Ağdaşda Milli Məclisə təkrar seçkilərlə bağlı KİV nümayəndələri üçün seminar keçirilib

Bakı:

12 °C

87 %

7 m/s

Əlaqə

AZ RU EN

Ana səhifə / Sosial / Ağdaşda Milli Məclisə təkrar seçkilərlə bağlı KİV nümayəndələri üçün seminar keçirilib

Ağdaşda Milli Məclisə təkrar seçkilərlə bağlı KİV nümayəndələri üçün seminar keçirilib

27.05.2016 [10:04]

Mayın 26-da 90 saylı Ağdaş seçki dairəsi dairə seçki komissiyasının inzibati binasında iyunun 18-də rayonda keçiriləcək təkrar seçkilərlə əlaqədar jurnalistlərin seçki prosesində fəaliyyətinə dair seminar təşkil olunub. Mərkəzi Seçki Komissiyası (MSK) ilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun birgə təşkilatçılığı ilə keçirilən seminarda 90 saylı Ağdaş seçki dairəsi dairə seçki komissiyasının sədr və üzvləri, 40 məntəqə seçki komissiyasının sədr və üzvləri, beynəlxalq təşkilatların nümayəndələri, KİV əməkdaşları iştirak ediblər.
AZƏRTAC xəbər verir ki, seminarda Mərkəzi Seçki Komissiyasının üzvü Qabil Orucov “Azərbaycan Respublikasının Milli Məclisinə seçkilərdə seçkiqabağı təşviqata dair ümumi tələblər”, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun nümayəndəsi Samir Mustafayev “Azərbaycan Respublikasının Milli Məclisinə seçkilərlə əlaqədar jurnalistlərin seçki prosesində fəaliyyətinin əsasları” mövzusunda məruzə ediblər. Natiqlər seçkiqabağı təşviqata dair ümumi tələblərdən danışıb, seçkiqabağı təşviqat subyektləri, onların hüquq və vəzifələri, seçkiqabağı təşviqat prosesində KİV-lərin rolu və vəzifələri barədə ətraflı məlumat veriblər.
Bildirilib ki, mayın 26-da deputatlığa namizədliyi qeydə alınan şəxslərin təşviqat kampaniyası başlayıb. Seçkiqabağı təşviqat Azərbaycan Respublikası Konstitusiyasının 47-ci maddəsinə uyğun olaraq aparılır. Seçkiqabağı təşviqat səsvermə gününə 23 gün qalmış başlayır və səsvermənin başlanmasına 24 saat qalmış dayandırılır. Səsvermə günü və ondan əvvəlki gün hər hansı seçkiqabağı təşviqat aparmaq qadağandır. Dövlətimiz Azərbaycan Respublikasının Konstitusiyasına və Seçki Məcəlləsinə uyğun olaraq vətəndaşlar, siyasi partiyalar tərəfindən azad seçkiqabağı təşviqatın aparılması üçün şərait yaradılmasını təmin edir.
Seminarda jurnalistlərin seçki prosesində fəaliyyətinin əsasları barədə məlumat verilərkən diqqətə çatdırılıb ki, seçki prosesində şəffaflığın təminatında və Milli Məclisə seçkilərlə bağlı məlumatların ictimaiyyətə dolğun şəkildə çatdırılmasında kütləvi informasiya vasitələrinin üzərinə mühüm vəzifələr düşür. Ağdaşda bu seminarın təşkilində əsas məqsəd Milli Məclisə seçkilər ərəfəsində jurnalistləri maarifləndirmək, onlara qanunvericiliklə müəyyən olunmuş hüquq və vəzifələri izah etməkdir. Milli Məclisə seçkilər barədə məlumatların ölkə cəmiyyəti və beynəlxalq ictimaiyyətə intensiv şəkildə çatdırılmasında jurnalistlərin rolu əvəzsizdir.
90 saylı Ağdaş seçki dairəsi dairə seçki komissiyasının sədri Nurəddin Nəsibov çıxış edərək, seçici siyahıları ilə işin aparılması, seçkiqabağı təşviqatın təşkilinə şəraitin yaradılması, bildirişlərin seçicilərə çatdırılması istiqamətində görülən işlərdən danışıb. Məlumat verib ki, rəhbərlik etdiyi DSK-nın nəzdində 40 seçki məntəqəsi fəaliyyət göstərir. Dəqiqləşdirilən siyahıya əsasən, seçicilərin sayı 40 min 203 nəfərdir. Seçkilərin demokratik, şəffaf və ədalətli keçirilməsi üçün bütün məntəqələrdə lazımi şərait yaradılıb. Ümumilikdə 241 nəfər ilk dəfə səs verən seçici qeydiyyata alınıb. Bundan əlavə, seçicilərdən 6 nəfərinin yaşı 100-dən yuxarıdır. Hazırda seçki məntəqələrinin səsvermə üçün tam hazır vəziyyətə gətirilməsi istiqamətində lazımi işlər görülür. Seçki məntəqələrinin yerləşdiyi binalarda təmir-bərpa işləri həyata keçirilib, ərazidə səliqə-sahman yaradılıb. Seçki məntəqələri lazımi texniki avadanlıqlarla təchiz edilir, rabitə və elektrik sistemi qaydaya salınıb. Seçkiqabağı təşviqatın aparılması üçün yerlər ayrılıb, seçki məntəqələrinin ərazisində seçkiqabağı təşviqat materiallarının yerləşdirilməsi məqsədilə lövhələr quraşdırılıb.
Sonda seminar iştirakçılarını maraqlandıran suallar cavablandırılıb, onlara “Seçki günü üçün yaddaş” kitabçası paylanılıb.

Paylaş:

Baxılıb: 692 dəfə