Fatma Yıldırım: Şanlı Azərbaycan Ordusunun qarşısında dayana bilməyən Ermənistanın muzdlu dəstələrə ümid bəsləməsi əbəsdir

Bakı:

25 °C

60 %

1 m/s

AZ RU EN

Ana səhifə / Siyasət / Fatma Yıldırım: Şanlı Azərbaycan Ordusunun qarşısında dayana bilməyən Ermənistanın muzdlu dəstələrə ümid bəsləməsi əbəsdir

Fatma Yıldırım: Şanlı Azərbaycan Ordusunun qarşısında dayana bilməyən Ermənistanın muzdlu dəstələrə ümid bəsləməsi əbəsdir

06.11.2020 [09:24]

“Təcavüzkar Ermənistan silahlı qüvvələri rəşadətli Azərbaycan Ordusunun gücü qarşısında aciz qalıb. Çıxılmaz vəziyyətə düşən Ermənistanın baş naziri Nikol Paşinyan çıxış yolunu xarici ölkələrdən dəstək istəməkdə görür”. Bu fikirləri Milli Məclisin deputatı Fatma Yıldırım deyib.
F.Yıldırım bildirib ki, Paşinyanın Rusiya Prezidenti Vladimir Putinə məktub yazaraq ondan kömək istəməsi dediklərimizi bir daha təsdiq edir. Diqqətçəkən məqam ondan ibarətdir ki, V.Putin Paşinyanın məktubuna cavab verməyib. Sadəcə, bu məsələyə Rusiya Xarici İşlər Nazirliyinin mətbuat katibi səviyyəsində cavab verilib və Paşinyana bir daha xatırladılıb ki, döyüşlər Ermənistan ərazisində getmir. Bu o deməkdir ki, Azərbaycan öz ərazisində işğalçılara qarşı hərbi əməliyyatlar apardığı üçün üçüncü dövlətlər bu məsələyə qarışa bilməzlər. Yəqin Paşinyan elə bilir ki, rəhbərlik etdiyi ölkə beynəlxalq qayda-qanunları pozduğu kimi, başqaları da belə addım ata bilər. Halbuki, bu gün təcavüzkar Ermənistan beynəlxalq hüququ pozduğuna görə Ordumuz tərəfindən cəzasını alır. Beləliklə, Paşinyanın məktubunun cavabsız qalması işğalçı Ermənistanın mövcud durumunu əyani şəkildə göstərir.
Deputatın sözlərinə görə, bu hadisədən sonra Nikol Paşinyanın “Əl-Cəzirə” telekanalına müsahibəsi zamanı “Rusiya Minsk qrupunun həmsədridir, vasitəçidir və bu statusuna görə öz neytrallığını qoruyub saxlamalıdır” açıqlamasını verməsi isə onun öz uğursuzluğunun etirafı kimi dəyərləndirilə bilər. Sual olunur ki, əgər Paşinyan Rusiyanın həmsədr kimi neytral olmalı olduğunu bilirdisə, nə üçün hərbi yardım üçün bu ölkənin prezidentinə müraciət edirdi? Səbəb aydındır. Bu da ondan ibarətdir ki, Paşinyan açıq-aşkar məğlub olduğu halda, hələ də “qalibiyyət” xülyası ilə yaşayır. O, öz mövqesiz qərarlarına, səriştəsizliyinə və proseslərə düşüncəsiz yanaşmalarına görə öz xalqını qırğına verir. Əslində, baş nazir öz xalqını aldatmaqla məşğuldur. Yaxşı olardı ki, Paşinyan öz xalqını qırdırmaqdansa, məğlubiyyətini etiraf edib təslim olsun.
O qeyd edib ki, Azərbaycan Prezidenti, Müzəffər Ali Baş Komandan İlham Əliyevin həyata keçirdiyi düzgün siyasət, diplomatiya və xalqın öz rəhbərinə inamı, Liderinin qərarlarının arxasında durması və qərarlarına güvənməsi göstərdi ki, biz bir yumruq kimi birik. Bizim Liderimiz çox uzaqgörəndir və bu uzaqgörənliyin bəhrələrini biz bu gün görürük.
Onun sözlərinə görə, erməni tərəfi o qədər ağlını itirib ki, muzdlulardan istifadə etdiyini kütləvi informasiya vasitələrində yayır. Halbuki, bu, beynəlxalq cinayət hesab olunur. “Xarici kütləvi informasiya vasitələrində bu barədə geniş məlumatlar yayılır, başqa ölkələrin vətəndaşları olan həmin muzdlularla söhbətlər yayımlanır. “France 24”, “Reuters”, “Associated Press”, “Kommersant”, “Liberation” kimi nəşrlərdə bu barədə geniş yazılar verilir. Beynəlxalq hüquqa görə xarici ölkə vətəndaşlarının başqa ölkələrdə muzd qarşılığında döyüşlərə cəlb olunması cinayətdir. Bu cinayətin ortaqları təkcə muzdlular və Ermənistan dövləti yox, həm də vətəndaşları muzdlu qismində döyüşən ölkələrin hüquq-mühafizə orqanlarıdır. Öz vətəndaşlarının cinayətkar əməllərinə görə həmin ölkələr də məsuliyyət daşıyır və bir çox hallarda belə cinayətlərə göz yumulması, şüurlu şəkildə şərait yaradılması müşahidə olunur. Əks təqdirdə, sosial şəbəkələr üzərindən açıq dəvət çağırışları edən, ödəniş şərtlərini açıq yazan, əlaqə vasitələrini də publik şəkildə paylaşan diaspor nümayəndələrinə qarşı hər hansı hüquqi tədbirlərin şahidi olardıq. Şanlı Azərbaycan Ordusunun qarşısında dayana bilmirsə, Ermənistanın hər hansı başıpozuq muzdlu dəstələrə, terrorçu qruplara ümid bəsləməsi əbəsdir. Onların layiqli cavabı bundan sonra da veriləcək. Əminik ki, kim olursa olsun, onlar da döyüş meydanında məhv olacaqlar”, - deyə Fatma Yıldırım vurğulayıb.
Nardar BAYRAMLI

Paylaş:

Baxılıb: 505 dəfə