Ramin Məmmədov: Azərbaycan dövləti və xalqı ölkəmizin ərazi bütövlüyünü təmin etməkdə qərarlıdır

Bakı:

23 °C

57 %

1 m/s

Əlaqə

AZ RU EN

Ana səhifə / Siyasət / Ramin Məmmədov: Azərbaycan dövləti və xalqı ölkəmizin ərazi bütövlüyünü təmin etməkdə qərarlıdır

Ramin Məmmədov: Azərbaycan dövləti və xalqı ölkəmizin ərazi bütövlüyünü təmin etməkdə qərarlıdır

05.11.2020 [08:41]

Moldova mətbuatında Milli Məclisin deputatı, YAP Siyasi Şurasının üzvü Ramin Məmmədovun müsahibəsi dərc olunub. “Timpul.md” xəbər portalında yayılan müsahibədə deputat Moldovada keçirilən prezident seçkilərini müşahidə etmək üçün bu ölkəyə səfər etmiş Azərbaycandan olan nümayəndə heyətinin təəssüratları haqqında fikrilərini bildirib. Deputat qeyd edib ki, Moldovada ən xoş təsir bağışlayan seçicilərin yüksək fəallığı olub: “Seçki prosesini qiymətləndirmək üçün bir neçə mühüm meyar var ki, biz Moldovada səsvermənin bu meyarların hər birinə cavab verdiyinin şahidi olduq. Təşviqat kampaniyasında namizədlərə yaradılan bərabər şərait, dövlət strukturlarının operativ, şəffaf və dəqiq fəaliyyət mexanizmi, vətəndaşların fəallığı, səsvermə prosesinin olduqca şəffaf keçməsi - bütün bunlar ümumi mənzərə haqqında yalnız müsbət fikir söyləməyə əsas verir”.
Azərbaycan-Moldova münasibətləri haqqında danışan Ramin Məmmədov Moldovanın Azərbaycan üçün çox önəmli tərəfdaş ölkələrdən biri olduğunu diqqətə çatdırıb. İki ölkənin xalqlarını bir-birinə səmimi dostluq tellərinin bağladığını vurğulayıb.
Milli Məclisin deputatı Ermənistan-Azərbaycan Dağlıq Qarabağ münaqişəsinin tarixi haqqında da danışıb. Qeyd edib ki, Ermənistan Azərbaycan torpaqlarının 20 faizini işğal edib, nəticədə bir milyon azərbaycanlı məcburi köçkünə çevrilib. Azərbaycan xalqına qarşı 1992-ci ilin 26 fevralında Xocalı soyqırımı kimi dəhşətli cinayət törədilib. BMT Təhlükəsizlik Şurası münaqişə ilə bağlı 4 qətnamə qəbul etsə də, bu sənədlərin heç biri yerinə yetirilməyib. Azərbaycan məsələnin dinc yolla həlli üçün bütün imkanlara əl atdı. Lakin bu, Ermənistanda Azərbaycanın öz torpaqlarını azad etmək üçün başqa varianta əl ata bilməyəcəyi kimi yanlış təsəvvür formalaşdırdı. Azərbaycanı çəkindirmək, öz ərazilərindən imtina etməyə vadar etmək üçün Ermənistan yeni hərbi təxribatlar törətdi. Nəticədə, Azərbaycan Ordusu cavab verməyə məcbur oldu.
Deputat bildirib ki, əks-hücum əməliyyatları nəticəsində Azərbaycan Ordusu torpaqlarımızın mühüm bir hissəsini işğaldan azad edib. Buna baxmayaraq, Azərbaycan yenə də məsələnin sülh yolu ilə həllinə tərəfdardır. Təəssüf ki, Ermənistan ötən müddətdə humanitar atəşkəs haqqında əldə olunan 3 razılaşmanı hər dəfə pozaraq, işğaldan azad etdiyimiz əraziləri geri qaytarmağa cəhd göstərdi. Ermənistan dinc sakinlərin yaşadığı, münaqişə bölgəsindən uzaqda yerləşən yaşayış məskənlərini atəşə tutmaqla bizi qorxutmağa çalışır. Sentyabrın 27-dən indiyədək 90-dan çox dinc sakinimiz həlak olub, yüzlərlə dinc sakin yaralanıb.
Ramin Məmmədov Azərbaycan dövləti və xalqının ölkəmizin ərazi bütövlüyünü təmin etməkdə qərarlı olduğunu diqqətə çatdırıb.

Paylaş:

Baxılıb: 620 dəfə