Əli Kərimli satqınlıq simvoludur

Bakı:

11 °C

58 %

6 m/s

Əlaqə

AZ RU EN

Ana səhifə / Siyasət / Əli Kərimli satqınlıq simvoludur

Əli Kərimli satqınlıq simvoludur

25.02.2012 [01:51]

Məlum olduğu kimi, bəzi müxalifət partiyaları Azərbaycanın beynəlxalq nüfuzuna zərbə vurmaq üçün çirkin fəaliyyətlə məşğuldurlar. Bu sırada AXCP sədri Əli Kərimli daha çox fəallıq göstərir. Azərbaycanı güclü dövlət kimi görmək istəməyən xarici qüvvələr də məhz bu cür müxalifətçilərdən alət kimi istifadə edirlər. Cəmiyyətimizin sağlam qüvvələri isə hər zaman belə fəaliyyətə qarşı çıxıb və bu gün də çıxmaqdadırlar.
Yeri gəlmişkən, Milli Məclisin dünən keçirilən iclasında da bu mövzuya toxunulub. Yeni Azərbaycan Partiyasının (YAP) İcra katibinin müavini, millət vəkili Siyavuş Novruzov belə şəxsləri “sapı özümüzdən olan baltalar” adlandırıb. Onun sözlərinə görə, bu gün hər kəs Ermənistanın Azərbaycana qarşı təcavüzünü dünya ictimaiyyətinə çatdırmaq üçün səylər göstərməlidir və ümummilli problemlərlə bağlı birgə mübarizə aparılmalıdır: “Amma bunun əksinə olaraq öz daxilimizdə ölkəmizin əleyhinə kampaniya aparanlar var. Bu gün Azərbaycan dövlətinə və dövlətçiliyinə qarşı kampaniya aparan insanlar mövcuddur. Onlar ölkəmizdə keçiriləcək beynəlxalq tədbirlərə də qarşı iş aparırlar. Biz belələrinin hamısını adbaad sadalamalıyıq. Adını siyasi partiya rəhbəri qoyan Əli Kərimli kimilər Azərbaycan xalqının maraqlarını tapdayırlar. Bu insanlar Azərbaycan siyasətinə satqınlıq simvolu gətiriblər. Ə.Kərimli vaxtilə Elçibəyi, ondan sonra ətrafında olanları satdı. İndi də, Azərbaycanın maraqlarını satmaqla məşğuldur. İddia edirlər ki, guya ölkəmiz Türkiyəyə lazımi dəstək vermir. Xocalı faciəsi ilə bağlı, işğal olunmuş ərazilərimizlə bağlı bir sətir yazı yazmayan, çıxış etməyən bir insan hansı haqla Türkiyəyə dəstəkdən danışır”.
Azərbaycanın Türkiyəyə dəstəyinin göz qabağında olduğunu deyən S.Novruzov bu istiqamətdə dövlətimizin gördüyü işləri xatırladıb. Onun sözlərinə görə, uydurma “erməni soyqırımı” məsələsində ölkə Prezidenti, cəmiyyətimizin müxtəlif təbəqələrinin nümayəndələri Türkiyəyə açıq dəstəyini ifadə edib. Eləcə də, Milli Məclis Fransa Senatına müraciət göndərib. “Azərbaycan - Fransa parlamentlərarası əlaqələr üzrə işçi qrupunun rəhbəri Mehriban xanım Əliyeva bu istiqamətdə çox səmərəli fəaliyyət göstərdi. Görülən işlərin nəticəsidir ki, Fransanın 77 deputatı məlum qanun layihəsi ilə bağlı Fransa Konstitusiya Məhkəməsinə müraciət etdi. Həmin deputatların bir qrupu Türkiyəyə deyil, məhz Azərbaycana gəldi. Bundan artıq nə işlər görülməlidir?” - deyə YAP İcra katibinin müavini vurğulayıb.
S.Novruzov Ə.Kərimliyə bu sahədə hansı işlər gördüyünü sadalamağı təklif edib: “Bəli, o, sadalaya bilər ki, Ruslan Bəşirli kimilərini yetişdirib ki, gedib ermənilərdən pul alaraq Azərbaycan xalqının maraqlarını tapdasın. Ə.Kərimli gənclər qarşısında çıxış edib onlara nə tərbiyə verəcək? O, yalnız gəncləri öyrətmək istəyir ki, küçələrə çıxıb dağıtsınlar, xalqın əmlakına ziyan vursunlar, gedib ermənilərdən pul alsınlar. özü ayrı-ayrı dövlətlərdən pul alıb necə Azərbaycanın əleyhinə işləyirsə, gəncləri də buna öyrətmək istəyir. Mən gənclərə üz tutub müraciət edirəm ki, Xocalı faciəsinin 20-ci ildönümü ərəfəsində bu adamlar bu soyqırımı haqqında bir kəlmə danışmır, amma ölkəmizdə keçiriləcək beynəlxalq tədbirlərin qarşısını almaqdan ötrü xarici dövlətlərdən üsul və vasitələr axtarır. Belələri bilməlidir ki, onların adı xalqımıza düşmən kəsilmiş ermənilərin adı ilə eyni sırada çəkilməlidir. Bu gün onlar Azərbaycana ermənilərdən daha çox ziyan vururlar. Məhz bu müxalifətçilərin vasitəsilə bəzi dövlətlər Azərbaycan xalqının maraqlarına ziyan vurmağa çalışırlar”.
Millət vəkili deyib ki, ölkəmizin işğal edilmiş ərazilərinin azad olunması məsələsində ayrı-seçiklik olmamalıdır. Onun sözlərinə görə, hamı bir yumruq şəklində birləşib vətənin müdafiəsində dayanmalıdır: “Amma təəssüf ki, bu adamlar Azərbaycan ordusu haqqında da böhtanlar danışır. Onlar xalqımızın maraqlarına deyil, ayrı-ayrı dövlətlərin maraqlarına xidmət edirlər. Hesab edirəm ki, bu, bizə ibrət dərsidir və bu cür insanlar Azərbaycan cəmiyyətində olmamalıdır”.
YAP İcra katibinin müavini, millət vəkili Mübariz Qurbanlı da təəssüflə bildirib ki, bəzi xarici dairələr yalançı erməni təbliğatına inanır: “Eyni zamanda, Azərbaycanın siysətinə təsir göstərmək üçün erməni təbliğatından bizə qarşı istifadə edirlər. Son zamanlar Almaniyanın bəzi KİV-ləri bu cür hərəkətlər edir. Əgər onlar ədalətli mövqedədirlərsə, Xocalı soyqırımına da öz səhifələrində yer versinlər. Amma bəzi iqtisadi-siyasi maraqlar naminə biz bu ölkənin KİV-lərində Azərbaycan əleyhinə yazılara geniş yer verildiyini görməkdəyik. Təəssüf ki, Azərbaycanın daxilindəki bəzi siyasi qruplar, xalq arasında heç bir nüfuzu olmayan dairələr də həmin xarici qüvvələrlə sinxron şəkildə fəaliyyət göstərir. Ən böyük ibrət dərsi budur ki, düşmənimizin bizə qarşı təbliğat aparmasını önləməsi işində birgə fəaliyyət göstərməliyik. Burada iqtidar-müxalifət söhbəti, hakimiyyətə çatmaq üçün sui-istifadə olmamalıdır”.
Nardar BAYRAMLI

Paylaş:

Baxılıb: 918 dəfə