Ermənistan yenə də mülki əhalini hədəfə almaqla növbəti müharibə cinayəti törətdi

Bakı:

22 °C

64 %

8 m/s

Əlaqə

AZ RU EN

Ana səhifə / Siyasət / Ermənistan yenə də mülki əhalini hədəfə almaqla növbəti müharibə cinayəti törətdi

Ermənistan yenə də mülki əhalini hədəfə almaqla növbəti müharibə cinayəti törətdi

29.10.2020 [08:45]

Ekspertlərin fikrincə, düşmən döyüş meydanında açıq məğlubiyyətinin əvəzini dinc vətəndaşlardan çıxmağa çalışır
Xəbər verildiyi kimi, oktyabrın 27-də saat 16 radələrində erməni silahlı qüvvələri əldə olunan humanitar atəşkəs razılığını pozaraq Bərdə rayonunun Qarayusifli kəndini və oktyabrın 28-də Bərdə şəhərinə müxtəlif istiqamətlərdən ağır artilleriyadan atəşə tutub. ANAMA-nın yaydığı məlumata görə, Bərdə rayonuna “Smerç” qurğusundan kasetli raketlər atılıb. Yeri gəlmişkən, bu kimi kasetli raketlərdən istifadə olunması müxtəlif hərbi konvensiyalara görə qadağandır və Ermənistan bu addımı ilə növbəti dəfə açıq müharibə cinayəti törədib. Ermənilərin bu xain hücumu nəticəsində oktyabrın 27-də 4 nəfər mülki şəxs, o cümlədən azyaşlı uşaq həyatını itirib, 13 nəfər ciddi xəsarət alıb, oktyabrın 28-də isə 21 nəfər həyatını itirib, 70 nəfər isə ciddi xəsarət alıb.
Göründüyü kimi, Ermənistan növbəti dəfə humanitar atəşkəsi pozaraq beynəlxalq hüquqa və razılaşmalara riayət etmədiyini ortaya qoydu. Oktyabr ayında 2 dəfə Gəncəyə edilən xain raket hücumlarının ardından cəbhə xəttindən aralıda yerləşən Bərdə şəhərinin də qadağan olunan silahlarla atəşə tutulması bir daha bu ölkənin işğalçı və təcavüzə söykənən siyasətdən əl çəkmədiyini göstərir.
Məsələ ilə bağlı fikirlərini bölüşən Milli Məclisin deputatı Sevinc Hüseynova bildirib ki, humanitar atəşkəsin əldə olunmasına baxmayaraq Ermənistan silahlı qüvvələrinin Bərdə rayonuna kasetli raket hücumlarının həyata keçirməsi, mülki əhalinin yaşadığı əraziləri hədəfə alması bu ölkənin faşist mahiyyətindən xəbər verir. Əhalinin sıx yaşadığı ərazilərə, kəndlərə və qəsəbələrə raket hücumunun həyata keçirilməsində əsas məqsədin çoxlu sayda insanın qətlə yetirilməsi olduğunu dilə gətirən millət vəkili onu da bildirib ki, işğalçı dövlətin bu əməlləri cinayət xarakteri daşıyır: “Azərbaycan dövləti humanitar atəşkəsə, müharibə qanunlarına riayət edir, mülki əhalinin yaşadığı ərazilərə qarşı heç bir silah işlədilmir. Döyüş meydanında rəzil günə düşmüş, açıq məğlubiyyətə uğramış Ermənistan tərəfi isə məğlubiyyətinin acığını mülki əhalidən çıxmağa çalışır. Onlar bu cür xain hücumlarla insanlarda qorxu yaratmağa cəhd göstərirlər. Təbii ki, onların bu cəhdləri nəticəsizdir və Azərbaycan dövləti, xalqı birmənalı şəkildə torpaqlarımızın işğaldan azad edilməsində qətiyyət nümayiş etdirir. Ən üzücüsü isə, həlak olan, yaralanan vətəndaşlarımız arasında azyaşlı körpələrin olmasıdır. Bu, Ermənistanın faşist zehniyyətə malik olduğunu bir daha isbatlayır. Ermənistanın hərbi-siyasi rəhbərliyinin tutduğu terrorçu mövqe onların sülh yolu ilə torpaqları geri qaytarmayacağını bir daha yəqinləşdirir. Humanitar atəşkəs müddətində də beynəlxalq hüququn prinsip və qaydalarına məhəl qoymayan Ermənistanla, yalnız güc dili ilə danışmaq lazımdır”.
Milli Məclisin deputatı Kamilə Əliyeva da bildirib ki, Ermənistanın Bərdə rayonunun kəndlərini və rayon mərkəzini ağır artilleriyadan, qadağan olunan raketlərdən atəşə tutması həm də onu göstərir ki, işğalçı ölkə əvvəlki illərdə olduğu kimi, dünya ictimaiyyətinin çağırışlarını heçə sayır, bütün beynəlxalq konvensiyaları kobud şəkildə pozmaqda davam edir. Millət vəkili onu da qeyd edib ki, Ermənistan ordusu humanitar atəşkəs rejiminə qəti şəkildə riayət etmir. K.Əliyevanın sözlərinə görə, cəbhə xəttindən kənarda yerləşən, mülki əhalinin yaşadığı ərazilərə raketlər vasitəsilə edilən hücum işğalçı dövlətin təcavüzkar xislətini bir daha sübut edir: “Ermənistanın bu barbar və vəhşi hücumu nəticəsində yaşayış binaları dağılıb, evlərə ziyan dəyib, mülki şəxslər həlak olub və ciddi xəsarətlər alaraq yaralanıb. Bu, müharibə cinayətidir. Ermənistan bu cinayət əməli ilə bir daha sübut etdi ki, əldə olunan razılaşmaya heç zaman əməl etməyib. Nə qədər ki, beynəlxalq ictimaiyyətdə hələ də ikili standartlar davam edir, bəzi ermənipərəst dövlətlər Ermənistanı açıqca dəstəkləyir, bu cinayətlər davam edəcək. Dünya ictimaiyyətini, xüsusilə BMT, ATƏT və digər beynəlxalq təşkilatları çoxlu sayda günahsız uşaq və qadını qətlə yetirən Ermənistana qarşı ciddi addımlar atmağa, təcavüzkarı dayandırmağa və bu vəhşiliyi və vandalizm aktını qəti şəkildə pisləməyə çağırırıq”.
Pərviz SADAYOĞLU

Paylaş:

Baxılıb: 421 dəfə