Hyuston Universiteti SOCAR və BANM ilə əməkdaşlığa hazırdır

Bakı:

29 °C

43 %

3 m/s

Əlaqə

AZ RU EN

Ana səhifə / Sosial / Hyuston Universiteti SOCAR və BANM ilə əməkdaşlığa hazırdır

Hyuston Universiteti SOCAR və BANM ilə əməkdaşlığa hazırdır

15.01.2015 [09:57]

Yanvarın 14-də Azərbaycan Respublikası Dövlət Neft Şirkətində (SOCAR) Hyuston Universitetinin rektoru və prezidenti xanım Renu Xaturun rəhbərlik etdiyi nümayəndə heyəti ilə görüş olub.
Şirkətin mətbuat xidmətindən AzərTAc-a bildirilib ki, görüşdə SOCAR-ın prezidenti Rövnəq Abdullayev Azərbaycan neftçilərinin hələ qədim dövrlərdən dünya neft sənayesinə verdiyi mühüm töhfələrdən söz açıb, sənaye üsulu ilə ilk dəfə neft hasilatına Bibiheybət mədənlərində başlanıldığını, dəmiryolu, tanker və boru kəmərləri ilə neftin ilk dəfə Azərbaycanda nəql olunduğunu qeyd edib. SOCAR prezidenti XX əsrin əvvəllərində dünya neft burjuaziyasının tanınmış nümayəndələrindən Nobel qardaşları, Rotşild, H.Z.Tağıyev, M.Nağıyev və başqalarının Azərbaycan mədənlərində o dövr üçün innovativ yeniliklər tətbiq etdiklərini bildirib. Azərbaycan neft sənayesi sovet dövründə də inkişafdan qalmayıb, ilk dəfə açıq dənizdə neft çıxarılmasına əfsanəvi “Neft Daşları”nda başlanılıb. R.Abdullayev sovet dövründə açıq üsulla neft hasilatı nəticəsində Abşeronda çirklənmiş torpaqların təmizlənməsi üçün SOCAR tərəfindən həyata keçirilən ekoloji layihələrdən danışıb, Bibiheybətdə təmizlənmiş ərazidə Bakı Ali Neft Məktəbi (BANM) üçün yeni kampus tikildiyini qonaqların nəzərinə çatdırıb.
Prezident İlham Əliyevin “neft kapitalını insan kapitalına çevirək” çağırışına cavab olaraq, azərbaycanlı gənclərin dünyanın nüfuzlu universitetlərində təhsil alması üçün SOCAR tərəfindən genişmiqyaslı layihələrin həyata keçirildiyi, şirkətin vəsaiti hesabına xaricdə təhsil alan 197 məzunun artıq SOCAR-ın müxtəlif strukturlarında çalışdığı qeyd olunub. Bildirilib ki, SOCAR-ın dünya neft bazarındakı mövqeyi, xaricdə həyata keçirdiyi investisiya layihələri, TAP və TANAP kimi irimiqyaslı layihələrə start verilməsi şirkətdə müasir biliklərə yiyələnmiş, ingilis dilli mütəxəssislərə tələbatı artırıb. Bu məqsədlə Azərbaycan Respublikası Prezidentinin Sərəncamı ilə SOCAR-ın nəzdində BANM-ın yaradıldığı, məktəbin qısa müddətdə öz sözünü deməyi bacaran alı təhsil ocağı kimi şöhrət qazandığı qeyd olunub. Burada nəzəri biliklərlə yanaşı praktiki biliklərin də təliminə xüsusi diqqət verilir. Nəzərdə tutulub ki, yeni kampusa köçdükdən sonra qarşıdakı tədris ilindən tələbələrə Bibiheybət mədənlərində nəzəri biliklərini tətbiq etmələri üçün imkan yaradılsın.
Xanım Renu Xatur BANM ilə Hyuston Universiteti arasında əməkdaşlıq imkanlarını araşdırmaq üçün Bakıya səfər etdiklərini bildirib. Qeyd edib ki, rəhbərlik etdiyi universitetdə yenilikçi proqramlara və innovativ layihələrə böyük yer verilir. O, həmin layihələrdə SOCAR və BANM ilə əməkdaşlığa hazır olduqlarını, bundan qürur duyacaqlarını söyləyib. Daha sonra nümayəndə heyətinin üzvləri rəhbərlik etdikləri fakültələrdə həyata keçirilən proqramlar haqqında danışıb, əməkdaşlıq imkanlarını yüksək qiymətləndiriblər.

Paylaş:

Baxılıb: 1006 dəfə