Həştərxanda Azərbaycan və Rusiya müəssisələrinin məhsullarından ibarət sərgi açılıb

Bakı:

25 °C

71 %

11 m/s

Əlaqə

AZ RU EN

Ana səhifə / Siyasət / Həştərxanda Azərbaycan və Rusiya müəssisələrinin məhsullarından ibarət sərgi açılıb

Həştərxanda Azərbaycan və Rusiya müəssisələrinin məhsullarından ibarət sərgi açılıb

20.05.2011 [08:38]

“Rusiya və Azərbaycan: regionlararası əməkdaşlığın yeni üfüqlərinə doğru” forumu çərçivəsində Həştərxanda hər iki ölkənin özəl və dövlət şirkətlərinin məhsullarından ibarət sərgi açılıb. AzərTAc-ın xüsusi müxbiri xəbər verir ki, sərgidə Azərbaycanın və Rusiya regionlarının sənaye, energetika, maşınqayırma, turizm, innovasiya texnologiyaları sahələrində fəaliyyət göstərən şirkət və müəssisələrinin 200-dək stendi və onlarca pavilyonu təqdim olunub.
Azərbaycan sərgidə kənd təsərrüfatı və ərzaq sənayesi sahələrini əhatə edən 9 şirkətin məhsulları ilə təmsil olunub. üstəlik, sərgiyə tamaşa edənlər müxtəlif stend və videotəqdimatlar vasitəsilə Azərbaycan iqtisadiyyatının nailiyyətləri, sosial, sənaye, aqrar-sənaye, turizm, kənd təsərrüfatı, habelə infrastruktur sahələrində həyata keçirilmiş layihələrlə tanış ola bilərlər. Sərgidə Rusiyanın regionları, o cümlədən çeçenistan və Dağıstan respublikaları, Həştərxan, Volqoqrad, Saratov vilayətləri və s. inşaat, turizm, kənd təsərrüfatı sahələri ilə bağlı layihələrini və nailiyyətlərini nümayiş etdirirlər.
Rusiya Prezidentinin xarici ölkələrlə mədəni və regionlararası əlaqələr üzrə idarəsinin rəisi Sergey Vinokurov sərginin açılışında çıxış edərək deyib: “Bu irimiqyaslı sərgi Rusiya-Azərbaycan əməkdaşlığının müasir potensialını əks etdirir. çoxşaxəli, hərtərəfli əməkdaşlığımız isə strateji tərəfdaşlıq xarakteri daşıyır, konkret nəticələrlə və xalqlarımızın rifahının yaxşılaşmasına yönəldilmiş birgə fəaliyyətlə təzahür olunur”.
Rusiyanın regionları ilə Azərbaycan arasında əlaqələrin son vaxtlar genişləndiyindən söz açan Vinokurov vurğulayıb ki, bu sərgi Azərbaycan və Rusiya arasında səmərəli dialoqa, regionlararası əməkdaşlığa yeni təkan verəcək.
Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov çıxışında deyib: “Bu səviyyədə tədbirlərin keçirilməsi Azərbaycan və Rusiya prezidentləri İlham Əliyev və Dmitri Medvedevin siyasi iradəsi sayəsində mümkün olub”.
Əli Həsənov bildirib ki, hər iki dövlət başçısı ölkələrimiz arasında əməkdaşlığın möhkəmlənməsində, siyasi, eləcə də iqtisadi sahələrdə əməkdaşlığın miqyasının genişlənməsində maraqlıdır. Ə.Həsənov bildirib: “Bu forum ikitərəfli əlaqələrin inkişafına, heç şübhəsiz, layiqli töhfə verəcəkdir”.
Azərbaycan iqtisadiyyatının sürətlə inkişaf etdiyini vurğulayan Ə.Həsənov deyib ki, son vaxtlar yüksək keyfiyyətli məhsul istehsal edən yüzlərlə müəssisənin açılması həmin inkişafın nəticəsi olub. Ə.Həsənov son 7 ildə Azərbaycan iqtisadiyyatının inkişafının yüksək səviyyədə olduğunu təsdiq edən statistika məlumatlarını sərgi iştirakçılarına açıqlayıb. Ə.Həsənovun bildirib ki, bu gün tərəflər əksər məsələlər, o cümlədən, Qəbələ RLS-in istismarı, eləcə də, Xəzər dənizinin hüququ statusu ilə bağlı konsensusa nail olublar: “ötən ilin sentyabrında Rusiya Prezidenti Dmitri Medvedevin Azərbaycana səfəri zamanı bir sıra əhəmiyyətli sazişlər imzalanıb. Onların sırasında quru ilə sərhəd keçid xəttini əks etdirən dövlət sərhədi haqqında müqavilə də var. Rusiya Azərbaycanın belə müqavilə bağladığı ilk ölkə olub”.
