Xaçmazda Azərbaycan mətbuatının 135 illiyinə həsr olunmuş regional konfrans keçirilib

Bakı:

26 °C

49 %

2 m/s

Əlaqə

AZ RU EN

Ana səhifə / Siyasət / Xaçmazda Azərbaycan mətbuatının 135 illiyinə həsr olunmuş regional konfrans keçirilib

Xaçmazda Azərbaycan mətbuatının 135 illiyinə həsr olunmuş regional konfrans keçirilib

17.07.2010 [11:14]

Azərbaycan milli mətbuatının 135 illik yubileyinə həsr olunmuş silsilə tədbirlərdən növbəti tədbir Xaçmazda keçirilib. APA-nın məlumatına görə, Xaçmaz rayon İcra Hakimiyyətinin binasında keçirilən regional konfransda Prezident Administrasiyasının ictimai-siyasi məsələlər şöbəsinin müdiri Əli Həsənov çıxış edərək əsası “Əkinçi” qəzeti ilə qoyulan milli mətbuatımızın 1875-ci ildən bu günədək Azərbaycanın ictimai-siyasi, sosial-mədəni inkişafında mühüm rol oynadığını qeyd edib. O, ölkədə media sahəsində həyata keçirilən dövlət siyasətinin müxtəlif aspektləri barədə məlumat verib. Konfransda rayon qəzetlərinin çap edilməsi üçün bölgələrdə mətbəə imkanlarının məhdudluğu, yerləşdikləri mətbu orqanların maddi-texniki bazasının zəif olması ilə bağlı səslənən problemlər müvafiq dövlət nümayəndələri tərəfindən xüsusi araşdırılıb. Əli Həsənov bildirib ki, mövcud problemlərin aradan qaldırılması məqsədi ilə müvafiq tədbirlər hazırlanır: “Regionlarda mətbəələrin yaradılmasına sahibkarlar da təşəbbüs göstərilməlidir. Əgər sahibkarların köməkliyi ilə regionlarda mətbəələr yaradılarsa, rayon qəzetinin ən çox narahat edən çap problemi aradan qalxmış olar. Bununla belə rayon qəzetlərinin problemlərini biz bu gün bir daha araşdırdıq və dövlət tərəfindən zəruri tədbirlərin həyata keçirilməsini təmin edəcəyik”.
Mətbuat Şurasının sədri Əflatun Amaşov isə çıxışında qeyd edib ki, yerli icra hakimiyyəti orqanları rayon qəzetlərinə himayədarlıq etməlidir: “Lakin bu himayədarlıq müvəqqəti olaraq həyata keçirilməli, mətbu orqan öz maddi imkanlarını inkişaf etdirdikcə tam müstəqil fəaliyyət göstərməlidir”.
Konfransda, həmçinin, regionlarda internet medianın inkişaf etdirilməsinin zəruriliyi vurğulanıb. APA informasiya agentliyinin baş direktoru Vüsalə Mahirqızı bildirib ki, bu gün internet mediasına böyük maraq var: “Yaxşı olar ki, regionlarda internet media yaradılsın. Hər bir rayonun internet saytı olarsa və gündəlik olaraq baş verən hadisələr, yeniliklər bu saytda yer alarsa, oxucu daha mükəmməl və operativ informasiya ilə təmin olunar”.
Vüsalə Mahirqızı dövlət başçısının Azərbaycan mətbuatının 135 illiyi ilə bağlı tədbirlər keçirilməsi haqqında Sərəncamını yüksək qiymətləndirib və bildirib ki, belə bir Sərəncamın imzalanması Azərbaycanda mətbuata dövlət qayğısının olduğuna bariz nümunədir. APA-nın baş direktoru çıxışında regional mətbuatın durumuna da toxunub. O bildirib ki, regionlardakı mətbuat orqanlarının əksəriyyəti icra hakimiyyəti strukturlarının təsis etdiyi orqan kimi fəaliyyət göstərir: “Azərbaycan Qərbə inteqrasiya yolu tutub və paralel olaraq Azərbaycan mediası da Qərbə inteqrasiya etməkdə, Qərb mediası standartlarına uyğunlaşmalıdır. Gec-tez bu proses başa çatacaq və o zaman regional mətbuat orqanları artıq icra hakimiyyəti qurumlarının təsis etdiyi orqan kimi deyil, müstəqil fəaliyyət göstərməyə hazır olmalıdır”.
Konfransda Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli çıxış edərək rəhbərlik etdiyi qurumun fəaliyyət göstərdiyi bir il ərzində görülən işlər və qarşıda duran vəzifələr haqqında danışıb. O, bildirib ki, fond daim xarici təcrübəni öyrənir və öz fəaliyyətini bu təcrübə əsasında təkmilləşdirir. Fondun elan etdiyi yazı müsabiqələri haqqında geniş məlumat verən Vüqar Səfərli qeyd edib ki, bu müsabiqələrə yazı təqdim edənlərin mütləq əksəriyyəti Bakıda fəaliyyət göstərən mətbuat orqanlarının əməkdaşlarıdır: “Təəssüf ki, regional qəzetlərin əməkdaşları bu müsabiqələrdə aktivlik nümayiş etdirmirlər. Bu baxımdan növbəti müsabiqələrdən birini məhz bölgələrdə fəaliyyət göstərən jurnalistlər arasında keçirmək niyyətindəyik”.
Mətbuat Şurası İdarə Heyətinin üzvü, “525-ci qəzet”in baş redaktoru Rəşad Məcid, “Olaylar” İnformasiya Agentliyinin baş redaktoru Yunus Oğuz tədbirdə çıxış edərək mətbuatın yaranma tarixi, mövcud durum, üzləşdiyi problemlər və həll yolları barədə danışıblar. Konfransda iştirak edən regional mətbuat orqanlarının nümayəndələri də mövzular ətrafında öz fikirlərini bildirib, üzləşdiyi problemlərdən danışıblar.

Paylaş:

Baxılıb: 1111 dəfə