mərkəzindən APA-ya verilən məlumata görə, daha sonra nazirliyin Heydər Əliyev adına Akademiyasında təntənəli mərasim keçirilib. Əvvəlcə yeni inşa olunan MTN-in İdman Sağlamlıq Mərkəzinin açılışı olub. Milli təhlükəsizlik naziri Eldar Mahmudov rəmzi açılışı bildirən lenti kəsib, Mərkəzdə yaradılan şəraitlə tanış olub. Nazir Eldar Mahmudov ən müasir şəraitlə təmin olunmuş idman və sağlamlıq mərkəzinin qısa müddət ərzində tikilərək Akademiyanın kursantlarının, dinləyicilərinin, ümumən nazirliyin bütün şəxsi heyətinin istifadəsinə verilməsinin Azərbaycan prezidenti, Silahlı Qüvvələrin Ali Baş Komandanı İlham Əliyevin milli təhlükəsizlik orqanlarına diqqət və qayğısının bariz təzahürü olduğunu bildirib. Daha sonra mərasim Akademiyanın sıra meydanda davam etdirilib. Akademiyanın döyüş bayrağı təntənəli şəkildə meydana gətirilib, Ulu öndər Heydər Əliyevin xatirəsi bir dəqiqəlik sükutla yad edilmiş, dövlət himni səsləndirilib. E.Mahmudov hazırda Azərbaycanın təhlükəsizlik orqanlarının öz inkişafında yeni mərhələyə qədəm qoyduğunu, dövlətin daxili və xarici siyasəti üçün əlverişli şərait yaradılmasının milli təhlükəsizlik orqanlarının əsas vəzifələrindən olduğunu qeyd edib.
Qeyd olunub ki, ən sabit və sürətlə inkişaf edən ölkə kimi tanınmış Azərbaycan transmilli mütəşəkkil cinayətkar birləşmələr, beynəlxalq terrorçu təşkilatlar üçün də maraq doğurur, onlar ölkəmizə hədəf, tranzit və təyinat məntəqəsi kimi baxırlar. Lakin MTN beynəlxalq terrorçuluğa və transmilli mütəşəkkil cinayətkarlığın müxtəlif təzahürlərinə qarşı mübarizədə ardıcıl və məqsədyönlü fəaliyyət göstərir. Azərbaycanda vaxtında görülmüş qabaqlayıcı tədbirlər nəticəsində ekstremist-terrorçu niyyətlərin və konkret cinayətkar hərəkətlərin qarşısı qətiyyətlə alınır.
Nazir Eldar Mahmudov Azərbaycan Prezidenti İlham Əliyev tərəfindən aparılan fəal hüquq mühafizə siyasəti nəticəsində Azərbaycanda sabitlik və təhlükəsizliyin qorunub saxlanıldığını və daha da möhkəmləndirildiyini xüsusi vurğulayıb.
Tədbirdə çıxış edən Akademiyanın rəisi general-leytenant Ziya Yusifzadə deyib ki, indi MTN yeni tarixini yaşayır. Müasir dünyanın ən inkişaf etmiş təhlükəsizlik orqanlarının bərabər səviyyəli tərəfdaşına çevrilən MTN müasir texniki bazaya, bacarıqlı və peşəkar kadrlara malikdir. Sonra kursantlar təntənəli marşla tribunanın önündən keçiblər. Tədbirin sonunda MTN-in Heydər Əliyev adına Akademiyasındakı “Şöhrət” muzeyində mükafatlandırma mərasimi keçirilib, xidməti fəaliyyətdə fərqlənən əməkdaşlarına medallar və Fəxri fərmanlar təqdim olunub.

Paylaş:

Baxılıb: 1462 dəfə