O, öz çıxışında forum iştirakçılarının diqqətini hazırda Rusiya və Azərbaycan arasında münasibətlərin yüksəlişdə olmasına yönəldib: “Buna isə Prezident Medvedevin son illər ərzində Azərbaycana üç dəfə səfər etməsi, İlham Əliyevin isə öz növbəsində Rusiyanın müxtəlif regionlarına dəfələrlə səfər etməsi sübutdur”.
Ə.Həsənov onu da əlavə edib ki, Azərbaycan və Rusiya BMT, ATƏT və digər beynəlxalq təşkilatlarda səmərəli əməkdaşlıq edirlər: “Rusiya ATƏT-in Minsk qrupunun həmsədrlərindən biri olmaqla, Dağlıq Qarabağ münaqişəsinin nizamlanmasında vasitəçi rolunda çıxış edir və bu münaqişənin həllinə öz töhfəsini verir”.
Ə.Həsənovun fikrincə, ölkələrin əməkdaşlığında əhəmiyyətli rolu iki ölkə arasında mədəniyyət, tibb, təhsil, idman, gənclər siyasəti, birgə informasiya mərkəzlərinin yaradılması və bu sahədə bir sıra digər layihələrin həyata keçirilməsi haqqında imzalanan sazişlər sayəsində humanitar əlaqələr oynayır. Azərbaycan rus dilinin xüsusi statusunu saxlayır, çünki respublika ərazisində 160 min rusdilli əhali yaşayır: “Keçmiş Sovet İttifaqı respublikalarında rus dili öz mövqeyini itirdiyi halda, Azərbaycanın 21 məktəbində təhsil rus dilində aparılır, daha 335 məktəbdə isə dərslər Azərbaycan və rus dillərində aparılır”.
Onun sözlərinə görə, respublikada rus dilində 50-yə yaxın qəzet və jurnal nəşr olunur, Rusiyanın dövri nəşrləri respublikanın ərazisində sərbəst şəkildə yayımlanır. “Bakıda Lomonosov adına MDU-nun filialı fəaliyyət göstərir, Rus Dram Teatrı işləyir, Rusiyanın aparıcı informasiya agentliklərinin filialları açılıb. Bu tendensiya xalqlarımızın sıx şəkildə yaxınlaşmasını sübüt edir. Azərbaycanda 160 min rus yaşayır. Bu, ən böyük milli diaspordur”, - Ə.Həsənov vurğulayıb.
Azərbaycan Prezidenti Administrasiyasının şöbə müdiri çıxışını yekunlaşdıraraq deyib: “2004-cü ildən indiyədək regionların sosial-iqtisadi inkişafına 16 milyard dollar vəsait yatırılmışdır. Respublikanın, demək olar, bütün regionlarında müxtəlif sənaye müəssisələri, kənd təsərrüfatı məhsullarını emal edən zavod və fabriklər yaradılmışdır. ümidvarıq ki, Azərbaycanda istehsal edilən məhsullar Rusiya istehlakçılarını maraqlandıracaqdır. İkinci Rusiya-Azərbaycan forumu regionlararası əlaqələrin yeni istiqamətlərinin inkişafı üçün yaxşı imkandır. Forum çərçivəsində işgüzar danışıqlar qarşılıqlı münasibətlərimizə şübhəsiz ki, yeni təkan verəcəkdir”.
Həştərxan vilayətinin qubernatoru Aleksandr Jilkin Rusiya-Azərbaycan forumunun əhəmiyyətini belə səciyyələndirib: “Həştərxanda forumun keçirilməsi həm Rusiya və Azərbaycan dövlətlərinin əlaqələrinin, həm də Həştərxan vilayəti və Azərbaycan münasibətlərinin inkişafı üçün əhəmiyyətlidir”.
Onun sözlərinə görə, Həştərxan vilayəti və Azərbaycan arasında yaranmış sıx əlaqələr hazırda 49-dək layihənin həyata keçirilməsində öz əksini tapıb.

Paylaş:

Baxılıb: 985 dəfə