Azərbaycan Prezidenti Administrasiyasının rəhbəri Ramiz Mehdiyev rusiyalı həmkarı Sergey Narışkinlə Bakı Beynəlxalq Humanitar Forumuna hazırlıq məsələlərini müzakirə edib

Bakı:

10 °C

81 %

9 m/s

AZ RU EN

Ana səhifə / Siyasət / Azərbaycan Prezidenti Administrasiyasının rəhbəri Ramiz Mehdiyev rusiyalı həmkarı Sergey Narışkinlə Bakı Beynəlxalq Humanitar Forumuna hazırlıq məsələlərini müzakirə edib

Azərbaycan Prezidenti Administrasiyasının rəhbəri Ramiz Mehdiyev rusiyalı həmkarı Sergey Narışkinlə Bakı Beynəlxalq Humanitar Forumuna hazırlıq məsələlərini müzakirə edib

11.06.2011 [09:50]

Moskvadakı “Prezident otel”də Bakı Humanitar Forumuna hazırlıq üzrə Təşkilat Komitəsinin növbəti iclası olub. İclasda Azərbaycan Respublikası Prezidenti Administrasiyasının rəhbəri Ramiz Mehdiyev və Rusiya Federasiyası Prezidenti Administrasiyasının rəhbəri Sergey Narışkin iştirak ediblər. Təşkilat Komitəsinin iclası çərçivəsində R.Mehdiyev və S.Narışkinin bu il oktyabrın əvvəlində Bakıda keçiriləcək foruma həsr edilmiş ikitərəfli görüşü olub.
RF Prezidenti Administrasiyasının rəhbəri Sergey Narışkin görüşdə deyib ki, Rusiyada Azərbaycanla əməkdaşlığın yüksək səviyyədə olmasını məmnunluqla qeyd edirlər. O deyib: “ölkələrimiz arasında əməkdaşlıqdan çox məmnunuq. İqtisadi sahədə qarşılıqlı əlaqələrimiz dinamik inkişaf edir. Beynəlxalq məsələlər barəsində mövqelərimiz oxşardır, bəzən isə tamamilə üst-üztə düşür. Rusiya və Azərbaycan humanitar məsələlərə böyük əhəmiyyət verirlər. Bu, çox geniş sahədir, əslində ölkələrimizin prezidentləri tərəfindən dəstəklənmiş Bakı Humanitar Forumu ideyası da bunun sayəsində yaranmışdır”.
Azərbaycan Respublikası Prezidenti Administrasiyasının rəhbəri Ramiz Mehdiyev dəvət üçün S.Narışkinə təşəkkürünü bildirərək qeyd edib ki, Bakı Beynəlxalq Humanitar Forumunun keçirilməsi təşəbbüsü iki ölkənin prezidentlərinə məxsusdur. “Azərbaycanda biz bu məsələyə çox diqqətlə və böyük məsuliyyətlə yanaşırıq. Bu, çox ciddi tədbirdir və biz buraya yeni konkret təkliflərlə gəlmişik”, - deyə vurğulayan R.Mehdiyev bu forumun Təşkilat Komitəsinin Bakıda Sergey Narışkinin iştirakı ilə keçirilmiş iclasını, həmin iclasın gündəliyinə daxil edilmiş çoxsaylı məsələnin müzakirə edilməsini xatırladıb. Azərbaycan Prezidenti Administrasiyasının rəhbəri daha sonra deyib: “İndi nəzərdə tutulanları həyata keçirmək lazimdır. Fikrimizcə, bu forum təkcə mədəniyyət, iqtisadiyyat sahəsində deyil, bütövlükdə humanitar problemlər üzrə Moskva ilə Bakının əməkdaşlığının inkişafını göstərən çox əlamətdar forum olacaqdır. Zənnimizcə, bu, iki müstəqil dövlətin qarşılıqlı fəaliyyətinin yaxşı göstəricisi olacaqdır”.
Ramiz Mehdiyev onu da qeyd edib ki, foruma təkcə Rusiyadan deyil, bütün dünyadan çoxlu tanınmış insanlar gələcək: “Qərb dövlətləri, o cümlədən Avropa ölkələri həmin forumda iştirak etmək üçün öz sifarişlərini artıq təqdim ediblər. Bir sözlə, dünyada bu foruma çox böyük maraq var. Xoşagələn haldır ki, forum hər cəhətdən inkişaf edən Azərbaycanda keçirilir. Azərbaycan təkcə iqtisadi cəhətdən deyil, mədəni baxımdan da inkişaf edir. Bakı forumu bir daha təsdiq edəcəkdir ki, Rusiya və Azərbaycan arasında humanitar sahədə qarşılıqlı əlaqələr beynəlxalq səviyyəyə yüksəlir”.
Sonra hər iki ölkənin prezident administrasiyalarının rəhbərləri görüşü forumun Təşkilat Komitəsinin üzvlərinin iştirakı ilə geniş tərkibdə davam etdiriblər. Sergey Narışkin görüşü açaraq qeyd edib ki, Moskva görüşünün məqsədi hər iki ölkənin işçi qrupları tərəfindən işlənilmiş məsələlərin hazırlıq dərəcəsini müəyyənləşdirmək və onları müzakirə etməkdir. O, xüsüsi vurğulayıb: “Humanitar sahədə əməkdaşlıq ümumi əməkdaşlığın mühüm tərkib hissələrindən biridir. Tərəfdaşlıq münasibətləri isə həqiqətən strateji münasibətlər kimi qiymətləndirilir”.
Ramiz Mehdiyev əlavə edib ki, artıq yarım ildir bu hadisəyə hazırlıq gedir və Azərbaycan bu məsələyə böyük məsuliyyətlə yanaşır. R.Mehdiyev deyib: “İndi hazırlığın ikinci mərtəbəsi başlanmışdır. Onu daha məsuliyyətli mərhələ kimi səciyyələndirmək olar. Bugünkü müzakirələr forumun keçirilməsinə hazırlıqda sonuncu olmasa da, həlledici məqam olacaqdır. Bu təşəbbüs Azərbaycan və Rusiya prezidentlərinə məxsusdur və bu, işçi qrupun üzərinə daha böyük məsuliyyət qoyur”.
Təşkilat Komitəsinin iclasının işində Azərbaycan Prezidenti Administrasiyasının humanitar siyasət məsələləri şöbəsinin müdiri Fatma Abdullazadə, siyasi təhlil və informasiya təminatı şöbəsinin müdiri Elnur Aslanov, Azərbaycanın Rusiyadakı səfiri Polad Bülbüloğlu, RF Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, İTAR-TASS agentliyi baş direktorunun birinci müavini Mixail Qusman, RF XİN -in, MDB Dövlətlərarası Humanitar Əməkdaşlıq Fondunun nümayəndələri və başqaları iştirak ediblər.

Paylaş:

Baxılıb: 942 dəfə