Baxa - baxa qalıblar!

Bakı:

24 °C

58 %

7 m/s

Əlaqə

AZ RU EN

Ana səhifə / Siyasət / Baxa - baxa qalıblar!

Baxa - baxa qalıblar!

13.02.2024 [10:30]

Qərbin “durbin siyasəti” iflasın dibində...

Cənubi Qafqazda təhlükəsizliyin təmin edilməsində maraqlı olmayan bəzi dairələr “anti - sülh” mahiyyətli addımlarını davam etməkdə israrlıdırlar. Məsələn, heç bir siyasi-ictimai mahiyyət daşımayan, sadəcə olaraq, regiona “nəzarət” üçün Ermənistana yerləşdirilən Aİ-nin “müşahidə missiyası”nın əsl “fəaliyyət mexanizmləri” hər kəsə bəllidir. Bu qrup monitorinq missiyası mahiyyətindən daha çox Ermənistanı sülhdən uzaqlaşdırmaq üçün təzyiq vasitəsi kimi istifadə olunur. Onların daha çox kəşfiyyat xarakterli fəaliyyətlə məşğul olması sirr deyil. “Durbin diplomatiyası”nı özünün ən vacib hərəkət mexanizminə “çevirdiyini” düşünən qrup ara-sıra xarici ölkələrin Ermənistandakı səfirlərini, İrəvanda qonaq olan amma sülh məsələsinə ən minimum dəxli olmayan xarici nümayəndələri şərti sərhədə gətirir, onların Azərbaycan torpaqlarına “boylanan yerdə” şəkillərini çəkir paylaşır. Bunu isə həm də özünün missiyası sayır. Təəssüf ki, bəzi hallarda işlərini “boylanmaqla” da bitmiş saymırlar.

Bir neçə gün öncə Ermənistandan Azərbaycana keçmək istəyən Çexiya vətəndaşı saxlanılmışdı. Bununla bağlı bildirilmişdi ki, Çexiya vətəndaşı Ermənistan tərəfdə minalanmış zonadan keçərək Azərbaycan ərazisinə daxil olub. Eyni zamanda, son vaxtlar bir sıra Avropa ölkələrinin, xüsusən də Fransanın nümayəndələri Ermənistan-Azərbaycan sərhədində kifayət qədər tez-tez görünürlər. Belə ki, fevralın 2-də Fransa Milli Jandarmeriyasının briqada generalı Uilyam De Meyer Avropa İttifaqının Ermənistandakı mülki missiyasının yerləşdiyi yerə baş çəkib, orada sərhəddəki vəziyyətlə tanış olub. Bir sözlə, missiya “əlinə keçən” hər kəsin əlinə bir durbin verib Azərbaycana tərəf boylandırır...

Yeri gəlmişkən, Fevralın 12-də Avropa İttifaqının (Aİ) Azərbaycan Respublikasındakı səfiri Peter Mixalko Xarici İşlər Nazirliyinə çağırılıb. Ona Aİ-nin Ermənistandakı Monitorinq Missiyasının fəaliyyətinin ciddi narahatlıq doğurduğu bir daha deyilib. Missiyanın mahiyyət etibarilə müxtəlif Avropa rəsmilərinin, habelə qeyri-rəsmi nümayəndə heyətlərinin sərhəd bölgələrinə səfərlərinin təşkilinə töhfə verən “binokl diplomatiyası”nın agentinə çevrildiyi Aİ tərəfinin diqqətinə çatdırılıb. “Binokl diplomatiyası”nın bu fəallığının sərhəd boyunca indiyədək görülməmiş sakitliyin hökm sürdüyü, habelə həm Azərbaycanın, həm də Ermənistanın ciddi etimad quruculuğu tədbirləri həyata keçirdiyi bir zamanda müşahidə olunmasının xüsusilə narahatlıq doğurduğu diqqətə çatdırılıb.

Bəli, Qərbin demək olar ki, əksər siyasi gedişləri kimi, Ermənistandan Azərbaycana tərəf tuşladığı “durbin”in də siyasi mahiyyəti iflasa uğrayıb. Durbinin əsl funksiyası “uzağı yaxın etmək”dirsə, Qərbin İrəvandan Bakıya istiqamətlənən və əlində tərs tutduğu durbin “yaxını daha da uzaq edir”. Dildə “sülhün vacibliyindən” danışan Qərb bu tərs durbinlərlə sülhə mane olur. Qərb diplomatiyasının “durbin seyri” sabitlikdən çox qarşıdurmaya, sakitlikdən çox silahlanmaya xidmət edir. Amma niyyətlərinə nail ola bilmirlər - baxa baxa qalırlar...

P.SADAYOĞLU

Paylaş:

Baxılıb: 640 dəfə