ARDNŞ-nin vitse-prezidenti Tofiq Qəhrəmanov Bakı Ali Neft Məktəbində tələbələrlə görüş keçirib

Bakı:

18 °C

59 %

5 m/s

Əlaqə

AZ RU EN

Ana səhifə / Sosial / ARDNŞ-nin vitse-prezidenti Tofiq Qəhrəmanov Bakı Ali Neft Məktəbində tələbələrlə görüş keçirib

ARDNŞ-nin vitse-prezidenti Tofiq Qəhrəmanov Bakı Ali Neft Məktəbində tələbələrlə görüş keçirib

21.11.2014 [09:26]

ARDNŞ-nin strateji inkişaf üzrə vitse-prezidenti, Neft-qaz emalı və Neft-kimya Kompleksinin (NQNK) baş direktoru Tofiq Qəhrəmanov dünən Bakı Ali Neft Məktəbində (BANM) tələbələrlə görüş keçirib və onları yeni tikilən NQNK layihəsi haqqında geniş məlumatlandırıb. Tədbiri açan Bakı Ali Neft Məktəbinin rektoru Elmar Qasımov Azərbaycanda beynəlxalq standartlara uyğun şəkildə aparılan islahatların və görülən işlərin miqyasının ildən-ilə genişləndiyini, yeni Neft-qaz emalı və Neft-kimya Kompleksinin inşasının ARDNŞ-nin fəaliyyətində növbəti böyük nailiyyətlər əldə etməsinə yeni imkanlar yaradacağını qeyd edib. E.Qasımov, bu görüşün keçirilməsində əsas məqsədin BANM-in tələbələrini, Azərbaycanın bugünkü gəncliyini ARDNŞ-nin gündən-günə inkişaf edən fəaliyyətinin müxtəlif istiqamətləri ilə tanış etmək olduğunu bildirib və onların ARDNŞ-nin müasir standartlara cavab verən yeni layihələrində mütəxəssis kimi iştirak etmələrinin, bu istiqamətdə üzərlərinə düşən əsas öhdəlikləri dərk etmələrinin, elmi və təcrübə biliklərinin dərinləşməsi üçün zəruri addımların atılmasının, həmçinin, Azərbaycanın neft-qaz və neft-kimya sahəsində olan ingilisdilli yüksəkixtisaslı mütəxəssis tələbatının ödənilməsinin vacibliyini vurğulayıb.
Daha sonra ARDNŞ-nin vitse-prezidenti Tofiq Qəhrəmanov rəhbərlik etdiyi Neft-qaz emalı və Neft-kimya kompleksi layihəsinə dair təqdimatla çıxış edərək, Azərbaycan Prezidenti İlham Əliyevin müvafiq Sərəncamına əsasən ölkədə yeni Neft-qaz emalı və Neft-kimya Kompleksinin Qaradağ və Abşeron rayonlarının sərhədində inşa olunacağını və 2018-2020-ci illərdə istifadəyə verilməsinin nəzərdə tutulduğunu tələbələrin diqqətinə çatdırıb. Bu layihənin həyata keçirilməsi nəticəsində Azərbaycanın mülki, sosial, infrastruktur və mədəniyyət təyinatlı tikinti sahəsində nəhəng nailiyyətlərlə yanaşı, neft emalı və neft-kimya sahəsində də dərin texniki və texnoloji irəliləyişlərin müşahidə olunacağını, bir çox növ məhsul və məmulatların idxalından yaxa qurtarmağa imkan verən geniş çeşiddə yüksək keyfiyyətli məhsullar istehsal etməyə başlayacağını qeyd edən vitse-prezident, bunlarla yanaşı, müasir, yüksək ixtisaslı mütəxəssislərdən ibarət yeni kadr potensialı yaranacağını, yeni iş yerlərinin açılacağını və əhalinin məşğulluq strukturunun keyfiyyətcə yaxşılaşacağını iştirakçıların nəzərinə çatdırıb.
Xüsusilə də bu layihənin icrasına ingilisdilli və müasir bilikli gənc mütəxəssislərin cəlb olunmasına böyük önəm verildiyini vurğulayan T.Qəhrəmanov, BANM rəhbərliyi ilə bu istiqamətdə əməkdaşlıq etməsinə, ən bacarıqlı tələbələrin Neft-qaz emalı və Neft-kimya Kompleksi layihəsində təcrübə keçmələrinə maraqlı olduğunu bildirib və gələcəkdə, məhz BANM-in məzunlarının ARDNŞ-nin müasir kadr tələbatının yüksək səviyyədə ödəcəyinə əminlik ifadə edib.
T.Qəhrəmanov, həmçinin, tələbələrin çoxsaylı suallarını cavablandırıb və onlara gələcək peşəkar həyatlarında uğurlar arzulayıb.
Sonda T.Qəhrəmanova BANM-nin “Fəxri qonağı” diplomu təqdim edilib.
N.BAYRAMLI

Paylaş:

Baxılıb: 1995 dəfə