Kimyəvi silahdan istifadə sübut edilərsə...

Bakı:

25 °C

52 %

5 m/s

Əlaqə

AZ RU EN

Ana səhifə / Siyasət / Kimyəvi silahdan istifadə sübut edilərsə...

Kimyəvi silahdan istifadə sübut edilərsə...

13.04.2022 [10:01]

Rusiya “dramatik tədbirlər” lə üzləşəcək

Məlik MƏMMƏDOV

Ötən gün Ukrayna KİV-ləri Azov alayının mətbuat xidmətinə istinadən xəbər verib ki, rus qoşunları Mariupol şəhərində Ukrayna hərbçiləri və mülki şəxslərə qarşı PUA-dan atılan mənşəyi naməlum zəhərli maddədən istifadə edib.

Mediada sinir-paralitik təsiri olan orqanofosfat zəhərli maddə - zarindən istifadə edildiyi bildirilir. Azov alayının lideri Andrey Biletskinin sözlərinə görə, kimyəvi silah “Azovstal”a atılıb. Hücum zamanı 3 nəfər yaralanıb. Onların vəziyyəti qənaətbəxş qiymətləndirilir.

Maraqlıdır ki, hadisədən bir neçə saat əvvəl qondarma “DXR-in xalq milisi”nin nümayəndəsi Eduard Basurin Birinci Kanalın efirində “DXR” qoşunlarının Mariupoldakı Azovstal zavodunu ələ keçirmək üçün “kimyəvi qoşunların köməyinə müraciət edə biləcəyini” söylədi. Bir neçə həftə əvvəl isə ABŞ rəsmiləri və NATO baş katibi Rusiyanın Ukraynada kimyəvi silahdan istifadə etmək planları barədə xəbərdarlıq etmişdilər. Martın 23-də brifinq zamanı NATO baş katibi Yens Stoltenberq Rusiyanı hədələyərək, “İlk növbədə, kimyəvi silahdan istənilən istifadə münaqişənin mahiyyətini tamamilə dəyişəcək. Bu, beynəlxalq hüququn kobud şəkildə pozulması olardı” dedi. Öz növbəsində, Amerika prezidenti Co Bayden martın 24-də bu münasibətlə çıxışı zamanı Rusiya prezidentinin kütləvi qırğın silahlarından istifadə edəcəyi təqdirdə ABŞ-ın cavab verəcəyini bildirib. Qeyd edək ki, bir neçə il əvvəl ABŞ Rusiyanı Suriya şəhərlərində kimyəvi silahdan (o cümlədən zarindən) istifadə etməkdə ittiham etsə də, bu ittihamlar sübuta yetirilməyib.

Martın 28-də Almaniya kansleri Olaf Şolz Rusiyanın kimyəvi silahdan istifadə etməsi ilə bağlı təhdidin olduğunu bildirib. O, Rusiyanı “dramatik tədbirlərlə” hədələyib.

Bununla belə, ABŞ MN-İN sözçüsü Con Kirbi bildirib ki, Pentaqon Rusiya hərbçilərinin Mariupolda kimyəvi silahdan istifadə etməsi ilə bağlı xəbəri təsdiq edə bilmir. Onun sözlərinə görə, Pentaqon vəziyyəti diqqətlə izləyəcək.

Qeyd edək ki, kimyəvi silahdan istifadəyə qadağa mütləqdir və demək olar ki, bütün dünya ölkələri tərəfindən tam dəstəklənir. Kimyəvi Silahlar Konvensiyası 29 aprel 1997-ci ildə qüvvəyə minib və BMT-yə üzv olan 193 ölkədən 192-si tərəfindən imzalanıb. Konvensiya 1925-ci il Cenevrə Protokolunu tamamlayır. Konvensiyanın maddələrinə əməl olunmasına Kimyəvi Silahların Qadağan edilməsi Təşkilatı nəzarət edir. 2017-ci ildə Rusiya kimyəvi silahlarını tamamilə məhv etdiyini elan etdi. ABŞ kimyəvi arsenalının məhvini 2023-cü ilə qədər başa çatdırmağı planlaşdırır.

Zarin 1938-ci ildə iki alman alimi tərəfindən təsadüfən kəşf edilmişdir. Həmin ildə maddənin formulası Vermaxtın Kimyəvi silahlar idarəsinə verildi. İdarə hərbi məqsədlər üçün zarinin kütləvi istehsalı üçün sifariş verdi. Lakin nasist Almaniyası zarindən döyüşlərdə istifadəsi planlarından imtina etdi. Zarinin ən kütləvi istifadəsi İran-İraq müharibəsi zamanı qeydə alınıb. İraq qüvvələrinin zəhərli maddələrdən istifadə etməsi nəticəsində minlərlə dinc sakin həlak olub və zərər çəkib.

Paylaş:

Baxılıb: 1314 dəfə