“Azərsu” ASC-nin yeni Təlim-Tədris Mərkəzi fəaliyyətə başlayıb

Bakı:

25 °C

64 %

13 m/s

Əlaqə

AZ RU EN

Ana səhifə / Sosial / “Azərsu” ASC-nin yeni Təlim-Tədris Mərkəzi fəaliyyətə başlayıb

“Azərsu” ASC-nin yeni Təlim-Tədris Mərkəzi fəaliyyətə başlayıb

03.10.2015 [11:10]

Səhmdar Cəmiyyətin əməkdaşlıq etdiyi bir sıra beynəlxalq qurumların nümayəndələri yeni yaradılmış mərkəzdə olublar
Kadr hazırlığı və işçilərin peşəkarlığının artırılması, təlim-tədris işinin günün tələbləri səviyyəsində qurulması, bu sahədə müvafiq infrastrukturun yaradılması məqsədilə “Azərsu” Açıq Səhmdar Cəmiyyətinin yeni Təlim-Tədris Mərkəzi fəaliyyətə başlayıb. Səhmdar Cəmiyyətin İctimaiyyətlə əlaqələr və şikayət şöbəsinin məlumatına görə, Hövsan Aerasiya Stansiyasının ərazisində mövcud inzibati bina əsaslı təmir olunub, zəruri mebel və avadanlıqlarla təchiz edilib. Ümumi sahəsi 5000 kv metr olan binanın zirzəmisində ilkin tibbi yardım otağı, inzibati otaqlar, arxiv, anbar yaradılıb. Mərkəzin 1-ci və 2-ci mərtəbələrində nəzəri və praktiki tədris otaqları, psixologiya kabineti, konfrans zalı, kitabxana, linqafon otağı, tədrisin inkişafı və digər sahələr üzrə laboratoriyalar, tədris-təcrübə kabineti yerləşir. Binanın 3-cü mərtəbəsi yataqxana, mansardı isə asudə vaxtın səmərəli təşkili üçün nəzərdə tutulub. Ümumilikdə, mərkəzdə 8 nəzəri, 10 praktiki təlim otağı yaradılıb ki, bu da eyni vaxtda 321 nəfərə təlim keçirilməsinə imkan verir. Burada mexanika, energetika, avtomatika və metrologiya, kompüter, coğrafi informasiya sistemi, SCADA, nəzarət ölçü cihazları kabinetləri fəaliyyət göstərir.
Mərkəzdə təlim iştirakçılarının məişət qayğıları, asudə vaxtlarının təşkili üçün də şərait yaradılıb. Binada mətbəx, 108 nəfərə xidmət göstərən yeməkxana, idman zalı fəaliyyət göstərir. Mərkəzin binasında regionlardan və xarici ölkələrdən gələn təlim iştirakçılarının yerləşməsi üçün 5-i VİP, 12-si standart olmaqla 67 yerlik yataq otaqları da var.
Təlim-Tədris Mərkəzində yaradılmış şəraitlə tanış olmaq üçün “Azərsu” ASC-nin əməkdaşlıq etdiyi Dünya Bankı, İslam İnkişaf Bankı, Yaponiya Beynəlxalq Əməkdaşlıq Agentliyi, Koreya Beynəlxalq Əməkdaşlıq Agentliyinin (KOİCA) nümayəndələri yeni yaradılmış mərkəzdə olublar. “Azərsu” ASC-nin sədri Qorxmaz Hüseynov yeni yaradılan Təlim-Tədris Mərkəzi barədə məlumat verərək bildirib ki, kadr hazırlığı işinin təkmilləşdirilməsi və mərkəzləşdirilmiş qaydada həyata keçirilməsi üçün 2014-cü ildə Hövsan Aerasiya Stansiyasının ərazisində Təlim-Tədris Mərkəzinin yaradılmasına qərar verilib və təmir-tikinti işləri qısa müddətdə başa çatdırılıb. Müasir standartlar səviyyəsində qurulmuş mərkəzdə regional və beynəlxalq təlimlərin keçirilməsi məqsədilə yüksək səviyyəli şərait yaradılıb. Bu təcrübədən yararlanaraq gələcəkdə respublikanın bütün bölgələrini əhatə edən regional təlim-tədris mərkəzlərinin yaradılması nəzərdə tutulur. Beynəlxalq maliyyə qurumlarının Azərbaycanda və digər ölkələrdə reallaşdırdığı layihələr çərçivəsində bəzi beynəlxalq və regional təlimlərin yeni yaradılmış mərkəzdə keçirilməsi də perspektivdə təcrübə mübadiləsinin genişləndirilməsi baxımından əhəmiyyətli olacaq. Daha sonra Təlim-Tədris Mərkəzinin həyətyanı ərazisində inşası planlaşdırılan praktiki təlim poliqonlarının yaradılması layihəsinin təqdimatı keçirilib. Beynəlxalq maliyyə qurumlarının nümayəndələri Təlim-Tədris Mərkəzində yaradılmış şəraiti yüksək qiymətləndirib, burada beynəlxalq və regional təlimlərin keçirilməsi üçün lazımi şəraitin olduğunu, mərkəzin yaradılmasını “Azərsu” ASC-nin uğuru, insan resurslarından səmərəli istifadəyə yönəlmiş məqsədyönlü fəaliyyəti adlandırıblar. Qeyd olunub ki, birgə həyata keçirilən beynəlxalq layihələr çərçivəsində istifadəyə verilən qurğuların istismarı baxımından peşəkar mütəxəssislərin hazırlanması xüsusi əhəmiyyət kəsb edir. Beynəlxalq maliyyə qurumlarının nümayəndələri mərkəzin fəaliyyətinin daha da təkmilləşdirilməsi üçün dəstək veriləcəyini diqqətə çatdırıblar. Qeyd edək ki, kadr hazırlığı və işçilərin peşəkarlığının yüksəldilməsi “Azərsu” ASC-nin prioritet məqsədlərindəndir. Bu məqsədlə 2012-ci ildən başlayaraq mütəxəssislər yerli və xarici ölkələrdə təşkil olunan təlimlərə cəlb edilirlər. Ümumilikdə 2012-2015-ci illərdə “Azərsu” ASC-nin 7 mindən artıq əməkdaşı təlimlərə cəlb olunub. 2012-ci ildə Cəmiyyətin işçilərinin 5 faizi, 2013-cü ildə 10, 2014-cü ildə isə 32 faizi təlimlərdə iştirak edib.

Paylaş:

Baxılıb: 897 dəfə